Yohani 18

Bakumulema u Yesu

(Mat. 26.47-56; Mlko. 14.43-50; Luk. 22.47-53)

1Bo u Yesu amala pakwiputa ulwiputo ulu, akanyamuka na bamanyili bache nukuloboka ulusoko ulwa Kidiloni. Kulakula kukabako umughunda, po u Yesu na bamanyili bache bakinjilamo. 2U Yudasi, yuyo akamubikagha u Yesu munyobe izya balwani akabumanya ubuzilo bula pakuti utubalilo utwinji u Yesu akakomanaghako na bamanyili bache. 3U Yudasi akabuka ku mughunda kula poka na kabukatila aka basilikali ababwite aba Chiloma na balindilili aba Nyumba iya Chala, babo bakatumiwa na baputi abasongo naba Falisayi. Bakasenda ivilwilo, inyale ni vikoka. 4Bo u Yesu azimanya zizyo zikayanga pakumuwila akabuka kuntazi kukwabo nukubalalusya ukuti, “Nkimba wewenu mukumulonda?”

5Bakamula bakati, “Tukumulonda u Yesu uwamu Nazaleti.”

Akati, “Nene!”

U Yudasi, yuyo akamubika u Yesu munyobe izya balwani akimilila palapala poka nabo. 6Bo u Yesu amula ukuti nene, bakanyokela chinyumanyuma nukuwa pasi. 7U Yesu akabalalusya sona akati, “Nkimba wewenu mukumulonda?”

Bakamula bakati, “Tukumulonda u Yesu uwamu Nazaleti.”

8U Yesu akati, “Nababuzya kale ukuti nene. Nanti mukundonda, mubaleke aba babukaye.” 9(Akanena zinizi ukuti amazyu ghagho akanenagha ghakwanilisiwe ukuti, “Tata, abantu babo ukampa, nayumo umuntu yuyo asobelitepo.”)

10U Simoni Pitala, yuyo akaba nupanga akamuwesa, akamukoma umuzya uwa muputi usongo nukumudumula ikutu ilya kundilo. Itabwa ilya muzya yula likaba we Malikusi. 11#Mat. 26.39; Mlko. 14.36; Luk. 22.42U Yesu akamubuzya u Pitala akati, “Nyosezya upanga wako mubuzilo bwache. Nkimba ukwinong'ona ukuti ntakwiza pakung'wela ulubako ulwa ntamyo lulo Utata ampiye?”

U Yesu pamaso pa Anasi

12Po akabukatila aka basilikali ababwite aba Chiloma poka nu mulongozi wabo, na basilikali aba Chiyuda bakamulema u Yesu nukumupinya. 13Bakabuka nawe kwa Anasi pakuti akaba we wisevyala uwa Kayafa, yuyo akaba muputi usongo umwaka ghulaghula. 14#Yoh. 11.49-50U Kayafa akaba weyuyo akababuzya abalaghili aba Chiyuda ukuti chikaba chizapo ukuti umuntu weka abafwile abantu bosi.

U Pitala akumukana u Yesu

(Mat. 26.69-70; Mlko. 14.66-68; Luk. 22.55-57)

15U Simoni Pitala nu mumanyili uyunji bakamukonka u Yesu. Pakuti u muputi usongo akamumanya nkani umumanyili uyunji yula, po akinjila poka nu Yesu mulubinjilo ulwa nyumba iya muputi usongo. 16Loli u Pitala akimilila kuzi ukwa mulyango. Po umumanyili umumanyikwe nkani yula akafuma kuzi nukunena nu mulindu, yuyo akalindililagha pamulyango, po akamwinjizya u Pitala mukasi. 17Umulindu yula akamulalusya u Pitala akati, “Nkimba ute weka uwa bamanyili aba muntu yula?”

U Pitala akamula akati, “Awe, inte nene.”

18Po abambombo na basilikali bakapemba umoto uwa mazimwa nukota pakuti kukakatala nkani. Po wepe u Pitala akikala nabo palapala nukota nabo.

U Yesu pamaso pa muputi usongo

(Mat. 26.59-66; Mlko. 14.55-64; Luk. 22.66-71)

19Umuputi usongo akamulalusya u Yesu nizya bamanyili bache nu bumanyisi bwache. 20U Yesu akamwamula akati, “Ane nkanena pabuzelu pamaso pabantu bosi. Akabalilo kosi namanyisyanga munyumba izyakwiputilamo na mu Nyumba iya Chala, mumo aba Yuda bosi bakabungana poka. Chitalipo nachimo chicho nkanena kubusyefu. 21Po choni chicho mukundalusya? Mubalalusye abantu babo bakanyivwanga. Naloli bazimenye zizyo nkanenagha.”

