ទាញយកកម្មវិធីការចាត់ចែងពេលវេលាតាមព្រះគំរូ
រស់នៅដោយចេញពីអត្តសញ្ញាណ មិនមែនសម្រាប់អត្តសញ្ញាណ
ចរិតលក្ខណៈមនុស្សដែលអ្នកជឿ នោះកំណត់ពីអ្វីដែលអ្នកធ្វើ ហើយនិងពីរបៀបដែលអ្នកមានអារម្មណ៍ចំពោះអ្វីដែលអ្នកធ្វើ។ ព្រះជាម្ចាស់សព្វព្រះទ័យឱ្យយើងប្រើប្រាស់ពេលវេលារបស់យើង ចេញពី ទីនៃអត្តសញ្ញាណ ជាជាង សម្រាប់ អត្តសញ្ញាណ ដើម្បីឱ្យយើងអាចមានសន្តិសុខពេញលេញនៅក្នុងព្រះអង្គ។
ការនេះតម្រូវឱ្យយើងមានគោលគំនិតផ្លាស់ប្រែទាក់ទងទៅនឹងអត្តសញ្ញាណរបស់យើង៖
- ភាពមិនច្បាស់លាស់ ទៅជា ច្បាស់លាស់
- ការសម្អាងដោយតែសំបកក្រៅ ទៅជា មានចរិតលក្ខណៈពីខាងក្នុង
- ការពឹងផ្អែកតែតាមគេ ទៅជា ជាក់ច្បាស់ដោយសេចក្ដីពិត
សេចក្ដីកុហកពីលោកិយប្រាប់ថាអត្តសញ្ញាណរបស់យើង នោះវាមិនច្បាស់លាស់ ហើយគេថាវាអាចបាត់បង់ ឬប្រែប្រួល នៅពេលណា គ្រាណាក៏បាន។ សេចក្ដីពិតចេញពីព្រះបន្ទូលនៃព្រះ នោះគឺថា អត្តសញ្ញាណរបស់យើងគឺមានពិតច្បាស់លាស់នៅក្នុងអង្គព្រះគ្រីស្ទ។ ដូចក្នុង កាឡាទី ៣៖២៦ មានចែងថា៖ «ដ្បិតនៅក្នុងព្រះគ្រីស្ទយេស៊ូវ អ្នករាល់គ្នាសុទ្ធតែជាកូនរបស់ព្រះ តាមរយៈសេចក្ដីជំនឿ»។
សេចក្ដីកុហកពីលោកិយប្រាប់ថាអត្តសញ្ញាណរបស់យើង គឺកំណត់ដោយអ្វីៗមាននៅឯសំបកក្រៅ—ដូចជារូបរាងសម្លៀកបំពាក់ រាល់អ្វីយើងមានជាកម្មសិទ្ធិ ឬតំណែងនិងឋានៈដែលខ្លួនមាន។ សេចក្ដីពិតចេញពីព្រះបន្ទូលនៃព្រះ នោះគឺថា អ្វីៗដែលយើងមានជាកម្មសិទ្ធិនៅខាងក្នុងយើង នោះគឺតាមរយៈអង្គព្រះគ្រីស្ទ ហើយអ្វីៗទាំងនោះគឺសំខាន់ជាង។ កូឡុស ៣៖១២ ចែកចាយមកថា អ្វីៗនៅខាងក្នុង ដែលជាចរិតលក្ខណៈរបស់យើង គួរតែជាគ្រឿងប្រដាប់កាយខាងក្រៅរបស់យើង៖ «ដូច្នេះ ដោយព្រោះព្រះបានជ្រើសរើសអ្នករាល់គ្នាជាប្រជារាស្រ្តបរិសុទ្ធ និងស្ងួនភ្ងារបស់ព្រះអង្គ ចូរប្រដាប់កាយដោយចិត្តក្តួលអាណិត សប្បុរស សុភាព ស្លូតបូត ហើយអត់ធ្មត់ចុះ»។
