ទាញយកកម្មវិធីអ្នកជាមនុស្សជាទីស្រឡាញ់គំរូ
បានត្រាស់ហៅឱ្យមកស្រឡាញ់ព្រះនិងស្រឡាញ់អ្នកដទៃ
ចូរឲ្យមានសេចក្តីស្រឡាញ់ឥតពុតមាយា ចូរស្អប់អ្វីដែលអាក្រក់ ហើយប្រកាន់ខ្ជាប់អ្វីដែលល្អ (រ៉ូម ១២៖៩)
ព្រះយេស៊ូវបានសង្ខេបក្រឹត្យវិន័យនៃសម្ពន្ធមេត្រីចាស់ជាច្រើន ក្រោមសេចក្ដីបង្គាប់បញ្ជាយ៉ាងដូច្នេះថា ឱ្យស្រឡាញ់ព្រះជាម្ចាស់ឱ្យអស់ពីដួងចិត្តរបស់យើង ហើយសេចក្ដីបង្គាប់ទីពីរ នោះគឺថា ត្រូវឱ្យស្រឡាញ់អ្នកជិតខាងរបស់យើង ឱ្យបានដូចជាស្រឡាញ់ខ្លួនឯង (ម៉ាថាយ ២២៖៣៧-៤០)។ ពាក្យថា "អ្នកជិតខាង" នៅក្នុងអត្ថបទគម្ពីរ គឺមិនមានដែនកំណត់ត្រឹមតែអ្នកមានភូមិផងរបងជាមួយនឹងអ្នកនោះទេ។ អ្នកជិតខាងរបស់អ្នក គឺជានរណាក៏ដោយ ដែលអ្នកជួប ឬអាចជះឥទ្ធិពលទៅលើគេបាន។ វាជារឿងងាយស្រួលណាស់ក្នុងការស្រឡាញ់ខ្លួនឯង។ យើងត្រៀមនឹងមើលរំលងកំហុសខុសឆ្គងរបស់ខ្លួន ហើយផ្ដោតតែទៅលើទង្វើល្អដែលយើងធ្វើតែប៉ុណ្ណោះ។ វាពិបាកជាងក្នុងការឱ្យយើងស្រឡាញ់ដល់អ្នកដទៃ។
ប្រសិនបើយើងពិតជាឱបក្រសោបបានយ៉ាងពិតចំពោះក្ដីស្រឡាញ់នៃព្រះ ហើយយល់ជ្រាបច្បាស់ពីដំណឹងល្អ នោះយើងនឹងប៉ងប្រាថ្នា ប្រឹងចែករំលែកនូវក្ដីស្រឡាញ់នោះជាមួយនឹង មនុស្សគ្រប់រូប តាមតែយើងអាចធ្វើទៅបាន។ អត្ថបទគម្ពីរសម្រាប់ថ្ងៃនេះ មានសេចក្ដីបង្គាប់បញ្ជាជាច្រើន ដែលផ្ដល់ជាឧទាហរណ៍ពីរបៀបដែលយើងអាចបង្ហាញពីក្ដីស្រឡាញ់ ការអត់ឱនទោស និងព្រះគុណទៅដល់មនុស្សដទៃផ្សេងទៀត។ តើមានសេចក្ដីបង្គាប់បញ្ជាណា ដែលអ្នកគិតថាព្រះកំពុងតែដាក់ជាសំណួរ ដើម្បីឱ្យអ្នកយកទៅអនុវត្ត នៅក្នុងការប្រាស្រ័យទាក់ទងរបស់អ្នកជាមួយនឹងអ្នកដទៃនៅថ្ងៃនេះ?
មុននឹងយើងចាប់ផ្ដើមរកលេស ចូរកុំភ្លេចថាព្រះយេស៊ូវបានស្ដាប់បង្គាប់ ហើយធ្វើតាមរហូតដល់ទ្រង់ត្រូវសុគត ហើយសូម្បីតែការសុគតនៅលើឈើឆ្កាងផង ដើម្បីបង្ហាញយើងអំពីក្ដីស្រឡាញ់នេះ។ ចូរកុំភ្លេចថាព្រះជាម្ចាស់បានត្រាស់ហៅគ្រីស្ទបរិស័ទគ្រប់រូបឱ្យរស់នៅដូចជាយញ្ញបូជាដ៏រស់ (រ៉ូម ១២៖១)! វាមិនមែនជារឿងងាយស្រួលទេក្នុងការស្រឡាញ់ចំពោះអ្នកដទៃ ប៉ុន្តែការនេះហើយ គឺជាអ្វីជាក់លាក់ដែលព្រះសព្វព្រះទ័យចង់បានពីយើង។ ចូរចាប់ផ្ដើមដោយការអធិស្ឋានសម្រាប់អ្នកដទៃ ហើយព្រះជាម្ចាស់នឹងធ្វើឱ្យកំហឹងរបស់អ្នកបានធូរស្រាល ឱ្យអ្នកបានត្រជាក់ចិត្ត ហើយជួយឱ្យអ្នកអាចយកឈ្នះទៅលើលេសទាំងឡាយ និងបើកទ្វារចំហសម្រាប់ឱ្យអ្នកអាចបង្ហាញ និងចែករំលែកពីក្ដីស្រឡាញ់របស់ព្រះគ្រីស្ទ។
ក្នុងខណៈពេលដែលអ្នកអធិស្ឋាន ចូរទូលសូមដល់ព្រះ ដែលទ្រង់គឺជាព្រះពេញដោយក្ដីស្រឡាញ់ ដើម្បីជួយឱ្យអ្នកអាចស្រឡាញ់ដល់អ្នកដទៃ។
យើងខ្ញុំសង្ឃឹមថាគម្រោងអាននេះបានលើកទឹកចិត្តដល់អ្នក។ សម្រាប់ព័ត៌មានបន្ថែមទៅលើគម្រោងអានបន្ថែមទៀត ពីអ្នកនិពន្ធ ឌូអេន ឡូយណេស (Duane Loynes) ចូរអ្នកស្វែងរុករកពីធនធានស្របតាមព្រះគម្ពីរនៅឯ ព័ន្ធកិច្ច ព្រះបន្ទូលនៃក្ដីសង្ឃឹម។
អត្ថបទគម្ពីរ
អំពីគម្រោងអាននេះ
ព្រះជាម្ចាស់ស្រឡាញ់អ្នក។ មិនថាអ្នកជានរណា នៅទីកន្លែងណានៅក្នុងជីវិតរបស់អ្នកនោះឡើយ។ ព្រះជាម្ចាស់ទ្រង់ស្រឡាញ់អ្នក! នៅក្នុងខែនេះ នៅពេលដែលយើងអបអរពីក្ដីស្រឡាញ់ ចូរកុំភ្លេចថាក្ដីស្រឡាញ់នៃព្រះសម្រាប់អ្នក នោះគឺធំជាងក្ដីស្រឡាញ់ណាៗទាំងអស់។ នៅក្នុងមេរៀនជាខ្សែក្នុងរយៈពេល ៤ ថ្ងៃនេះ ចូរជ្រមុជខ្លួនអ្នកចូលទៅក្នុងក្ដីស្រឡាញ់នៃព្រះ។
More
