Moa very fotoana ve ianao rehefa mivavaka?

Andro farany tamin'ny fialan-tsasatro tamin'izay, ary sendra nijery vetivety ny mailako aho mba hahitana izay miandry ahy. Oay, tena tsy tokony ho nanao izany aho.

Nanomboka niasa saina ny amin’ny planina tokony ho ataoko, sady tonga saina tampoka hoe "Tsy ho vitako daholo ireo." Taorian'izay dia zara raha nankafy ilay andro aho, saingy soa ihany fa tsy ny mail-ko ihany no nosokafako fa ny bokiko fampaherezam-panahy koa. Teo, tamin’io andro io indrindra, hoy izy, "Mitadiava an’i Jehovah, dia ho velona ianareo…"!(Amosa 5:6).

Maniry fanampiana amin'ireo zavatra maro izay iandraiketanao ve ianao? Maniry ny hiaina anaty fiadanana amin'ny andavanandronao ve ianao, hiala amin’ny rotoroto sy ny fanantenana mba havita ny tokony atao rehetra?

Misy fomba ahafahana manatratra izany, fomba mahafinaritra: ny fombam-bavaka. Raha toa ahy ianao, dia mety hieritreritra hoe: "Oh, aiza indray koa no hananako fotoana hivavahana anio?" Afaka milaza aminao avy amin'ny foko aho (ary avy amin'ny traikefa koa): raha maka fotoana hivavahana ianao dia hahazo fotoana eo amin'ny fiainanao! :-)

Tena marina izany… raha maniry fiainana feno fiadanana ianao, fiainana tsy voafehin'ny adin-tsaina, dia mila izany fotoana mangina hifandraisana amin'i Jesosy izany.

Mety hoy ianao amin’ny voalohany hoe: “Lany andro aho”, nefa tsy ho ela dia ho tsapanao fa tena mahazo tombony ianao rehefa mandany fotoana miaraka amin’Andriamanitra! Ny fifaliany. Ny fiadanany. Ny valinteniny. Ny fitiavany. Ny fanampiany. Ny heriny. Ny faharetany

Mahafinaritra! Tena tia ny vavaka ataonao Izy satria te-handany fotoana miaraka aminao fotsiny Izy. Eny, ianao! Ary amin’izay fotoana izay dia tsy hanala fotoana aminao Izy—dia hanome anao fotoana sy fiainana!

Andramo anie izany androany e! :-)

Fahagagana ianao!

Déborah

Fanamarihana: Ny lahatsoratra amin'ity vakiteny ity dia avy amin'ny mailaka isan'andro “Fahagagana isan’andro”. Raha te hahazo mailaka isan'andro ianao dia manasa anao hisoratra anarana ao amin'ny Fahagagana isan’andro.