Awˬ hkuiˉ puiˍ ve li‸ 40
40
Yoˇseh‸ zuh‸ maˆ tcuhˉ kuiˬ yuˬ tawˆ piˇ ve
1Oˇ ve hkʼaw‸ nawˉ, Eˇjiˇtu‸ jawˇmawˇ hta‸ a pehˉ meuˇ gʼuiˬ keu taw piˇ shehˍ hpaˇ leh, jawˇmawˇ hta‸ caˇ tuˬ te caˍ piˇ shehˍ hpaˇ chaw chi nyiˇ gʼaˇ jawˇmawˇ hta‸ te ya‸ ve yoˬ. 2Hkʼe te leh, jawˇmawˇ chaw oˇ ve nyiˇ gʼaˇ hta‸ nyi ma zuhˆ leh, 3yawˇ huiˉ maˬ hta‸ Yoˇseh‸ chehˇ taˍ kuiˬ htawnˍ hkʼaw yuˬ keu ve yoˬ. 4Htawnˍ awˬ hoˉ htawˇ, yawˇ huiˉ maˬ hta‸ nyi ha‸ shaˉ tuˬ Yoˇseh‸ ve la‸ sheh hkʼaw chiˇ a‸ piˇ ve yoˬ. Yawˇ huiˉ maˬ htawnˍ hkʼaw chehˇ ve a ciˉ maw la peuˬ ve yoˬ.
5Teˇ haˉ htaˇ, jawˇmawˇ hta‸ a pehˉ meuˇ gʼuiˬ keu taw piˇ shehˍ hpaˇ leh jawˇmawˇ hta‸ caˇ tuˬ te caˍ piˇ shehˍ hpaˇ oˇ ve nyiˇ gʼaˇ gʼaˇ, zuh‸ maˆ teˇ gʼaˇ teˇ ceuˬ mawˬ ve yoˬ. 6Mvuhˇ htiˇ la leh Yoˇseh‸ yawˇ huiˉ maˬ geh laˬ ve teˇ yanˇ, yawˇ huiˉ maˬ nyiˇ gʼaˇ gʼaˇ mehˆ hpfuhˇ nawˍ lehˍ cawˬ ve hta‸ yawˇ gʼa mawˬ ve yoˬ. 7Hkʼe te leh yawˇ kʼoˆ ve, Aˬ hto‸ ma pa taw, nawˬ huiˉ maˬ dawˇ haˍ chehˇ ve le, teh‸ na nyi ve yoˬ.
8Yawˇ huiˉ maˬ kʼoˆ ve, Ngaˬ huiˉ maˬ zuh‸ maˆ teˇ gʼaˇ teˇ ceuˬ gʼa mawˬ ve yoˬ. Ya‸ hkʼaˇ, ngaˬ huiˉ maˬ hta‸ tcuhˉ kuiˬ kʼoˆ ma laˇ paˍ maˇ cawˬ, teh‸ kʼoˆ piˇ ve yoˬ. Yoˇseh‸ kʼaw‸ kʼoˆ ve, Gʼuiˬsha ceh tiˉ tcuhˉ kuiˬ yuˬ tawˆ laˇ gʼa ve yoˬ. Nawˬ huiˉ maˬ gʼa mawˬ ve zuh‸ maˆ oˇ ve ngaˬ hta‸ hto laˇ-oˆ, teh‸ kʼoˆ piˇ ve yoˬ.
9Oˇ htaˇ, jawˇmawˇ hta‸ a pehˉ meuˇ gʼuiˬ keu taw piˇ shehˍ hpaˇ kʼoˆ ve, Ngaˬ zuh‸ maˆ ve hkʼaw, awˬ kʼaˉ shehˆ kʼaˉ cawˬ ve a pehˉ meuˇ te teˇ te hta‸ ngaˬ gʼa mawˬ ve yoˬ. 10Teˇ hkui gaˬ leh, awˬ kʼaˉ oˇ ve teˇ hpaˍ awˬ hkʼoˆ lo awˬ hpa‸ naw‸ la leh awˬ veˆ veˆ la peuˬ hkʼaw‸ nawˉ, a pehˉ meuˇ shiˍ naw‸ la ve yoˬ. 11Oˇ htaˇ, ngaˬ ve la‸ sheh hkʼaw jawˇmawˇ ve kawˆ cawˬ taˍ ve yoˬ. Hkʼe te leh, ngaˬ a pehˉ meuˇ shiˍ oˇ ve teˇ hpaˍ hta‸ shaˉ leh kawˆ oˇ ve hkʼaw nyiˉ keu peuˬ hkʼaw‸ nawˉ, jawˇmawˇ hta‸ ca taw piˇ ve yoˬ, teh‸ kʼoˆ piˇ ve yoˬ.
