Yohani 20

U Yesu azyuka kubufwe

(Mat. 28.1-8; Mlko. 16.1-8; Luk. 24.1-12)

1Pandabindabi nkani, bo lyachila Isiku Ilyakutuzya, bo kuchili nukucha, u Maliya Magadalena akabuka kwipumpa nukwagha ukuti ibwe lyefeziwepo pamulyango wipumpa. 2Po akamuchimbilila u Simoni Pitala nu mumanyili uyunji yuyo u Yesu akamughana nkani nukubabuzya ukuti, “Bawefizyemo umuvimba uwa Mwene mwipumpa, tutamenyeko na kuko baghubikite.”

3Po u Pitala nu mumanyili uyunji yula bakabuka kwipumpa. 4Bosi babili bakachimbilagha loli umumanyili uyunji yula akachimbila nkani ukuchila u Pitala. Akaba wakwanda ukufika kwipumpa. 5Akinama nukwennya isanda zyene zizyo bakamunnyembetelela nazyo, loli atakinjila mukasi. 6U Simoni Pitala yuyo akamukonkagha akafika nukwinjila mwipumpa. Akennya isanda zyene zizyo bakamunnyembetelela nazyo zili mulamula, 7ni chitambala chicho bakamupinya u Yesu kumutu. Chitakaba poka ni sanda zila, loli chikinnyenga chene palubazu. 8Po umumanyili uyunji yuyo akanda pakufika kwipumpa, wepe akinjila. Akennya nukusubila. 9Pakuti bakaba bachili pakughivwisya Amasimbo ghagho ghakuti u Yesu abaghiye pakuzyuka kubufwe. 10Po abamanyili bala bakanyokela kukwabo.

U Yesu akumubonekela u Maliya Magadalena

(Mat. 28.9-10; Mlko. 16.9-11)

11U Maliya akimilila kuzi kwipumpa, akalilagha. Bo achili akulila, akinama nukunanamizya mwipumpa 12akabennya abantumi babili aba kumwanya bavwalite amenda amazelu, bikaye papo umuvimba uwa Yesu ghukaba, weka kumutu uwamwabo ku vinama. 13Bakamulalusya bakati, “Wee mukolo, nkimba ukulila ichoni?”

Akabamula akati, “Bamwefizyemo u Mwene wane, sona intamenyeko na kuko bamubikite!”

14Bo anena zinizi, akaghalabuka nukumwennya u Yesu imiliye palapala, loli atakamumanya ukuti we Yesu. 15U Yesu akamulalusya akati, “Wee mukolo, choni chicho ukulila? Nkimba ukumulonda wewenu?”

U Maliya akinong'onagha ukuti akaba mulindilili uwa mughunda, po akamubuzya akati, “Wee Mwene, nanti wewe umunyamuye, mbuzya kuko umubikite ukuti imbuke nukumusendako.”

16U Yesu akamubuzya akati, “Maliya!”

U Maliya akaghalabuka nukunenela mu Chihebeli ukuti, “Laboni!” (Kokuti, “Mumanyisi.”)

17U Yesu akamubuzya akati, “Utakampalamasye pakuti inchili pakukwela kumwanya kwa Tata. Loli kababuzye abakamu bane ukuti, ‘Nkunyokela kumwanya kwa Tata wane, yuyo namwe we ghuso winyu, sona u Chala wane, yuyo namwe we Chala winyu.’ ”

18Po u Maliya Magadalena akabuka nukubabuzya abamanyili bala ukuti amwennya u Mwene, sona akababuzya ukuti u Mwene akanena zinizi kukwache.

U Yesu akubabonekela abamanyili bache

(Mat. 28.16-20; Mlko. 16.14-18; Luk. 24.36-49)

19Pisiku ilinji, bo lyachila Isiku Ilyakutuzya, pakabalilo aka pachamabwila, abamanyili bakakomana poka munyumba. Inyiyi zikaba nyighalile nkani, pachifukwa ichakuti bakabanyilagha abalaghili aba Chiyuda. Po u Yesu akiza nukwimilila pakasi papabo nukuti, “Umutende ghubanje namwe!” 20Bo amala pakunena zinizi, akabalanjizya inyobe na mumbazu mwache. Abamanyili bakizula nu buhobosu bo bamwennya u Mwene. 21U Yesu akanena nabo sona akati, “Umutende ghubanje namwe. Ukuyana namumo Utata akantumila, po momumo nane nkubatumila.” 22Bo anena zinizi, akabaputila umuyi nukuti, “Pokela u Muzimu Umuzelu. 23#Mat. 16.19, 18.18Nanti mukubahobokela abantu imbibi zyabo, naloli bakuhobokeliwa, loli nanti mutakubahobokela imbibi zyabo, naloli batakuhobokeliwa.”

U Yesu nu Tomasi

24U Tomasi (yuyo akitiziwanga ukuti we Didimo), weka mu bamanyili 12 bala, atakaba poka na bamwabo bo u Yesu iza. 25Po abamanyili abanji bala bakamubuzya bakati, “Twamwennya u Mwene!”

U Tomasi akanena nabo akati, “Pene papo nennya amabala agha mizumali munyobe zyache nukughalema ni nyobe zyane, sona nukubika inyobe yane mumbazu zyache, ntakwiza pakusubila.”

26Bo pachilapo usabata weka abamanyili bakakomana sona munyumba, u Tomasi akaba poka nabo. Inyiyi zikaba nyighalile nkani, loli u Yesu akiza, akimilila pakasi papabo nukuti, “Umutende ghubanje namwe.” 27Po akamubuzya u Tomasi akati, “Bika akafingwi kako pano nukwenelezya inyobe zyane. Gholosya inyobe yako nukuyibika mumbazu zyane. Leka ukwilamwa, loli subila.”

28U Tomasi akamwamula akati, “Mwene wane, sona nu Chala wane.”

29U Yesu akamubuzya akati, “Nkimba ukusubila pachifukwa ichakuti wanyennya? Basayiwa babo bakusubila bo batanyenizye.”

Ifundo iya buku ili

30U Yesu akapela ivyika ivyinji pamaso pa bamanyili bache, vivyo vitasimbiwe mwibuku linili. 31Loli ivi visimbiwe ukuti musubile ukuti u Yesu we Kilisitu, u Mwana uwa Chala sona nukuti nanti mwamusubila mubanje nubumi.

നിലവിൽ തിരഞ്ഞെടുത്തിരിക്കുന്നു:

Yohani 20: LMBNT2016

ഹൈലൈറ്റ് ചെയ്യുക

പങ്ക് വെക്കു

പകർത്തുക