Awˬ hkuiˉ puiˍ ve li‸ 39
39
Yoˇseh‸ leh Pawˇtiˇhpaˍ miˇ ma
1Iˉshaˍmeˍlaˆ chaw hui lehˬ, Yoˇseh‸ hta‸ Eˇjiˇtu‸ mvuhˇmiˬ lo shiˍ veu laˇ leh, jawˇmawˇ ve hawˉ yehˬ hta‸ ha‸ shaˉ shehˍ hpaˇ ma‸ poˍ lonˉ Pawˇtiˆhpaˍ hta‸ hawˇ piˇ ve yoˬ. 2Gʼuiˬsha Yoˇseh‸ geh chehˇ taˍ leh, yawˇ te ve kanˉ teˇ hpaˍ hta‸ uiˍ la da‸ la piˇ ve yoˬ. Yawˇ lehˬ, yawˇ ve awˬ shehˍ hpaˇ Eˇjiˇtu‸ chaw ve yehˬ hkʼaw chehˇ taˍ ve yoˬ. 3Yawˇ geh Gʼuiˬsha chehˇ leh, yawˇ te ve kanˉ teˇ ceuˬ le le uiˍ la da‸ la chehˇ ve hta‸ awˬ shehˍ hpaˇ oˇ ve gʼa mawˬ ve yoˬ. 4Hkʼe te leh, Pawˇtiˆhpaˍ lehˬ Yoˇseh‸ hta‸ nyi ma cawˇ leh, yawˇ ve yehˬ hkʼaw cawˬ ve mawˇ jeˬ hkʼa peu-eˬ ve hta‸ nyi ha‸ shaˉ shehˍ hpaˇ te tcuh ve yoˬ. 5Oˇ ve teˇ nyi hta‸ te leh, Gʼuiˬsha lehˬ Yoˇseh‸ hta‸ pa taw Eˇjiˇtu‸ chaw oˇ ve yehˬ hta‸ maˇ kʼoˆ, yawˇ ve ti mi hta‸ maˇ kʼoˆ, awˬ bon na‸ piˇ ve yoˬ. 6Pawˇtiˆhpaˍ lehˬ, yawˇ ve yehˬ kʼa awˬ pon te‸ chiˉ maˇ kʼaw‸ dawˇ nyi ve yoˬ. Yawˇ caˇ ve caˇ tuˬ maˇ heˆ kʼo, kanˉ hkʼa peu-eˬ Yoˇseh‸ ve la‸ sheh hkʼaw lo chiˇ a‸ piˇ taˍ ve yoˬ.
7Yoˇseh‸ lehˬ awˬ hkiˇ awˬ naˬ da‸ ve pa taw, yawˇ ve yehˬ shehˍ ma yawˇ hta‸ hkʼawˇ faˍ leh, yawˇ geh ca zuh‸ la tuˬ kʼoˆ piˇ ve yoˬ. 8Ya‸ hkʼaˇ yawˇ kʼoˆ ve, Ngaˬ ve awˬ shehˍ hpaˇ ve awˬ lawn dawˇ nyi sheˬ. Yawˇ lehˬ, yawˇ ve yehˬ kʼa awˬ pon te‸ chiˉ maˇ dawˇ nyi-o. Yawˇ hkʼa cawˬ ve mawˇ jeˬ hkʼa peu-eˬ ngaˬ hta‸ chiˇ a‸ laˇ taˍ ve yoˬ. 9Ngaˬ ve awˬ shehˍ hpaˇ teˇ gʼaˇ maˇ heˆ kʼo, yehˬ chi hkʼaw ngaˬ a‸ kehˉ uiˍ ve chaw maˇ cawˬ. Nawˬ teˇ gʼaˇ maˇ heˆ kʼo, yawˇ ngaˬ hta‸ maˇ chiˇ a‸ laˇ ve awˬ ceuˬ teˇ ceuˬ ka‸ maˇ cawˬ. Ngaˬ lehˬ, hkʼaˬ hkʼe te cha‸ chiˆ ve kanˉ chi hkʼe ve hta‸ te leh, Gʼuiˬsha hta‸ te ya‸ hpeh‸ tuˬ le, teh‸ kʼaw‸ kʼoˆ piˇ ve yoˬ. 10Yawˇ ve yehˬ shehˍ ma lehˬ, teˇ nyi le le yawˇ hta‸ oˇ hkʼe tiˉ ca kʼoˆ la ve htawˇ, Yoˇseh‸ lehˬ yawˇ geh maˇ ca zuh‸ piˇ.