សេចក្ដីកុហកពីលោកិយប្រាប់ថាអត្តសញ្ញាណរបស់យើង គឺពឹងផ្អែកទៅលើការប្រៀបធៀប មិនថាជាយើង "ល្អប្រសើរជាង" ឬ "អាក្រក់ជាង" មនុស្សនៅជុំវិញខ្លួនយើងនោះទេ។ ប៉ុន្តែសេចក្ដីពិតចេញពីព្រះបន្ទូលនៃព្រះ គឺជាភាពជាក់លាក់ពិតប្រាកដ ហើយការវិនិច្ឆ័យនិងប្រៀបធៀបចេញពីលោកិយ នោះពុំមានន័យអ្វីចំពោះព្រះជាម្ចាស់ឡើយ។ ភីលីព ២៖៣-៤ បានថ្លែងក្នុងរបៀបយ៉ាងដូច្នេះថា៖ «កុំឲ្យធ្វើអ្វី ដោយប្រកួតប្រជែង ឬដោយអំនួតឥតប្រយោជន៍ឡើយ តែចូរដាក់ខ្លួន ហើយចាត់ទុកថាគេប្រសើរជាងខ្លួនវិញ។ កុំឲ្យម្នាក់ៗស្វែងរកតែប្រយោជន៍ផ្ទាល់ខ្លួនឡើយ គឺត្រូវស្វែងរកប្រយោជន៍សម្រាប់អ្នកដទៃផង»។
ក្នុងខណៈពេលអ្នកគិតអំពីរបៀបដែលអ្នកនឹងចំណាយពេលរបស់អ្នក នោះចូរគិត ថាតើអ្នកបានធ្លាប់ធ្លាក់ទៅក្នុងអន្ទាក់នៃការគិតអំពីអត្តសញ្ញាណរបស់ខ្លួន ដោយភាពមិនច្បាស់លាស់ គិតតែពីសំបកក្រៅ ឬពឹងផ្អែកតែតាមគេ ដែរឬយ៉ាងណា?
ប្រសិនជាអញ្ចឹងមែន តើអ្នកអាចចាប់ផ្ដើមគិតផ្ទុយពីនេះ អំពីអត្តសញ្ញាណរបស់អ្នក ហើយនិងផ្ដើមធ្វើការសម្រេចចិត្តជ្រើសរើសប្រើប្រាស់ពេលវេលារបស់អ្នក ដោយគិតពីការទាំងនោះចេញពីទីដែលអ្នកមានសន្តិសុខក្នុងព្រះជាម្ចាស់ ដោយរបៀបណា?
អត្ថបទគម្ពីរ
អំពីគម្រោងអាននេះ
ការចាត់ចែងពេលវេលាតាមបែបប្រពៃណី នោះអាចនាំឱ្យកើតមានភាពតានតឹង នៅពេលដែលគោលដៅនោះ គ្រាន់តែដើម្បីឱ្យជីវិត "ស្ថិតក្រោមការគ្រប់គ្រង" ដោយកម្លាំងនិងការលត់ដំផ្ទាល់ខ្លួនរបស់យើង។ ប៉ុន្តែព្រះគម្ពីរប្រាប់ដល់យើង ថាយើងអាចទទួលបានភាពសុខសាន្តនិងការសម្រាកវិញ នៅពេលណាយើងទុកចិត្តព្រះជាមួយនឹងពេលវេលារបស់យើង។ នៅក្នុងគម្រោងអានរយៈពេល ៦ ថ្ងៃនេះ អ្នកនឹងរៀនពីយុទ្ធសាស្រ្ត ដែលចាត់ទុកព្រះជាចំណុចស្នូលកណ្ដាល ក្នុងរបៀបចាត់ចែងពេលវេលា ដែលនាំអ្នកឱ្យទៅទទួលបានរាល់ការល្អដែលព្រះអង្គមានសម្រាប់អ្នក បូករួមទាំងអំណរនិងភាពសុខសាន្តរបស់ព្រះអង្គផង។
More
