Awˬ hkuiˉ puiˍ ve li‸ 38
38
Yuˇda‸ leh Taˍmaˍ
1Awˬ yanˇ oˇ ve awˬ hkʼaw lo, Yuˇda‸ lehˬ yawˇ ve awˬ viˉ awˬ nyi teˇ hpaˍ geh tawˆ kʼai leh, Hiˇraˆ teh‸ kʼoˆ ve Aˍduˆlanˍ venˇ yaˇ geh ca chehˇ kʼai ve yoˬ. 2Oˇ kaˬ lo yawˇ Hkaˍnaˍniˆ chaw Shuˇ-aˍ ve yaˇ miˇ teˇ gʼaˇ hta‸ mawˬ leh yawˇ hta‸ heuˆ ve yoˬ. 3Hkʼe te leh, yaˇ miˇ oˇ ve yaˇ paˍ teˇ gʼaˇ paw la leh yawˇ hta‸ Eˇraˆ teh‸ meh piˇ ve yoˬ. 4Yaˇ miˇ oˇ ve yaˇ paˍ teˇ gʼaˇ kʼaw‸ paw la leh yawˇ hta‸ Awˇnanˍ teh‸ meh piˇ ve yoˬ. 5Oˇ ve hkʼaw‸ nawˉ, yaˇ miˇ oˇ ve yaˇ paˍ teˇ gʼaˇ kʼaw‸ paw la leh yawˇ hta‸ Sheˍlaˆ teh‸ meh piˇ ve yoˬ. Yaˇ paˍ oˇ ve paw la htaˇ, Yuˇda‸ lehˬ Aˍhkaˍziˆ venˇ hkʼaw chehˇ taˍ ve yoˬ.
6Yuˇda‸ lehˬ, yawˇ ve yaˇ paˍ Eˇraˆ awˬ pon, Taˍmaˍ teh‸ kʼoˆ ve awˬ miˇ ma teˇ gʼaˇ ca piˇ ve yoˬ 7Ya‸ hkʼaˇ, Eˇraˆ lehˬ haiˬ jaˇ ve pa taw Gʼuiˬsha yawˇ ve a sha‸ hta‸ yuˬ hkʼaw‸ sheˬ ve yoˬ. 8Oˇ htaˇ, Yuˇda‸ yawˇ ve yaˇ paˍ Awˇnanˍ hta‸ kʼoˆ piˇ ve, Nawˬ viˉ paˍ miˇ ma hta‸ heuˆ loˬ. Oˇ hkʼe te ve hkʼaw, nawˬ viˉ paˍ ve awˬ ceuˬ awˬ hkʼaˇ cawˬ la piˇ-oˆ, teh‸ kʼoˆ piˇ ve yoˬ. 9Awˇnanˍ lehˬ, yawˇ yaˇ gʼa ve htawˇ yawˇ ve yaˇ teh‸ maˇ gʼa shawˍ ve hta‸ shiˍ ve pa taw, yawˇ yaˇ miˇ oˇ ve geh ca zuh‸ ve teˇ pawˆ le le yawˇ ve awˬ yawˇ yaˇ miˇ oˇ ve awˬ hkʼaw lo maˇ keu piˇ. Miˬ chaˇ hkʼoˆ lo sheˆ kʼai piˇ lawˬ ve yoˬ. 10Yawˇ oˇ hkʼe te ve hta‸ Gʼuiˬsha nyi ma maˇ cawˇ ve pa taw, yawˇ hta‸ htawˇ Gʼuiˬsha yuˬ hkʼaw‸ sheˬ ve yoˬ. 11Oˇ htaˇ, Yuˇda‸ yawˇ ve awˬ hkuiˇ ma Taˍmaˍ hta‸ kʼoˆ piˇ ve, Ngaˬ yaˇ paˍ Sheˍlaˆ uiˍ la htaˇ hkʼa gaˬ nawˬ pa ve yehˬ hkʼaw mehˇchawˇma ca te chehˇ taˍ-o‸, teh‸ kʼoˆ piˇ ve yoˬ. Awˬ lawn kʼo, yawˇ ve awˬ viˉ paˍ teˇ hpaˍ hkʼa shuˍ Sheˍlaˆ htawˇ suh-e la ve hta‸ Yuˇda‸ kawˆ ve pa taw, chi hkʼe kʼoˆ piˇ ve yoˬ. Hkʼe te leh, Taˍmaˍ lehˬ yawˇ awˬ pa ve yehˬ lo ca kʼaw‸ chehˇ taˍ ve yoˬ.
