Awˬ hkuiˉ puiˍ ve li‸ 37
37
Yoˇseh‸ leh yawˇ ve awˬ viˉ paˍ teˇ hpaˍ
1Yaˍkoˆ lehˬ, yawˇ awˬ pa chehˇ kuiˬ Hkaˍnanˍ mvuhˇmiˬ hkʼaw chehˇ taˍ ve yoˬ. 2Chi ve lehˬ, Yaˍkoˆ ve yaˇ teˇ hpaˍ ve awˬ lawn hpeh‸ ve yoˬ.
Yoˇseh‸ a sha‸ teˇ chi suhˍ hkʼaw‸ gaˬ ve teˇ yanˇ, yawˇ awˬ pa ve awˬ miˇ ma i Biˇlaˍhaˍ leh Ziˇlaˍpaˆ hui ve yaˇ teˇ hpaˍ geh teˇ geh ceˇ hawˉ kuiˬ lo kʼai leh, yawˇ hui te ve maˇ da‸ ve kanˉ teˇ hpaˍ yawˇ awˬ pa hta‸ ca kʼaw‸ hto maˍ piˇ ve yoˬ.
3Yaˍkoˆ lehˬ, a sha‸ mawˇ la htaˇ heh‸ yaˇ paˍ Yoˇseh‸ hta‸ gʼa ve pa taw, awˬ nu ve yaˇ teˇ hpaˍ a‸ kehˉ Yoˇseh‸ hta‸ yawˇ leuˉ leh ha‸ ve yoˬ. Chi pa taw, yawˇ hta‸ aˉ po‸ zuhˬ maˬ tawˉ feuˉ piˇ taˍ ve yoˬ. 4Yawˇ hui ve awˬ pa lehˬ, yawˇ hui a‸ kehˉ Yoˇseh‸ hta‸ leuˉ leh ha‸ ve hta‸ yawˇ hui gʼa mawˬ ve teˇ yanˇ, yawˇ hui yawˇ hta‸ nyi bawˬ jaˇ leh shawˍ baˬ taˍ piˇ ve yoˬ.
5Teˇ pawˆ htaˇ, Yoˇseh‸ zuh‸ maˆ teˇ maˬ mawˬ leh, yawˇ ve awˬ viˉ paˍ teˇ hpaˍ hta‸ kʼoˆ maˍ piˇ ve teˇ yanˇ, yawˇ hui yawˇ hta‸ leuˉ leh kʼaw‸ nyi bawˬ jaˇ ve yoˬ. 6Yawˇ kʼoˆ ve, Ngaˬ zuh‸ maˆ mawˬ ve nawˬ hui hta‸ a ciˉ hto laˇ shaˍ. 7Teˇ nyi htaˇ, ngaˬ hui lehˬ ti mi hkʼaw caˬ kʼa‸ teˇ hpaˍ hta‸ tsuh‸ hpoˆ chehˇ taˍ ve yoˬ. Oˇ htaˇ, ngaˬ ve caˬ kʼa‸ lehˬ hteˇ lehˬ huˉ sheˬ leh, nawˬ hui ve caˬ kʼa‸ teˇ hpaˍ ngaˬ ve caˬ kʼa‸ hkʼa caw zuhˇ lo chehˇ taˍ leh oˉ kʼoˍ ga hpoˆ pui ve yoˬ, teh‸ yawˇ hui hta‸ kʼoˆ piˇ ve yoˬ.
8Oˇ htaˇ yawˇ ve awˬ viˉ teˇ hpaˍ kʼoˆ ve, Teˇ nyi gaˬ kʼo nawˬ lehˬ ngaˬ hui awˬ hkʼoˆ jawˇmawˇ te leh gʼa uˉ peunˍ tuˬ yoˬ teh‸ dawˇ ve laˇ, teh‸ yawˇ hta‸ kʼoˆ piˇ ve yoˬ. Yawˇ zuh‸ maˆ ve leh, yawˇ yaw ve tawˇ teˇ hpaˍ hta‸ pa taw, yawˇ hui yawˇ hta‸ leuˉ leh kʼaw‸ nyi bawˬ ve yoˬ.