11Teˇ nyi htaˇ, yehˬ hkʼaw lo chaw teˇ gʼaˇ ka‸ maˇ chehˇ ve teˇ yanˇ, Yoˇseh‸ lehˬ kanˉ te tuˬ yawˇ ve awˬ shehˍ hpaˇ ve yehˬ lo kʼai ve yoˬ. 12Oˇ htaˇ, yehˬ shehˍ ma lehˬ yawˇ ve aˉ po‸ hta‸ tcuhˆ tiˍ taˍ leh, Laˬ-o‸. Ngaˬ geh ca zuh‸ la, teh‸ yawˇ hta‸ kʼoˆ piˇ ve yoˬ. Oˇ htaˇ, yawˇ ve aˉ po‸ hta‸ yawˇ ve yehˬ shehˍ ma ve la‸ sheh hkʼaw baˬ taˉ leh gʼuiˇ hpaw-e ve yoˬ. 13Yawˇ ve aˉ po‸ hta‸ oˇ hkʼe baˬ taˉ leh gʼuiˇ hpaw-e ve hta‸ yehˬ shehˍ ma gʼa mawˬ htaˇ, 14yawˇ ve awˬ ceˬ teˇ hpaˍ hta‸ kuˬ leh, Nawˬ hui-o, haˆ nyi la-o. Ngaˬ ve awˬ hpawˇ ca teh taˍ ve Heˍbrehˇ chaw chi lehˬ, ngaˬ hta‸ maˇ shawˍ maˇ caˆ te laˇ ve yoˬ. Yawˇ lehˬ ngaˬ geh ca zuh‸ la tuˬ ngaˬ ve bawehˇ hkʼaw lo‸ la ve pa taw, ngaˬ gʼaˇ hte‸ kuˬ ve yoˬ. 15Yawˇ lehˬ ngaˬ kuˬ hkawˇ hta‸ kaˇ ve teˇ yanˇ, yawˇ ve aˉ po‸ hta‸ baˬ taˉ leh gʼuiˇ tawˆ-e ve yoˬ, teh‸ kʼoˆ ve yoˬ.
16Hkʼe te leh, yawˇ ve awˬ hpawˇ aˉ hkʼaw lo kʼaw‸ gaˬ la htaˇ hkʼa gaˬ, aˉ po‸ oˇ ve hta‸ yawˇ geh lo teh taˍ ve yoˬ. 17Yawˇ ve awˬ hpawˇ kʼaw‸ gaˬ la htaˇ, hpeh‸ la peuˬ ve awˬ lawn hkʼa peu-eˬ yawˇ hta‸ kʼoˆ maˍ piˇ leh kʼoˆ ve, Nawˬ shiˍ teh taˍ ve Heˍbrehˇ chaw oˇ ve ngaˬ ve bawehˇ hkʼaw laˬ leh ngaˬ hta‸ maˇ shawˍ maˇ caˆ te laˇ ve yoˬ. 18Ya‸ hkʼaˇ, ngaˬ gʼaˇ hte‸ kuˬ ve pa taw, yawˇ ve aˉ po‸ hta‸ baˬ taˉ leh gʼuiˇ hpaw-e ve yoˬ, teh‸ kʼoˆ piˇ ve yoˬ.
19Oˇ htaˇ, Yoˇseh‸ ve awˬ shehˍ hpaˇ lehˬ Yoˇseh‸ hta‸ nyi ma zuhˆ jaˇ ve yoˬ. 20Hkʼe te leh, yawˇ Yoˇseh‸ hta‸ hpeh leh jawˇmawˇ ve htawnˍ hkʼaw keu taˍ ve yoˬ. 21Ya‸ hkʼaˇ, Gʼuiˬsha Yoˇseh‸ geh chehˇ leh yawˇ hta‸ awˬ bon na‸ piˇ ve pa taw, htawnˍ awˬ hoˉ yawˇ hta‸ nyi ma cawˇ ve yoˬ. 22Hkʼe te leh, htawnˍ awˬ hoˉ lehˬ yawˇ hta‸ htawnˍ yaˇ hkʼa peu-eˬ hkʼoˆ awˬ hoˉ te tcuh leh, htawnˍ hkʼaw te tuˬ cawˬ ve kanˉ hkʼa peu-eˬ Yoˇseh‸ hta‸ chiˇ a‸ piˇ ve yoˬ. 23Htawnˍ awˬ hoˉ oˇ ve lehˬ, htawnˍ hta‸ caˉ da‸ ve kanˉ teˇ hpaˍ hta‸ yawˇ maˇ gʼa kʼaw‸ nyi-o. Awˬ lawn kʼo, Gʼuiˬsha Yoˆseh‸ geh chehˇ taˍ leh, yawˇ te ve kanˉ teˇ ceuˬ le le ve hta‸ uiˍ la da‸ la piˇ chehˇ ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
