Yohani 19

1U Pilati akalamula ukuti u Yesu bamusyempe. 2Abasilikali ababwite bakaluka impumpu iya mivwa nukumuvwika kumutu, bakamuvwika inkazo inchesamu. 3Bakiza kukwache nukuti, “Mwaghona we Mwene uwa ba Yuda.” Po bakamukoma na mapi. 4U Pilati akafuma sona kuzi nukubabuzya aba Yuda ukuti, “Ennya, nkumufumya kuzi ukuti namwe bulo mumanye ukuti intamwaghitepo ninongwa nayimoyimo.” 5Po u Yesu akafuma kuzi bo avwalite impumpu iya mivwa ni nkazo inchesamu. U Pilati akababuzya akati, “Ennya, umuntu yula we uyu!”

6Bo abaputi abasongo na balindilili aba Nyumba iya Chala bamwennya u Yesu, bakakolomoka nkani bakati, “Mukomele pachipinjika! Mukomele pachipinjika!”

Pilati akababuzya akati, “Mumusende mwebene nukumukomela pachipinjika pakuti ane intakumwagha ninongwa nayimoyimo.”

7Aba Yuda bakamwamula bakati, “Ukuyana nu lulaghilo lwitu, aghoghiwanje pakuti akinena mwene ukuti, ‘Ane ne Mwana uwa Chala.’ ”

8Bo u Pilati ivwa zinizi, ubogha bukamulema nkani. 9Akinjila sona munyumba mula nukumulalusya u Yesu ukuti, “Nkimba kukwinyu ko kwiyi?”

Loli u Yesu atakamulapo nachimo. 10U Pilati akamulalusya akati, “Utakulonda pakunyamula? Nkimba utazimenye ukuti indi nu bulaghili ubwakukwabulila nu bwakukukomelela bulo pachipinjika?”

11U Yesu akamwamula akati, “Uli nu bulaghili papane pakuti we Chala yuyo akakupa ubulaghili bunubu. Po umuntu yuyo akambika munyobe zyinyu anangite nkani.”

12Bo u Pilati ivwa zinizi, akalondagha pakumusatula u Yesu, loli aba Yuda bakanda pakukolomoka ukuti, “Nanti ukumusatula kokuti ute we mumanyani uwa Kesale. Umuntu wesi yuyo akwinena mwene ukuti we Mwene, akumusambukila u Kesale.” 13Bo u Pilati ivwa amazyu ghanagha, akafuma kuzi nu Yesu, akikala pachitengo ichakulongelapo inongwa pabuzilo bubo bukwitiziwa ukuti, “Ulwalo ulwa mabwe.” (Mu Chihebeli kokuti, “Gabata.”) 14Likaba lisiku ilya ba Yuda ilyakwiyanizizya Ulusekelo ulwa Pasa, sona kakaba kabalilo akapamusanya. U Pilati akababuzya aba Yuda akati, “U mwene winyu we uyu!”

15Bakakolomoka nkani bakati, “Mughoghe! Mughoghe! Mukomele pachipinjika!”

U Pilati akabalalusya akati, “Nkimba mukulonda ukuti ane imukomele u mwene winyu pachipinjika?”

Abaputi abasongo bakamwamula bakati, “Tute nu mwene uyunji, loli u Kesale mwene.”

16Po u Pilati akamubika u Yesu munyobe zyabo ukuti bamukomele pachipinjika.

Bakumukomela u Yesu pachipinjika

(Mat. 27.32-44; Mlko. 15.21-32; Luk. 23.26-43)

Abasilikali bakamusenda u Yesu. 17Bo anyamuye ichipinjika chache, bakafuma nawe kuzi ukwa kaya akakulu nkani kala nukufika pabuzilo bubo bukwitiziwa ukuti, “Ifupa ilya kumutu.” (Mu Chihebeli kokuti, “Gologota.”) 18Kulakula bakamukomela pachipinjika. Bakakomela poka sona na bantu abanji babili, weka kunyobe indilo, uyunji iya kumongo, u Yesu pakasi. 19U Pilati akasimba ubusimbe nukubika pamwanya pachipinjika icha Yesu ubwakuti, “U Yesu uwamu Nazaleti, u Mwene uwa ba Yuda.” 20Aba Yuda abinji bakabelenga ubusimbe bula pakuti ubuzilo bubo bakamukomelapo u Yesu bukaba papipi nakaya akakulu nkani. Amasimbo ghakasimbiwa mu Chihebeli mu Chiloma na mu Chigiliki. 21Abaputi abasongo bakanena kwa Pilati bakati, “Utakasimbe ukuti, ‘U Mwene uwa ba Yuda.’ Loli utinji, ‘Umuntu uyu akinena mwene ukuti ne Mwene uwa ba Yuda.’ ”

22U Pilati akamula akati, “Chicho nasimba, nasimba mpela.”

23Bo abasilikali ababwite bamukomela u Yesu pachipinjika, bakasenda amenda ghache nukughagabannya muvigaba folo, umusilikali wesi akasenda ichigaba chache. Sona bakasenda ni nkazo yache, yiyo yitakaba nu busone nabumobumo. 24#Mas. 22.18Abasilikali ababwite bakanenezannya benebene bakati, “Tutakaghuzepule, loli tubombe amayele, umwakuti tumwaghe yuyo akwiza pakughusenda.” Zinizi zikabombiwa ukuti Amasimbo ghakwanilisiwe aghakuti,

“Bakagabana amenda ghane,

pankazo yane bakabikilapo ubulaghuzi.”