9Oˇ ve hkʼaw‸ nawˉ Yoˇseh‸ lehˬ, awˬ nu ve zuh‸ maˆ teˇ maˬ hta‸ kʼaw‸ mawˬ leh yawˇ ve awˬ viˉ paˍ teˇ hpaˍ hta‸ kʼaw‸ hto maˍ piˇ ve yoˬ. Yawˇ kʼoˆ ve, Ngaˬ zuh‸ maˆ teˇ maˬ hta‸ gʼa kʼaw‸ mawˬ ve yoˬ. Mvuhˇ nyi ha pa leh meu‸ keu shiˍ teˇ chi teˇ shiˍ ngaˬ hta‸ oˉ kʼoˍ pui laˇ ve hta‸ ngaˬ gʼa mawˬ ve yoˬ, teh‸ kʼoˆ ve yoˬ.
10Awˬ lawn chi, yawˇ ve awˬ pa hta‸ htawˇ hto piˇ ve teˇ yanˇ yawˇ ve awˬ pa lehˬ, Nawˬ zuh‸ maˆ ve chi hkʼaˬ hkʼe le. Ngaˬ leh nawˬ e maˇ kʼoˆ, nawˬ viˉ paˍ teˇ hpaˍ maˇ kʼoˆ, nawˬ mehˆ gʼuˇ suhˍ lo laˬ leh nawˬ hta‸ oˉ kʼoˍ gʼa pui tuˬ ve laˇ, teh‸ kʼoˆ leh deˇ piˇ ve yoˬ. 11Yawˇ ve awˬ viˉ paˍ teˇ hpaˍ lehˬ, yawˇ hta‸ hkawehˉ ve nyi ma hkʼa biˇ cawˬ ve yoˬ. Ya‸ hkʼaˇ, yawˇ ve awˬ pa lehˬ awˬ lawn oˇ ve hta‸ hkʼaˬ htaˆ ka‸ dawˇ nyi chehˇ ve yoˬ.
Yoˇseh‸ hta‸ hawˇ baˬ ve awˬ lawn
12Teˇ nyi htaˇ, Yoˇseh‸ ve awˬ viˉ paˍ teˇ hpaˍ lehˬ ceˇ ca hawˉ tuˬ Sheˍhkenˍ venˇ hpawˇ lo kʼai ve yoˬ. 13Oˇ htaˇ, Yaˍkoˆ yawˇ ve yaˇ paˍ Yoˇseh‸ hta‸ kʼoˆ piˇ ve, Nawˬ viˉ paˍ teˇ hpaˍ lehˬ Sheˍhkenˍ venˇ lo ceˇ ca hawˉ kʼai taˍ peuˬ. Ngaˬ nawˬ hta‸ yawˇ hui geh kʼai tcuh gaˇ ve yoˬ, teh‸ kʼoˆ piˇ htaˇ yawˇ lehˬ,
Ngaˬ kʼai tuˬ gu taˍ ve yoˬ, teh‸ kʼaw‸ kʼoˆ piˇ ve yoˬ.
14Oˇ htaˇ yawˇ awˬ pa lehˬ, Kʼai loˬ. Nawˬ viˉ paˍ hui chehˇ sha chehˇ leh naˍ, yawˬ teˇ hpaˍ htawˇ gawˬ lehˍ gʼa chehˇ leh naˍ, ca nyi taˉ leh ngaˬ hta‸ kʼaw‸ hto laˇ-oˆ, teh‸ yawˇ hta‸ kʼoˆ piˇ ve yoˬ. Hkʼe te leh, yawˇ lehˬ Yoˇseh‸ hta‸ Heˍbronˍ venˇ hkʼaw tawˆ kʼai tcuh ve yoˬ.
15Ya‸ kʼaw kʼaˉ lo yawˇ chaw teˇ gʼaˇ hta‸ hpuˇ da‸ ve yoˬ. Chaw oˇ ve lehˬ, Nawˬ aˬ hto‸ ma ca toˇ ve le, teh‸ yawˇ hta‸ na nyi ve yoˬ.
16Yoˇseh‸ kʼoˆ ve, Ngaˬ lehˬ ngaˬ viˉ paˍ teˇ hpaˍ hta‸ ca nyi toˇ ve yoˬ. Yawˇ hui ceˇ hkʼaˬ lo hawˉ chehˇ ve nawˬ ngaˬ hta‸ hto laˇ hpeh‸-aw laˇ, teh‸ kʼoˆ piˇ ve yoˬ.