12Awˬ hkʼaw‸ awˬ yanˇ maw la htaˇ, Yuˇda‸ ve awˬ miˇ ma htawˇ suh kʼai ve yoˬ. Yuˇda‸ lehˬ, yawˇ ve awˬ miˇ ma awˬ pon dawˇ haˍ ve awˬ yanˇ ponˬ kʼai peuˬ hkʼaw‸ nawˉ, yawˇ ve awˬ chawˇ Aˍduˆlanˍ venˇ yaˇ Hiˇraˆ geh teˇ geh yawˬ mvuh ca nuˆ tuˬ Tiˉmaˍnaˆ venˇ lo kʼai ve yoˬ. 13Taˍmaˍ lehˬ, yawˇ ve awˬ puˍ yawˬ mvuh nuˆ tuˬ Tiˉmaˍnaˆ venˇ lo kʼai ve awˬ hkawˇ hta‸ gʼa kaˇ ve teˇ yanˇ, 14yawˇ lehˬ mehˇchawˇma ve veu‸ kʼaˇ hta‸ kʼehˆ baˬ leh, yawˇ ve mehˆ hpfuhˇ hta‸ uˉ nyiˉ teˇ maˬ yuˬ beh taˍ ve yoˬ. Peuˬ hkʼaw‸ nawˉ, yawˇ lehˬ Tiˉmaˍnaˆ venˇ lo kʼai ve ya‸ kʼaw ceh lo ca mui taˍ ve yoˬ. Awˬ lawn kʼo, chi teˇ yanˇ Sheˍ laˆ uiˍ la peuˬ ve htawˇ yawˇ awˬ puˍ yawˇ hta‸ maˇ heuˆ tcuh ve pa taw yoˬ.
15Yuˇda‸ lehˬ, yaˇ miˇ oˇ ve mehˆ hpfuhˇ hta‸ uˉ nyiˉ beh taˍ ve hta‸ gʼa mawˬ ve pa taw, yaˇ miˇ oˇ ve lehˬ meh maˬ lanˉ hpeh‸ ve yoˬ, teh‸ dawˇ ve yoˬ. 16Hkʼe te leh yawˇ yaˇ miˇ oˇ ve awˬ paˇ lo kʼai leh, Nawˬ awˬ hpfuhˇ hkʼaˬ ma lawˬ gaˇ ve le, teh‸ yawˇ hta‸ kʼoˆ piˇ ve yoˬ. (Yaˇ miˇ oˇ ve yawˇ ve awˬ hkuiˇ ma hpeh‸ ve hta‸ yawˇ maˇ shiˍ.)
Oˇ htaˇ yaˇ miˇ kʼoˆ ve, Nawˬ ngaˬ hta‸ aˬ hto‸ ma piˇ laˇ tuˬ le, teh‸ kʼoˆ ve yoˬ.
17Yawˇ kʼaw‸ kʼoˆ ve, Ngaˬ nawˬ hta‸ aˉ che‸ ehˉ teˇ hkeh piˇ laˇ tuˬ yoˬ, teh‸ kʼoˆ piˇ ve yoˬ. Yaˇ miˇ oˇ ve lehˬ, Aˉ che‸ ehˉ oˇ ve maˇ piˇ laˇ sheˬ gʼuˇ suhˍ, shaˉ hkiˆ hpeh‸ tuˬ ngaˬ hta‸ mawˇ teˇ ceuˬ ceuˬ piˇ taˍ laˇ hpeh‸-aw laˇ, teh‸ na nyi ve yoˬ.
