Ստացեք հավելվածըԱստծո խոստումները Քրիստոսին Տեր և Փրկիչ ընդունած զավակներինՕրինակ
Աստված կհատուցի քո կորցրած տարիները
Սիրելի՛ բարեկամ, երբևէ երազե՞լ ես ժամանակի մեքենայով կամ ինչ-որ մի հրաշքով վերադառնալ քո անցյալ, որպեսզի ուղղես քո թույլ տված սխալները, այլ որոշումներ կայացնես կամ պարզապես ևս մեկ անգամ վերապրես ուրախ ժամանակներդ։
«Եվ Ես ձեզ կհատուցեմ այն տարիները, որ կերան մորեխը, ջորյակը, ճիճուն և խառնիճը, Իմ այն մեծ զորքը, որ ուղարկեցի ձեր մեջ» (Հովել 2․25)։
Ժամանակն այնքան արագ է հոսում, որ մենք նույնիսկ չենք էլ նկատում, թե ինչպես են տարիներն անցնում։ Աշխատանքային, ընտանեկան և շատ այլ պարտականությունների ճնշման ներքո օրերն ու շաբաթներն ուղղակի թռչում են շնչակտուր արագությամբ։ Երբեմն այս խելահեղ մրցավազքի մեջ մենք մի կողմ ենք դնում մեր երբեմնի երազանքները, քանի որ ժամանակը երբեք չի բավականացնում դրանց իրագործմանը նվիրվելու համար։
Ես չգիտեմ՝ դու քանի տարեկան ես և ինչ երազանքներ ես ունեցել նախկինում։ Սակայն վստահաբար կարող եմ ասել, որ եթե մի պահ դադար վերցնես, առանձնանաս Տեր Աստծո հետ և կյանքդ դարձնես Նրա սահմանած ռիթմին համահունչ, ապա Աստված կարող է փոխհատուցել քո կորցրած ժամանակը։ Նա կարող է վերադարձնել քեզ այն տարիները, որոնք կորցրել ես անպտուղ վազվզուքի մեջ։
Դեռ ուշ չէ։ Աստծո հետ երբե՛ք ուշ չէ։ Եթե Նա քո մեջ դրել է որոշակի շնորհներ, կարողություններ ու պարգևներ, ապա դու դրանք առաջին հերթին Տեր Աստծո անվան փառքի համար պետք է գործածես։
Աստծո համար թանկ ու սիրելի՛ զավակ, հավատա՛ Տիրոջ այս խոստմանը։ Սկսի՛ր որոնել Աստծո երազանքը քո կյանքի համար։ Քա՛յլ արա դեպի քո երազանքների իրականացումը։ Եթե դու Քրիստոսի աշակերտն ես և երկնային Հոր զավակը, ապա երբե՛ք ուշ չէ նոր սկիզբ ունենալու համար։
Հիշի՛ր, որ դու Աստծո հրաշքն ես, և Աստված սիրում է քեզ։
Շնորհակալ եմ, որ դու կա՛ս։
Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։
Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։
Այս Ծրագրի Մասին
Երբևէ լսե՞լ ես, թե ինչպես է մայրը արձագանքում, երբ երեխան վայր է ընկնում ու սկսում լաց լինել, ինչպես է նա գրկում երեխային, ստուգում վնասվածքները և մխիթարում նրան։ Եթե դու էլ կյանքի քո ընթացքի մեջ վայր ընկել ու ցավից փոքր երեխայի պես ուզում ես լացել, ապա այս առավոտ առաջարկում եմ լսես, թե ինչ է քեզ ասում քո երկնային Հայրը․ «Իմ գրկում մնա․․․, ամեն բան կանցնի, ամեն բան լավ է լինելու…»։
More
Մենք ցանկանում ենք շնորհակալություն հայտնել hisus.am-ին այս պլանը տրամադրելու համար: Լրացուցիչ տեղեկությունների համար այցելեք՝ https://hisus.am/