Po izi zyo zizyo bakabomba abasilikali ababwite.

25Papipi ni chipinjika icha Yesu pakimilila unyina, umuzuna uwa nyina nu Maliya umuchi uwa Kiliyopa nu Maliya Magadalena. 26Bo u Yesu amwennya unyina nu mumanyili wache yuyo akamughana nkani, imiliye papipi akamubuzya unyina akati, “Mayi, uyu mwana wako.”

27Po akamubuzya sona umumanyili wache yula akati, “Uyu we nyoko.” Ukwandila pakabalilo kalakala umumanyili yula akamusenda unyina nukubuka nawe kukaya kache.

Ubufwe ubwa Yesu

(Mat. 27.45-56; Mlko. 15.33-41; Luk. 23.44-49)

28 # Mas. 69.21, 22.15 U Yesu akazimanya ukuti imbombo yiyo akizila yamala, sona ukuti Amasimbo ghakwanilisiwe akanena ukuti, “Numilwe.”

29Pakabapo isonta inyizule nu vinyo uwakusapa, bakasenda isipanji nukuyidwibika muvinyo uwakusapa yula. Akayisomeka kulutete nukuyibika ku mulomo wache. 30Bo u Yesu ang'wela uvinyo yula akati, “Kwamala.” Po akawisya icheni pasi nukufwa.

Bakumulasa u Yesu mumbazu

31Likaba lisiku ilya ba Yuda ilyakwiyanizizya Ulusekelo ulwa Pasa. Abalaghili aba Chiyuda batakalondagha ukuti imivimba yibanje pavipinjika Pisiku Ilyakutuzya pakuti Isiku Ilyakutuzya lila likaba lya pamwanya nkani. Po bakamulaba u Pilati ukuti itikizye ukuti ivinama ivya bantu babo bakakomeliwa vipyoliwe nukuti imivimba yabo yefiwepo. 32Po abasilikali ababwite bakabuka nukupyola ivinama ivya babo bakakomeliwa poka nu Yesu, nukwandila ivya umuntu uwabwandilo nukubomba bunubu ku wabubili. 33Loli bo bafika pa Yesu, bakagha ukuti afuye kale, po batakapyola ivinama vyache. 34Loli weka uwa basilikali ababwite bala akamulasa u Yesu ni mpalala mumbazu, po umwalubilolubilo ibanda na mizi vikanda pakufuma. 35Umuntu yuyo akennya izi zikubombiwa weyuyo akusimikizya ukuti namwe musubile.#19.35 musubile: Amasimbo ghamo aghakale ghasimbite ukuti mwendelele pakusubila. Ulusimikizyo lwache lwanaloli, sona azimenye ukuti zizyo akunena zyanaloli. 36#Ukf. 12.46; Ukb. 9.12; Mas. 34.20Zinizi zikabombiwa ukuti Amasimbo ghakwanilisiwe aghakuti, “Nalimolimo ifupa lyache lilyo likwiza pakupyoliwa.” 37#Zek. 12.10; Ubv. 1.7Sona pali Amasimbo aghanji ghagho ghakuti, “Abantu bakwiza pakumwenelezya yuyo bakamulasa.”

U Yesu abikiwa mwipumpa

(Mat. 27.57-61; Mlko. 15.42-47; Luk. 23.50-56)

38Pisinda pache u Yosefu uwa mukaya aka Alimatiya, yuyo akaba mumanyili uwa Yesu uwakubusyefu pakuti akanyilagha abalaghili aba Chiyuda, akamulaba u Pilati ukuti awefyepo umuvimba uwa Yesu. U Pilati akamwitikizya, po u Yosefu akabuka nukuwisyapo umuvimba ghula. 39#Yoh. 3.1-2U Nikodemu wepe akiza, yuyo pabwandilo akabuka kwa Yesu pabusiku. Akasenda amafuta aghakununkila ghagho ghakaba mongannye umila nu aloyi, ubung'wamu bwache bukaba amakilogalamu 30. 40Abanavuli babili bala bakasenda umuvimba uwa Yesu nukughunnyembetelela ni sanda poka na mafuta aghakununkila ghala, ukuyana nu lwiho ulwa pafwa izya Chiyuda. 41Ubuzilo bubo bakamukomelapo u Yesu pachipinjika bukaba mughunda, sona mumughunda ghula mukaba ipumpa ipya bulo, lilyo ukwanda kale nayumo umuntu yuyo akasyiliwamo. 42Pakuti likaba lisiku ilya ba Yuda ilyakwiyanizizya Ulusekelo ulwa Pasa, sona ukuti ni pumpa lyope likaba papipi, bakabika umuvimba uwa Yesu mulamula.

നിലവിൽ തിരഞ്ഞെടുത്തിരിക്കുന്നു:

Yohani 19: LMBNT2016

ഹൈലൈറ്റ് ചെയ്യുക

പങ്ക് വെക്കു

പകർത്തുക