12Yoˇseh‸ yawˇ hta‸ kʼoˆ piˇ ve, Nawˬ gʼa mawˬ ve zuh‸ maˆ oˇ ve tcuhˉ kuiˬ chi hkʼe yoˬ. Awˬ kʼaˉ oˇ ve shehˆ kʼaˉ lehˬ, shehˆ nyi hta‸ kʼoˆ gaˇ ve yoˬ. 13Shehˆ nyi ponˬ peuˬ hkʼaw‸ nawˉ, jawˇmawˇ nawˬ hta‸ htawnˍ hkʼaw yuˬ tawˆ leh, nawˬ te jaw ve kanˉ awˬ piˍ nawˬ hta‸ kʼaw‸ chiˇ a‸ laˇ tuˬ yoˬ. Oˇ htaˇ, nawˬ lehˬ ponˬ laˇ htaˇ hkʼa shuˍ, jawˇmawˇ hta‸ a pehˉ meuˇ gʼuiˬ gʼa kʼaw‸ chiˇ taw piˇ tuˬ yoˬ. 14Nawˬ lehˬ kanˉ awˬ piˍ oˇ ve hta‸ kʼaw‸ gʼa ve teˇ yanˇ, ngaˬ hta‸ a ciˉ dawˇ nawˇ laˇ-oˆ. Ngaˬ ve awˬ lawn jawˇmawˇ hta‸ hto piˇ leh, ngaˬ htawnˍ hkʼaw gʼa tawˆ-e tuˬ a ciˉ te laˇ-oˆ. 15Awˬ lawn kʼo, ngaˬ lehˬ Heˍbrehˇ chaw hui ve mvuhˇmiˬ hkʼaw shu nyiˉ hpeh veu laˇ ve hta‸ gʼa hkanˍ ve chaw hpeh‸ ve yoˬ. Mvuhˇmiˬ chi hkʼaw ngaˬ te‸ chiˉ te ya‸ kuiˬ maˇ cawˬ ve htawˇ, ngaˬ lehˬ htawnˍ hkʼaw gʼa chehˇ taˍ ve yoˬ, teh‸ yawˇ hta‸ kʼoˆ piˇ ve yoˬ.
16Jawˇmawˇ hta‸ caˇ tuˬ te caˍ piˇ shehˍ hpaˇ lehˬ, Yoˇseh‸ zuh‸ maˆ ve hta‸ nyi hkʼaˇ suh law‸ law‸ tcuhˉ kuiˬ yuˬ tawˆ gʼa ve hta‸ gʼa mawˬ ve teˇ yanˇ, yawˇ Yoˇseh‸ hta‸ kʼoˆ piˇ ve, Ngaˬ htawˇ zuh‸ maˆ teˇ maˬ gʼa mawˬ ve yoˬ. Ngaˬ ve oˉ kʼoˍ hkʼoˆ hpuˉ-ehˍ ve hkaoˍmonˇ keu taˍ ve hkʼawˍ lawˇ shehˆ shiˍ cawˬ ve yoˬ. 17Awˬ hta‸ leh leh ve hkʼawˍ lawˇ hkʼaw, jawˇmawˇ caˇ tuˬ ve hkaoˍmonˇ laiˉ ceuˬ keu taˍ leh, ngaˆ teˇ hpaˍ hkaoˍmonˇ oˇ ve teˇ hpaˍ hta‸ htawˆ caˇ ve yoˬ, teh‸ kʼoˆ piˇ ve yoˬ.
18Yoˇseh‸ kʼoˆ ve, Nawˬ gʼa mawˬ ve zuh‸ maˆ oˇ ve tcuhˉ kuiˬ chi hkʼe yoˬ. Hkʼawˍ lawˇ oˇ ve shehˆ shiˍ lehˬ, shehˆ nyi hta‸ kʼoˆ gaˇ ve yoˬ. 19Shehˆ nyi ponˬ peuˬ hkʼaw‸ nawˉ, jawˇmawˇ nawˬ hta‸ htawnˍ hkʼaw yuˬ tawˆ leh, suhˆ hkuiˉ daw hkʼoˆ lo hpeh chiˇ tuˬ yoˬ. Oˇ htaˇ, ngaˆ teˇ hpaˍ nawˬ ve awˬ shaˍ hta‸ ga hpoˆ htawˆ caˇ tuˬ yoˬ, teh‸ yawˇ hta‸ kʼo piˇ ve yoˬ.
20Oˇ ve hkʼaw‸ nawˉ shehˆ nyi gaˬ ve teˇ yanˇ, jawˇmawˇ lehˬ yawˇ paw nyi kʼaw‸ gaˬ la ve pa taw, yawˇ ve a ma‸ lonˉ teˇ hpaˍ geh teˇ geh hti caˇ hti dawˬ ve pawehˇ lonˉ teˇ maˬ te ve yoˬ. Yawˇ hta‸ a pehˉ meuˇ gʼuiˬ keu taw shehˍ hpaˇ leh, yawˇ hta‸ caˇ tuˬ te caˍ shehˍ hpaˇ hta‸ htawˇ kuˬ yuˬ ve yoˬ. 21Oˇ htaˇ, yawˇ hta‸ a pehˉ meuˇ gʼuiˬ keu taw piˇ shehˍ hpaˇ hta‸ yawˇ ve kanˉ awˬ piˍ kʼaw‸ chiˇ a‸ piˇ ve yoˬ. 22Ya‸ hkʼaˇ, yawˇ hta‸ caˇ tuˬ te caˍ piˇ shehˍ hpaˇ hta‸, suhˆ hkuiˉ daw hkʼoˆ lo hpeh chiˇ piˇ ve yoˬ. Yoˇseh‸ kʼoˆ taˍ ve hkʼe hpeh‸ la ve yoˬ. 23Ya‸ hkʼaˇ, jawˇmawˇ hta‸ a pehˉ meuˇ gʼuiˬ keu taw piˇ shehˍ hpaˇ oˇ ve lehˬ, Yoˇseh‸ hta‸ maˇ kʼaw‸ dawˇ nawˇ-o. Yawˇ hta‸ leunˇ kʼai ve yoˬ.
Lahu Bible Edited © Thailand Bible Society and Bible Society of Myanmar, 2010, 2020.