17Chaw oˇ ve kʼaw‸ kʼoˆ ve, Yawˇ hui choˬ kaˬ lo tawˆ kʼai peuˬ. Yawˇ hui Dawˇtanˍ venˇ hpawˇ lo kʼai tuˬ jehˬ da‸ chehˇ ve awˬ hkawˇ hta‸ ngaˬ gʼa kaˇ ve yoˬ, teh‸ yawˇ hta‸ kʼoˆ piˇ ve yoˬ. Hkʼe te leh, Yoˇseh‸ yawˇ ve awˬ viˉ paˍ teˇ hpaˍ hkʼaˇ suh gʼa‸ kʼai leh, Dawˇtanˍ venˇ paˇ lo yawˇ hui hta‸ gʼa mawˬ ve yoˬ.
18Yawˇ vuiˇ kuiˬ lo laˬ chehˇ ve hta‸ yawˇ hui gʼa mawˬ ve teˇ yanˇ, yawˇ hui yawˇ hta‸ tiˇ pehˍ tuˬ hkʼawˇ jehˬ da‸ ve yoˬ. 19Yawˇ hui kʼoˆ ve, Nyi loˬ. Zuh‸ maˆ paˍ laˬ chehˇ ve yoˬ. 20Laˬ-o‸. Ngaˬ hui yawˇ hta‸ tiˇ pehˍ leh iˉ kaˆ maˇ cawˬ ve nanˬ bawˍ teˇ maˬ hkʼaw baˬ keu-a veuˬ. Yawˇ hta‸ haiˬ ve to nuˇ to shaˆ che‸ caˇ ve yoˬ, teh‸ ngaˬ hui kʼoˆ hpeh‸ ve yoˬ. Oˇ hkʼe te ve hkʼaw, yawˇ zuh‸ maˆ oˇ ve hkʼaˬ hkʼe hpeh‸ kʼai tuˬ leh naˍ law nyi taˍ-a veuˬ, teh‸ kʼoˆ da‸ ve yoˬ.
21Tawˇ oˇ ve teˇ hpaˍ hta‸ Ruˇbenˍ gʼa kaˇ htaˇ, yawˇ hui Yoˇseh‸ hta‸ maˇ gʼa tiˇ pehˍ tuˬ tawˍ taˍ leh kʼoˆ ve, Yawˇ hta‸ taˇ tiˇ pehˍ. 22Naˬ tuˬ ka‸ taˇ te piˇ. Choˬ kaˬ heh puiˉ hkʼaw lo cawˬ ve nanˬ bawˍ chi ve hkʼaw yawˇ hta‸ yuˬ keu piˇ taˍ-a veuˬ, teh‸ kʼoˆ piˇ ve yoˬ. Yawˇ lehˬ, Yoˇseh‸ hta‸ yawˇ hui ve la‸ sheh hkʼaw ponˬ piˇ leh yawˇ ve awˬ pa geh kʼaw‸ kʼo‸-e peu gaˇ ve pa taw, chi hkʼe kʼoˆ ve yoˬ. 23Yoˇseh‸ yawˇ ve awˬ viˉ paˍ teˇ hpaˍ geh gaˬ la ve teˇ yanˇ, yawˇ hui lehˬ yawˇ deh taˍ ve aˉ po‸ zuhˬ ma oˇ ve hta‸ kʼehˆ yuˬ leh, yawˇ hta‸ nanˬbawˍ hkʼaw yuˬ keu taˍ ve yoˬ. 24Nanˬbawˍ oˇ ve hkʼaw iˉ kaˆ maˇ cawˬ.
25Oˇ hkʼe te peuˬ hkʼaw‸ nawˉ, yawˇ hui awˍ caˇ chehˇ ve teˇ yanˇ, Iˉshaˍmeˍlaˆ chaw tanˇ kaˬ paˍ teˇ hpaˍ leh sha hawnˉ leh suhˆ tcuhˇ teˇ hpaˍ kaˍlaˍoˆ hkʼoˆ taˆ leh, Giˇlaˆ mvuhˇmiˬ lo tu leh Eˇjiˇtu‸ mvuhˇmiˬ lo kʼai chehˇ ve hta‸ gʼa mawˬ ve yoˬ. 26Oˇ htaˇ Yuˇda‸ lehˬ, Ngaˬ hui ve awˬ nyi paˍ hta‸ tiˇ pehˍ leh faˉ taˍ ve lehˬ ngaˬ hui awˬ pon aˬ hto‸ ma awˬ bon cawˬ le. 27Yawˇ hta‸ yuˬ tawˆ leh Iˉshaˍmeˍlaˆ chaw hui hta‸ hawˇ piˇ-a veuˬ. Yawˇ hta‸ naˬ tuˬ te‸ chiˉ taˇ te piˇ. Awˬ lawn kʼo, yawˇ lehˬ ngaˬ hui ve awˬ nyi paˍ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ. Yawˇ hui hkʼa peu-eˬ yawˇ kʼoˆ ve hta‸ nyi ma cawˇ ve yoˬ. 28Hkʼe te leh, Meˇdiˍanˍ chaw tanˇ kaˬ paˍ teˇ hpaˍ yawˇ hui awˬ paˇ lo gaˬ la ve teˇ yanˇ, yawˇ hui Yoˇseh‸ hta‸ nanˬ bawˍ hkʼaw gʼawˬ tawˆ leh, Iˉshaˍmeˍlaˆ chaw hui hta‸ nyiˇ chi hteh‸ hawˇ piˇ ve yoˬ. Chaw oˇ ve teˇ hpaˍ lehˬ Yoˇseh‸ hta‸ Eˇjiˇtu‸ mvuhˇmiˬ lo shiˍ kʼai ve yoˬ.