18Yawˇ lehˬ, Hkʼaˬ hkʼe ve mawˇ gʼa piˇ laˇ tuˬ le, teh‸ kʼaw‸ na nyi ve teˇ yanˇ, yaˇ miˇ lehˬ, Nawˬ ve kʼawˍ peˍ pfuhˇ caˆ leh nawˬ ve juˇ fuiˍ taˬ ngaˬ hta‸ piˇ taˉ laˇ-oˆ, teh‸ kʼoˆ piˇ ve yoˬ. Yaˇ miˇ lawˬ ve hkʼe, mawˇ oˇ ve teˇ hpaˍ yawˇ hta‸ piˇ leh yawˇ geh zuh‸ ve yoˬ. Hkʼe te leh, yaˇ miˇ oˇ ve yaˇ hu la ve yoˬ. 19Oˇ htaˇ, Taˍmaˍ aˉ hkʼaw kʼo‸-e leh uˉ nyiˉ kʼehˆ baˬ peuˬ hkʼaw‸ nawˉ, mehˇchawˇma ve veu‸ kʼaˇ hta‸ kʼaw‸ veuˬ taˍ ve yoˬ.
20Yuˇda‸ lehˬ, yaˇ miˇ oˇ ve hta‸ piˇ taˉ ve mawˇ hta‸ ca kʼaw‸ pa hkʼaw‸ tuˬ, yawˇ ve awˬ chawˇ Hiˆranˍ hta‸ aˉ che‸ ehˉ teˇ hkeh piˇ leh kʼai tcuh ve yoˬ. Hiˆranˍ lehˬ yaˇ miˇ oˇ ve hta‸ ca maˇ mawˬ. 21Hkʼe te leh, oˇ kaˬ lo chehˇ ve chaw teˇ hpaˍ hta‸ na nyi leh kʼoˆ ve, Choˬ kaˬ ya‸ kʼaw hpuiˇ lo mui chehˇ ve meh maˬ lanˉ hkʼaˬ lo kʼai le, teh‸ na nyi ve yoˬ.
Yawˇ hui lehˬ, Choˬ kaˬ lo meh maˬ lanˉ teˇ gʼaˇ ka‸ maˇ cawˬ, teh‸ kʼaw‸ yaw hkʼaw‸ piˇ ve yoˬ. 22Hkʼe te leh yawˇ Yuˇda‸ geh kʼaw‸ kʼo‸-e leh, yawˇ yaˇ miˇ oˇ ve hta‸ ca maˇ mawˬ ve awˬ lawn leh, oˇ kaˬ lo meh maˬ lanˉ teˇ gʼaˇ ka‸ maˇ cawˬ ve awˬ lawn yawˇ hta‸ hto piˇ ve yoˬ.
23Oˇ htaˇ Yuˇda‸ kʼoˆ ve, Yaˇ miˇ oˇ ve ngaˬ ve mawˇ hta‸ yuˬ taˍ piˇ-oˆ. Ngaˬ huiˉ maˬ ve awˬ meh ka‸ maˇ luˬ tcuh gaˇ. Ngaˬ yawˇ hta‸ awˬ hpfuhˇ piˇ gaˇ ve yoˬ. Ya‸ hkʼaˇ, nawˬ yaˇ miˇ oˇ ve hta‸ ca maˇ mawˬ, teh‸ kʼoˆ ve yoˬ.
24Oˇ ve hkʼaw‸ nawˉ ha pa shehˆ maˬ hkʼe gaˬ htaˇ, yawˇ ve awˬ hkuiˇ ma Taˍmaˍ lehˬ meh maˬ lanˉ hkʼe te chehˇ ve awˬ lawn leh, yawˇ yaˇ hu taˍ peuˬ ve awˬ lawn shu Yuˇda‸ hta‸ ca hto piˇ la ve yoˬ.
