Andinin-tSoratra Masina malaza indrindra nalaina tao amin'ny Isaia 43

Hizara

Indro, Izaho efa hanao zava-baovao, Koa ankehitriny dia efa miposaka izany; Tsy hahalala izany va hianareo? Eny, any an-efitra no hanaovako làlana Ary any amin’ny tany lao no hasiako ony

Raha mita ny rano hianao, dia homba anao Aho; Ary raha mita ny ony hianao, dia tsy hanafotra anao izy; Raha mandeha mamaky ny afo hianao, dia tsy ho may, Ary tsy hirehitra aminao ny lelafo

Aza mahatsiaro ny lasa, Na misaina ny taloha.

Fa ankehitriny, ry Jakoba ô, izao no lazain’i Jehovah, Izay nahary anao Sady namorona anao, ry Isiraely ô: Aza matahotra hianao, fa efa nanavotra anao Aho; Efa niantso ny anaranao Aho, Ahy hianao.

Satria malala eo imasoko hianao, Eny, be voninahitra hianao sady tiako, Dia olona no omeko ho solonao, Ary firenena ho solon’ny ainao.

Fa Izaho Jehovah no Andriamanitrao, Dia ny Iray Masin’ny Isiraely, Mpamonjy anao; Omeko ho avotrao Egypta, Ary Etiopia sy Seba ho solonao.

Aza mahatahotra, fa momba anao Aho; Hitondra ny taranakao avy any atsinanana Aho, Ary avy any andrefana no hanangonako anao

Izaho dia Izaho no mamono ny fahadisoanao noho ny amin’ny tenako, Ary tsy hotsarovako ny fahotanao.

Hianareo no vavolombeloko, hoy Jehovah, sady mpanompoko izay efa nofidiko, Mba hahafantaranareo sy hinoanareo Ahy Ka ho azonareo tsara fa Izaho no Izy; Talohako dia tsy nisy andriamanitra voaforona, Sady tsy hisy handimby Ahy.

Izaho dia Izaho ihany no Jehovah, Ary tsy misy Mpamonjy afa-tsy Izaho.

Eny, hatramin’izany andro izany Izaho no Izy, Ary tsy misy maharombaka amin’ny tànako; Miasa Aho, ka iza moa no mahasakana izany?

Dia hanome voninahitra Ahy ny bibi-dia Sy ny amboadia ary ny ostritsa, Satria manisy rano any an-efitra Sy ony any amin’ny tany lao Aho, Hampisotroana ny oloko, dia ilay voafidiko. Izao olona noforoniko ho Ahy izao No hanambara ny fiderana Ahy.

Ny avaratra hilazako hoe: Avoahy, Ary ny atsimo hoe: Aza hazonina, Alao ny zanako-lahy avy lavitra Sy ny zanako-vavy avy any amin’ny faran’ny tany, Dia izay rehetra antsoina amin’ny anarako Sady noariko ho voninahitro, Dia izay noforoniko sy nataoko.

Izao no lazain’i Jehovah, Izay manao làlana eny amin’ny ranomasina Sy làlan-kaleha eny amin’ny rano manonja, Izay mamoaka ny kalesy sy ny soavaly, Ny miaramila sy ny lehilahy mahery– Miara-mandry avokoa izy ka tsy hiarina intsony, Mitsilopilopy izy, ka dia maty toy ny jiro

Izaho no Jehovah, Iray Masinareo, Mpamorona ny Isiraely sady Mpanjakanareo.