Iza i Jesoa?Santionany

Ny tantaran’ilay mararin’ny paralysisa: Jesoa no Mpamela ny heloka

Raha afaka ny ho tonga “superhero” ianao dia inona ilay hery tena mampiavaka anao? Manan-danja be izany fanontaniana izany ka dia eritrereto tsara mialohan’ny hanomezanao ny valinteninao.

Afaka ny hanidina ve?

Tsy ho hitan’ny olona intsony ve?

Fahaizana mifehy ny eritreritra ve?

Tsy afaka ny ho rava mihitsy ve?

Ahoana raha misy ny safidy hoe “ireo rehetra voalaza ireo”?

Raha jerena ety ivelany ny antony mahavariana antsika amin’ireny superhero ireny dia ny faniriantsika ny hisitaka sy hiala ny fahasarotan’ny fiainana. Raha dinihana lalina kokoa nefa dia mankafy ireny superhero ireny isika noho ny faniriantsika amin’ny maha-olombelona ny ho vonjena sy ny hiaina toe-javatra mihoatra ny natoraly

Mazava ho azy fa tsy toy ireny superhero amin’ny Marvel ireny i Jesoa, nefa rehefa mamaky ny Filazantsara isika dia mahita fa nanana fahefana hanao fahagagana maro izay mihoatra ny natoraly toy ny fanasitranana ny marary sy ny fandroahana demonia i Jesoa; ary vokatr’izany dia nitaona olona maro hanaraka Azy izy ary ny lazany dia niparitaka toy ny pitikafo.

Eto amin’ity tantara ity dia naheno resaka mikasika an’ity Mpanao Fahagagana ity ireto efa-dahy ireto ka dia nandeha kilaometatra maromaro mba hijery Azy. Resy lahatra ny hitondra ny namany marary eo amin’i Jesoa izy ireo; fa vetivety teo nefa dia nosakanan’ny vahoaka izy ireo.

“Ary satria tsy afaka nanakaiky Azy izy noho ny habetsahan’ny vahoaka, dia nanesorany ny tafon’ny trano nitoeran’i Jesoa, ka nony efa voasokatra, dia nampidininy teo ny fandriana izay nandrian’ilay nararin’ny paralysisa” (andininy faha-4).

Andraso kely aloha.

Novakian’ireto lehilahy ireto mihitsy anie izany tranon’olona izany e!

Soa ihany fa nodian’i Jesoa tsy nojerena izay vaky trano izay ary hoy izy tamin’ilay nararin’ny paralysisa, “Anaka, voavela ny helokao” ary nositranin’i Jesoa ny tongony avy eo. Talanjona ny vahoaka, fa ny mpanora-dalana kosa dia nieritreritra tao am-pony hoe, “Iza no mahavela heloka afa-tsy Iray ihany, dia Andriamanitra”

Ilay hany tokana afaka mamela heloka dia ilay hany tokana nitondra ny helotsika — dia Andriamanitra ihany izany.

Tamin’ity indray mandeha ity ihany koa dia manome hevitra antsika amin’ny maha-izy azy an’i Jesoa ity tantara ity. Miteny sy maka ny toeran’Andriamanitra tsy ampihambahambana mihitsy i Jesoa eto. Naneho ny fahefany hamela heloka sy hanao fahagagana mihitsy aza Izy. Raha lazaina amin’ny fomba hafa dia milaza amintsika ity tantara ity hoe Andriamanitra mihitsy i Jesoa!

Mety hoe tsy mararin’ny paralysisa toa ity lehilahy amin’ity tantara ity isika.

Fa raha ny fiainantsika manokana nefa no jerena dia efa nanao fahadisoana sy mahatsapa marary noho ny henatra, ny tahotra sy ny fahatsapana tsy fahampiana teo amintsika isika. Mety hoe salama tsara ny tongontsika fa mahatsiaro kosa nefa isika hoe potika ny fiainantsika satria ny olantsika dia ara-panahy foana aloha izay vao ara-batana.

Ny faniriantsika lalina indrindra dia ny ho voavela heloka sy ny ho vita fihavanana amin’ilay nahary antsika — ny hiaina ilay hery manasitrana avy amin’ny fitiavan’Andriamanitra eo amin’ny tsy fahatokisantsika mba hahatonga antsika ho tanteraka.

Jesoa dia tsy superhero amin’ny horonantsary noforonina akory.

Jesoa dia tena misy.

Ary toe-javatra mahafinaritra be dia be no mitranga rehefa manatona an’i Jesoa isika: salama ny vatana, sitrana ny fo maratra, miala ny tahotra, teraka ny fanantenana ary miala ny henatra sy fahafaham-batraka.

Noho izany, vonona ve isika ny hiantso amin’ny anarany ireo otantsika ary hamela an’i Jesoa hanala ny otantsika sy hanome fahafahana ho antsika? Mihoatra noho izany, mahatoky ve isika fa afaka manao an’izay amin’ny namantsika ihany koa i Jesoa? Raha izay ary dia vonona ve isika ny hanao izay fomba rehetra ahafantaran’ny namantsika an’i Jesoa?