29Oˇ ve hkʼaw‸ nawˉ, Ruˇbenˍ lehˬ nanˬbawˍ hkʼaw ca kʼaw‸ nyi leh Yoˇseh‸ hta‸ maˇ mawˬ ve teˇ yanˇ, yawˇ ve aˉ po‸ hta‸ tzuh‸ suhˍ leh yawˇ ve awˬ nyi paˍ teˇ hpaˍ geh kʼai ve yoˬ. 30Yawˇ kʼoˆ ve, Yaˇ paˍ oˇ kaˬ lo maˇ chehˇ-o law. Ngaˬ hkʼaˬ hkʼe gʼa te tuˬ le, teh‸ kʼoˆ ve yoˬ.
31Oˇ htaˇ, yawˇ hui aˉ che‸ teˇ hkeh hta‸ tiˇ pehˍ leh, yawˇ ve aˉ po‸ hta‸ awˬ suhˍ hkʼaw tuˍ keu ve yoˬ. 32Peuˬ leh yawˇ hui aˉ po‸ zuhˬ ma oˇ ve hta‸ yawˇ hui ve awˬ pa geh yuˬ kʼaw‸ la leh kʼoˆ ve, Ngaˬ hui aˉ po‸ chi hta‸ gʼa mawˬ ve yoˬ. Chi ve nawˬ yaˇ paˍ ve aˉ po‸ maˇ heˆ laˇ, teh‸ yawˇ hta‸ kʼoˆ piˇ ve yoˬ.
33Yaˍkoˆ lehˬ aˉ po‸ oˇ ve hta‸ gʼa mawˬ htaˇ, Chi ve lehˬ ngaˬ yaˇ paˍ ve aˉ po‸ hpeh‸ ve yoˬ. Haiˬ ve to nuˇ to shaˆ yawˇ hta‸ che‸ caˇ peuˬ. Yoˇseh‸ lehˬ to nuˇ to shaˆ che‸ tzuh‸ ve hta‸ gʼa hkanˍ peuˬ, teh‸ kʼoˆ ve yoˬ. 34Oˇ htaˇ, Yaˍkoˆ yawˇ ve aˉ po‸ hta‸ tzuh‸ suhˍ leh meh htuˉ pui hpa veu‸ deh peuˬ hkʼaw‸ nawˉ, yawˇ ve yaˇ paˍ awˬ pon awˬ yanˇ maw chaweh dawˇ haˍ leh hawˬ chehˇ ve yoˬ. 35Yawˇ ve yaˇ paˍ yaˇ miˇ teˇ hpaˍ yawˇ hta‸ nyi ma sha la tuˬ ga hpoˆ te piˇ ve htawˇ, yawˇ nyi ma sha la maˇ gʼa. Yawˇ kʼoˆ ve, Ngaˬ lehˬ ngaˬ yaˇ paˍ awˬ pon dawˇ haˍ leh suh mvuhˇmiˬ lo gʼa kʼai tuˬ yoˬ, teh‸ kʼoˆ ve yoˬ. Hkʼe te leh, yawˇ Yoˇseh‸ awˬ pon dawˇ haˍ leh gʼaˇ hte‸ hawˬ ve yoˬ.
36Awˬ yanˇ oˇ ve hkʼaw, Meˇdiˍanˍ chaw teˇ hpaˍ lehˬ Yoˇseh‸ hta‸ jawˇmawˇ ve hawˉ yehˬ hta‸ shaw shehˍ hpaˇ ma‸ poˍ lonˉ Pawˇtiˇhpaˍ hta‸ hawˇ piˇ ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