Oˇ htaˇ Yuˇda‸ lehˬ, Yawˇ hta‸ shiˍ tawˆ la leh aˬ miˍ tuˉ pehˍ-o‸, teh‸ kʼoˆ ve yoˬ.
25Shu yawˇ hta‸ shiˍ tawˆ la ve teˇ yanˇ, Taˍmaˍ lehˬ kʼaw‸ peˍ pfuhˇ caˆ leh juˇ fuiˍ taˬ hta‸ yawˇ ve awˬ puˍ geh yuˬ kʼai tcuh leh, Mawˇ chi teˇ hpaˍ ve awˬ shehˍ hpaˇ hta‸ pa taw ngaˬ yaˇ hu la ve yoˬ. Mawˇ chi teˇ hpaˍ lehˬ, a shu ve mawˇ hpeh‸ ve hta‸ nyi-o, teh‸ kʼoˆ leh shanˍ feu piˇ ve yoˬ.
26Mawˇ oˇ ve teˇ hpaˍ hta‸ Yuˇda‸ mawˬ ve teˇ yanˇ, Yawˇ te ve lehˬ cawˇ ve yoˬ. Chi hkʼe hpeh‸ la ve lehˬ, ngaˬ yaˇ paˍ Sheˍlaˆ yawˇ hta‸ maˇ heuˆ tcuh ve pa taw yoˬ, teh‸ kʼoˆ ve yoˬ. Yawˇ lehˬ awˬ hkʼaw‸ nawˉ yaˇ miˇ oˇ ve geh maˇ kʼaw‸ zuh‸ ve yoˬ.
27Oˇ ve hkʼaw‸ nawˉ Taˍmaˍ yaˇ paw yanˇ gaˬ la leh, yawˇ ve gʼoˇ peˬ hkʼaw yaˇ nyiˇ gʼaˇ chehˇ taˍ ve hta‸ gʼa shiˍ ve yoˬ. 28Yaˇ paw la ve teˇ yanˇ, yaˇ teˇ gʼaˇ lehˬ yawˇ ve la‸ sheh che tawˆ peu laˇ ve yoˬ. Oˇ htaˇ yaˇ paw piˇ shehˍ ma lehˬ, Chi ve teˇ gʼaˇ awˉ lawˉ tawˆ la ve yoˬ, teh‸ kʼoˆ leh, yawˇ ve la‸ sheh hta‸ nyiˉ-ehˍ ve gʼo‸ hkeh yuˬ hpeh piˇ ve yoˬ. 29Ya‸ hkʼaˇ, yaˇ chi lehˬ yawˇ ve la‸ sheh kʼaw‸ gʼawˬ hkʼaw‸ sheˬ leh, awˬ nu ve teˇ gʼaˇ paw tawˆ la ve yoˬ. Oˇ htaˇ yaˇ paw piˇ shehˍ ma lehˬ, Hkʼaˬ hkʼe le. Nawˬ awˉ lawˉ pe‸ tawˆ la ve yoˬ teh‸ kʼoˆ ve yoˬ. Hkʼe te leh, yawˇ hta‸ Hpaˍrehˆ#38:29 Chi lehˬ pe‸ tawˆ la ve teh‸ kʼoˆ gaˇ ve yoˬ teh‸ meh piˇ ve yoˬ. 30Oˇ ve hkʼaw‸ nawˉ, la‸ sheh hta‸ gʼo‸ hkeh nyiˉ-ehˍ hpeh taˍ ve teˇ gʼaˇ kʼaw‸ paw tawˆ la leh, yawˇ hta‸ Zeˍraˆ #38:30 Chi lehˬ nyiˉ-ehˍ ve teh‸ kʼoˆ gaˇ ve yoˬ teh‸ meh piˇ ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
