LUKE 24
24
Jesu Thohnawnna
(Matt. 28.1-10; Mk. 16.1-8; Jn. 20.1-10)
1Huan khawlni’n thupiak bang in a khawlta uhi; ni sagih ni masapen in; phalvakin, gimnamtui a bawlte uh tawi in, han ah a vahoh uhi. 2Hana kipan suangtum khuksuan a om a mu uhi. 3Huan a lut ua, Toupa Jesu luang a mukei uhi. 4Hichi ahi a, huai ziak a a mangbat laiun, ngai in, mi nih puan milengthei silh a kiang uah a hongding uhi. 5A lau ua a khupboh lai un, a kiang uah, “Bangdia misi lak a mihing zong? 6Hiai ah a omta kei hi, a thounawnta; Galili gam a a omlai a na kiang ua a thugen theigige un, 7Mihing Tapa mikhialte khut a matsakin a om ding a, a kilhden ding uh, ni thum ni’n a thounawn ding ahi” a chih a chi uhi.
8Huan a thugente a hon theinawn uhi. 9Hanmuna kipan a pai nawn un, sawmlehkhatte leh midang tengtengte kiang ah huai thil tengteng a hilh uhi. 10Sawltakte kiang ah huai thuhilhte bel Mari Magdalini, Mari, Joanna, Jakob nu Mari leh a kiang ua numei dangte ahi uhi. 11Himahleh huaite thugen thu maimai in a ngai ua, amau a taksang kei uhi. 12Himahleh Peter a thou a, han ah a taita a; huan a kuna, a en a, puanmalngat omte kia a mu a, huchi in thil omdan lamdangsa tak in inlam ah a paita hi.
Emmau Lampi A Jesu Kilakna
(Mk. 16.12-13)
13Huan ngai in, huai ni mah in a lak ua mi nih khua khat Emmau a chih uah a hoh dek ua, huai khua Jerusalem apat ching sawmguk ahi. 14Huan thil hongtung tengteng a gen khawm zel uhi. 15Gen a a kisel lai un, Jesu ngei in a honzuan a, a kiang uah a paisamta hi. 16Himahleh amah a theihlouhna ding un, a mit uh hihvaih in a om hi. 17Huan a kiang uah, “Paikawm a na genkhawm uh bang thu ahia?” a chi hi. Huan dahmel tak in ading dinden uhi. 18Huan a min Kleopa pen in a kiang ah, “Jerusalem khua ah nangmah kia in hia na ten, tulai a thil omdan na theihlouh?” chi in a dong hi.
19Aman a kiang uah, “Bang thil eita?“ a chi hi. Amau a kiang ah, “Nazaret Jesu, Pathian leh mi tengteng mitmuh a a thu leh a thilhih a zawlnei minthangtak tanchin thu: 20Siampu liante leh ka heutute un thah ding in thu a pia ua, Kros ah a kilhden thute uh. 21Kou amah zaw Israelte tanpa ding a lamen hi ung a, himahleh, huai thiltun nungsiah tuni a ni thumni ahita hi. 22Huailou leng ka pawlte uh numei kuate hiam zingsang in, han ah a vahoh ua, hong hih mangbang uhi; 23A luang mulou pi in, Pathian angelte kilak ka mu uh, huai mite’n a thounawnta chih a gen uh, a hong chi uhi. 24Ka ompihte lak ua kuate hiam han ah a hoh ua, numeite genbang ngei in a mu ua; himahleh amah a mu kei uh” a chi uhi.
25Aman a kiang uah, “Mihaite aw, zawlneite thugen tengteng gintak thu a ze awlte aw: 26Khrist in huai thilte thuak a thupina a lut ding him ahi ka hia?” a chi hi. 27Mosi leh zawlneite tengteng apan in, Laisiangthou tengteng amah tanchin gelh peuhmah amau a hilhchian zel hi.
28Huan a hohna ding khua uh a tung dekta ua; amah gamla deuh a hohtum bang in a om hi. 29Kam in a khou ua: “Ka kiang uah tam in; nitaklam leng hi ding hita a, ni leng tumdekta ahi” chi in. Huchi in a kiang ua tam ding in a lutta hi. 30Hichi ahi a, a kiang ua an um a a tut in tanghou a la a, a vualzawl a, a balkham a, a kiang uah a pia hi. 31Huan a mit uh a hongvakta a, a mel a theita uhi. Himahleh amah a mangta mai hi. 32Amau, “Lampi a hon houpihlai a Laisiangthou thute hon hilhchet lai in i lungtang a vakhuai him hilou hia?” a kichi uhi.
33Huailai tak in, a thou ua, Jerusalem khua ah a kiknawn ua, sawmlehkhatte leh a lawmte omkhawmte a mu uhi, 34“Toupa a na thounawn taktak ahi, Simon kiang ah leng a kilakta” a na chi uhi.
35Amau lampi a bang thil om hiam chih leh, tanghou a balkhap a, a mel a theihdante uh a hilh sam uhi.
Jesu Nungzuite Kiang A Kilak
(Matt. 28.16-20; Mk. 16.14-18; Jn. 20.19-23; Nas. 1.6-8)
36Huai thu a genlai un Jesu mahmah a lakuah a hongdinga, a kiang uah, “Na tung uah khamuanna om hen” a chi hi.
37Himahleh mulkimhuai a sa mahmah ua, a lau ua, sikha mu hi in a kingaihtuah uhi. 38Aman a kiang uah, “Bang a chia mangbang na hi ua? Bangdia na lungsim ua ginlahna hongom ahia? 39Ka khutte ka khepekte en un, kei mahmah ka kei hiam! Hon khoih unla, thei un; sa leh guh nei a n’on muh bang un kha in zaw sa leh guh a nei ngal kei hi” a chi hi.
40Huai a genkhit in a khutte a khepekte amau a lak hi. 41A kipahluat ziak ua a gin ngamlouh lamdang a saklai un, a kiang uah, “Hiai ah banghiam nekding na nei uhia?” a chi hi. 42Ngahou, bak khat leh khuaizu khak a pia uhi. 43A la a, a ma uah a neta hi.
44Huan a kiang uah, “Na kiang ua ka omlai a ka tanchin gelh peuhmah thute a hongtung ding chi a k’on hilhhilhte Mosi Dan, zawlneite leh phatnalate a thu kigente hiaite ka thu ahi” a chi hi.
45Huchi in Laisiangthou thu theihna din a lungtang uh a vaksakta hi. 46Huan a kiang uah, “Hichibang a gelh ahi, Khrist in gim a thuak ding a, ni thum ni’n misi lak a kipan a thounawn ding a chi hi: 47Amah min in kisikna leh khelh ngaihdamna thu Jerusalem khua apat in namchih kiang ah hilh ahi ding, chi in. 48Huai thil tengteng a theihpihte na hi uh. 49Huan ngai un, ka Pa thilchiam na tung uah k’on sawl ding a; himahleh, tunglam a kipan thilhihtheihna silhsak a na om masiah uh khopi ah om kinken un” a chi hi.
Jesu Thu Nanung Leh Vankahna
(Mk. 16.19-20; Nas. 1.9-11)
50Huan Bethani pha in amau a pikhia a; huan a ban a zak a, a vualzawl hi. 51Hichi ahi a, a vualzawl laitak in amau a paisanta a, van ah pitouh in a omta hi. 52Huan amah a bia ua, kipak kawm in Jerusalem ah a kik nawnta uhi: 53Pathian biakin ah Pathian phat in a om nilouh uhi. Amen.
നിലവിൽ തിരഞ്ഞെടുത്തിരിക്കുന്നു:
LUKE 24: PAITBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
