Alụmdi na Nwunye dịka Chineke si ZubeIhe Atụ

Iṅomi Kraịst

Ihe ọgụgụ nke taa bụ akụkọ na-ekwu ihe mere tupu nzukọ mbụ nke Adam na nwunye ya, Iv. Chineke wara Adam ahụ nke bụ iwa ahụ mbụ n’akụkọ ihe mere eme. Ọ mere ka Adam daa n’oke ụra, meghee obi ya, wepụ otu ngụgụ wee kee nwaanyị. Adam arụghị ọrụ ọbụla n’usoro ahụ; Chineke enye ya onye kwesịrị ya, nke dabara adaba, na onye ya na ya ga na-akpakọrịta. Mgbe Adam sitere n’oke ụra ahụ dị kà à gà-asị na ọ nwụrụ anwụ teta, o jiri abụ wee zaghachi: obi dị ya ụtọ izute nwunye ya, ọkpụkpụ sitere n'ọkpụkpụ ya na anụ ahụ sitere n'anụ ahụ ya!

Ụzọ e si kee Iv kwesịrị ịrịba ama. Adam tụfuru akụkụ onwe ya dị oké ọnụ ahịa, ma site n’ihe funahuru ya, nwunye ya abịa. Ihe funahụrụ ya dugara n’onyinye mara mma nke wetaara ya ngọzi dị ukwuu. Ihe ndịa mere n’ogige Iden na-egosipụta etú Jizọs si nabata nwunye ya, bụ Nzukọ nsọ. Dị ka Chineke sì meghee akụkụ Adam iji wepụ ǹgụ̀gụ̀ ya, emeghere akụkụ Jizọs mgbe O ko n’elu obe. Ọ bụghị naanị ǹgụ̀gụ̀ ka Jizọs tụfuru. O tufuru ndụ ya iji nweta anyị.

Ma Adam ma Jizọs na-egosipụta àgwà iji onwe chụ àjà bụ nke dị na mmekọrịta alụmdi na nwunye. Nke a bụ ihe ịma aka nye ụmụ nwoke karịchasịa, ndị lụrụ nwunye maọbụ ndị ka na-achọ ịlụ alụ. Atụla anya na ị ga-enweta ọmarịcha onyinye alụmdi na nwunye a n’efu. A ga-enwe akụkụ onwe gị dị oké ọnụ ahịa nke ị ga-achụ n’àjà iji nweta alụmdi na nwunye nwere mmekọrịta chiri anya, nke dị n’otu nakwa nke na-adigide. Ịchụ onwe onye n’àjà abụghị ihe a na-eme otu ugboro mgbe mbụ unu lụsịrị di na nwunye; o kwesịrị ịdị na-aga n’iru n’alụmdi na nwunye ọbụla enwere obi ụtọ. Dị ka ndị di, dị ka ndị ndú, anyị kwesịrị ịdị ngwa ịtọgbọ ndụ anyị maka nwunye anyị.

N'ọtụtụ akụkụ nke Africa, a na-agwa ụmụ nwoke na ha bụ ndị ndu nke ezinaụlọ ha. Baịbụl mere ka o doo anya na di bụ onyeisi ezinaụlọ ya, ma nke ahụ apụtaghị na nwoke kwesịrị ịnọrọ ọdụ na-atụ anya ka a na-ejere ya ozi ehihie na abalị. Ịbụ onye isi pụtara na ị bụ onye mbụ na-ebute ụzọ n'oge ihe siri ike – n’ihe gbasara ego, mmekọrịta ọha na eze, mmetụta uche, mmekọrịta, maọbụ n'ihe gbasara usoro ezinụlọ.

Ọzọkwa, ebe a gụrụ taa mere ka o doo anya na nwoke na-ahapụ nne na nna ya ka e wee jikọọ ya na nwunye ya ọnụ n’udi ha enweghị ike igbasa, ọ bụghịkwa n'ụzọ ọzọ. Ọ bụrụ na nke a abụghị ihe a na-atụ anya ya n’omenala maọbụ n’obodo gị, ọ nwere ike dị mkpa na Ị ga-etinye ụfọdụ okè n’etiti gị na ezinaụlọ gị ma dị njikere gị na ha inwe mkparịta ụka siri ike.

Alụmdi na nwunye bụ njikọ nke na-ekekọta nwoke na nwaanyị n’udi ha abuo inyefe ibe ha ogologo ndu haa, ka ha na-eṅomi ụkpụrụ nke nwoke kachasị elu - Jizọs Kraịst - onye tọgbọrọ ndụ Ya maka nwunye Ya ma jikọta anyị n'onwe ya ruo mgbe ebighị ebi. Ọ dịghị mgbe ọ ga-ahapụ anyị maọbụ gbahapụ anyị. Anyị onwe anyị - ọkachasị ụmụ nwoke lụgoro nwunye - kwesịrị iwere ihe nlereanya a dị ka isi ihe mgbaru ọsọ anyị, iji bụrụ ngọzi bara ụba nye onyinye a mara mma nke Chineke nyere anyị na nwunye.