Ապրե՛ք զորությամբ և համարձակությամբՕրինակ

«Երկնքի դեսպանը՝ Սուրբ Հոգին»

Դեսպանը մի կառավարության պաշտոնական ներկայացուցիչն է՝ ուղարկված մեկ այլ կառավարություն, իր ժողովրդի մեջ ապրելու և խաղաղության ու բարի կամքի առաքելություն իրականացնելու համար։ Նա իրականացնում է իր պարտականություններն իր ներկայացրած կառավարության հեղինակությամբ, առատաձեռնությամբ և միջոցներով։ Իրեն տրված մեծագույն վստահությամբ նա իր խնդիրը կատարում է արժանապատվորեն և մինչև վերջ։

Շատ առումներով Սուրբ Հոգու առաքելությունը նման է երկնքից եկած դեսպանի առաքելությանը։ Սուրբ Հոգին մարմնավորում է Աստծո ամբողջ հեղինակությունը, զորությունն ու միջոցները և արտահայտում ու բացահայտում է Աստծո սերը երկրի վրա գնտվող յուրաքանչյուր մարդու համար՝ Իր ներկայությամբ և Իր աշխատանքով։

Քանի որ Հիսուսի՝ Իր աշակերտների հետ ունեցած ժամանակն իր ավարտին էր հասել, Նա զգուշացրեց նրանց, որ իրենք միայնակ չեն լինի, երբ Նա իրենց հետ չլինի։ Նա ասաց նրանց Մեկի մասին, ով կուղարկվեր Հիսուսի փոխարեն իրենց հետ լինելու համար, որպեսզի ուղղորդեր, ուսուցաներ, մխիթարեր և առաջնորդեր նրանց, այսինքն՝ Սուրբ Հոգու մասին։ Հիսուսն ասաց․

«Բայց ես ձեզ ճշմարիտն եմ ասում. ձեզ համար ավելի լավ է, որ ես գնամ, որովհետև եթե ես չգնամ, Մխիթարիչը ձեզ մոտ չի գա. իսկ եթե գնամ, նրան ձեզ մոտ կուղարկեմ»։

ՀՈՎՀԱՆՆԵՍ 16:7

Հիսուսի երկրային գործի ավարտից հետո Նա ուղարկեց Սուրբ Հոգին՝ Իր փոխարեն մեզ հետ լինելու, մինչ Նա կրկին կվերադառնար։ Սուրբ Հոգին իրականացնում է մեր կյանքում ուղղորդություն, առաջնորդություն, մխիթարություն և խնամակալություն։ Հիսուսն Իր աշակերտների համար Սուրբ Հոգուն այսպես նկարագրեց․

«Բայց Մխիթարիչը՝ Սուրբ Հոգին, որին Հայրն ուղարկելու է իմ անունով, նա ամեն բան ձեզ կուսուցանի ու կհիշեցնի ձեզ այն ամենը, ինչ ձեզ ասացի»։

ՀՈՎՀԱՆՆԵՍ 14:26

Աստծո ներկայությունն ամեն օր մեզ հետ է Սուրբ Հոգու տեսքով, և Նա ակտիվորեն գործում է մեր աշխարհում և մեր կյանքերում։