Iza i Jesoa?Santionany

Ny mofo sy ny hazandrano

Efa hitanao ve ilay horonantsary miaina an’i Disney, “Ilay Printsin’ny Egypta?”

Tsoriko ny marina— tsy Aladdin ilay izy.

Mbola tsara kokoa aza ilay horonantsary miaina “Roi Lion”.

Ny mampiavaka azy amin’ny Aladdin sy Roi Lion kosa dia nalaina tamin’ny tantara tena nisy tao amin’ny Baiboly ny Printsin’ny Egypta — ny tantaran’ny Eksodosy.

Tao amin’ny bokin’ny Eksodosy ao amin’ny Testamenta Taloha, dia nampiasain’Andriamanitra i Mosesy hanafaka ny olony amin’ny fanandevozana tao Egypta. Avy eo dia tavela tany an-tany efitra ny Israelianina, vizaka, maloto sy mosarena. Nimenomenona fa tsy misy sakafo izy ireo ka dia nandefasan’Andriamanitra “mana” avy any an-danitra, izay midika amin’ny teny Hebreo hoe, “Inona koa ity?”

Sombin-tantara lehibe ao amin’ny tantaran’ny Baiboly izy ity.

Fa mety manontany tena izao ianao hoe, “inona no idiran’ny Eksodosy amin’ilay tantara novakiantsika tao amin’ny Filazantsara teo?”

Ny valin’izay dia hitantsika ao amin’ny mofo.

Ao amin’ny Jaona toko faha-6 dia tavela tany an-tany efitra noana ny vahoaka. Raha nijery ny lanitra nivavaka i Jesoa dia nisy mofo tonga avy any an-danitra.

Tsy vahiny amintsika izany tantara izany e?

Mbola nisy mofo novatsian’Andriamanitra tamin’ny fomba mahagaga ihany koa ho an’ny olony tany amin’ny tany efitra tamin’ity indray mandeha ity.

Koa inona ary no lazain’ity tantara ity mikasika ny fiizin’i Jesoa ao amin’ny planin’Andriamanitra?

Mosesy dia nanoratra fa hisy Mpaminany izay lehibe noho izy izay hitarika sy haneho an’Andriamanitra ho avy any aorianany. Jesoa no nanatanteraka an’izay teny fikasana izay ary nitondra famonjena lehibe mihoatra lavitra noho izay aza. Jesoa dia toa ilay Mosesy vaovao izay hitarika Eksodosy vaovao hamonjena ny vahoakan’Andriamanitra amin’ny fanandevozan’ny fahotana. Ary amin’ny maha-Mpamonjy avy amin’ny Teny Fikasana Azy dia hitarika ny vahoakany ho an’ny amin’ilay Tany nampanantenainy Izy; Ilay Lanitra vaovao sy Tany Vaovaon’Andriamanitra, ary hamatsy sakafom-panahy izay ilain’ny vahoakany mandra-pahatonga an’izay andro izay Izy!

Ity tantara izay novakiantsika ity dia mampiseho antsika ny fanasan’Andriamanitra antsika handray anjara amin’ny planiny.

Afaka hoe nodongin’ity tovolahy tsy notononina anarana ity ho azy ny sakafony. Afaka notazominy ho azy ny sakafony, fa raha izay dia tsy ho nahita ny fahagagana nataon’Andriamanitra izy. Tsy izay nefa fa nosokafany ny tanany ary nanome izy, ka dia nandray anjara tamin’ny fisehoam-pahagagana lehibe lavitra noho izy izy!

Aza manakana ny tenanao tsy hahita ny fahagagana ataon’Andriamanitra amin’izao tontolo izao noho ny fanidinao ny fonao sy ny tananao amin’Andriamanitra sy amin’ireo olon-kafa. Aza manakalo fahagagana amin’ny sakafo mandalo, na fahazoana antoka vetivety amin’ny fiantraika maharitra amin’ny Fanjakan’Andriamanitra.

Anontanio ny tenanao hoe inona no eto an-tanako? Inona ny talenta, fanomezana, traikefa, fananana izay nomen’Andriamanitra anao? Mety hoe tsy betsaka ilay izy, fa Andriamanitra ihany koa nefa tsy miandry zavatra be dia be vao afaka ny hanao fahagagana— Ny hany ilainy dia mofo dimy sy hazandrano roa.

Raha lazaina amin’ny teny hafa dia ny hany ilainy dia izay misy eo am-pelatananao.