22Bo u Yesu anena zinizi, umusilikali weka yuyo akimilila palapala akamukoma na mapi ukuti, “Nkimba unganena bunubu ku muputi usongo?”

23U Yesu akamwamula akati, “Nanti nanena chimo ichibibi, po chinene. Loli nanti nanena akiza, nkimba po choni chicho ukunkoma?”

24Po u Anasi akamutuma u Yesu kwa Kayafa, umuputi usongo bo apinyiwe.

U Pitala akumukana sona u Yesu

(Mat. 26.71-75; Mlko. 14.69-72; Luk. 22.58-62)

25U Simoni Pitala akaba achili akota nabo umoto palapala, po abantu bamo bakamulalusya bakati, “Nkimba ute we uwa bamo uwa bamanyili aba muntu yunuyu?”

Loli u Pitala akakana akati, “Awe, inte nene.”

26Uwambombo weka uwa muputi usongo, umukamu uwa muntu yuyo u Pitala akamudumula ikutu akati, “Nkimba intakakwennya mumughunda mula?”

27U Pitala akakana sona. Panapo na panapo ukolwe akakokolika.

U Yesu pamaso pa Pilati

(Mat. 27.1-2, 11-14; Mlko. 15.1-5; Luk. 23.1-5)

28Pandabindabi nkani, u Yesu akasendiwa munyumba iya Kayafa nukubuka nawe kunyumba iya mwimilili uwa chigaba. Abalaghili aba Chiyuda batakinjila mukasi pakuti batakalondagha ukwinyazya, umwakuti bangasekelela nabo Ulusekelo ulwa Pasa. 29Po u Pilati akafuma kuzi nukukomana nabo nukubalalusya ukuti, “Nkimba nongwa yoni yiyo mukumupa umuntu uyu?”

30Bakamwamula bakati, “Nanti umuntu uyu atakabanga ninongwa, ngali tutizite nawe kukwako.”

31U Pilati akabamula akati, “Mumusende mwebene nukumulonga ukuyana ni ndaghilo zyinyu.”

Bakamwamula bakati, “Aswe tutakwitikiziwa pakughogha nayumo umuntu.” 32#Yoh. 3.14, 12.32Zinizi zikabombiwa ukuti amazyu ghagho u Yesu akanena ghakwanilisiwe, amazyu ghagho ghakunena nizya bufwe bwache.

33U Pilati akinjila sona munyumba mula nukumwitizya sona u Yesu. Akamulalusya akati, “Nkimba awe we Mwene uwa ba Yuda?”

34U Yesu akamwamula akati, “Nkimba ilalusyo linili likufuma kukwako, pamo baliko babo bakubuzya nizya ane?”

35U Pilati akamula akati, “Nkimba ukwinong'ona ukuti ane ne mu Yuda? Bakaba baluko lwako na baputi abasongo babo bakakubika kukwane. Nkimba unangite ichoni?”

36U Yesu akamula akati, “Ubumwene bwane bute bwa muchisu ichi awe. Nanti ubumwene bwane bukabanga bwa muchisu ichi, po ngali abakonki bane bakundwila ukuti intakabikiwe munyobe izya balaghili aba Chiyuda. Awe! Ubumwene bwane bute bwa muchisu ichapasi.”

37Po u Pilati akamulalusya akati, “Nkimba we Mwene?”

U Yesu akamula akati, “Momumo mo wanenela ukuti ane ne Mwene. Nkapapiwa nukwiza muchisu ichapasi ukuti imbusimikizye ubwanaloli. Umuntu wesi yuyo ali pa bwanaloli, akwivwila amazyu ghane.”

38U Pilati akamulalusya akati, “Nkimba ubwanaloli cho choni?”

Kwadumuliwa ukuti u Yesu aghoghiwanje

(Mat. 27.15-31; Mlko. 15.6-20; Luk. 23.13-25)

Bo anena zinizi, u Pilati akafuma sona kuzi nukuti, “Ane intakumwagha ninongwa nayimoyimo. 39Loli ukuyana nu lwiho lwinyu imbaghiye pakubasatulila umuntu weka pa Lusekelo ulwa Pasa. Nkimba mukulonda ukuti imbabulile u Mwene uwa ba Yuda uyu?” 40Bakamula nukukolomoka ukuti, “Yunuyu awe! Tukulonda u Balabasi.” (U Balabasi akaba livyondongo.)

നിലവിൽ തിരഞ്ഞെടുത്തിരിക്കുന്നു:

Yohani 18: LMBNT2016

ഹൈലൈറ്റ് ചെയ്യുക

പങ്ക് വെക്കു

പകർത്തുക