Ինչպե՞ս գտնել Աստծո ներկայությունը և լցվել ՆրանովՕրինակ

Դու ստեղծված ես Տեր Աստծո համար

Սիրելի՛ բարեկամ, գիտե՞ս արդյոք, որ դու հատուկ ստեղծված ես Աստծո ներկայության մեջ ապրելու համար:

Արարիչ Աստծո ներկայությունը մեր հոգու բնակավայրն է՝ քո սրտի խորանը: Նրա բարի ներկայությունը ամենահարմար վայրն է Նրա ձայնը լսելու, Նրա խոստումներն ընդունելու, Նրա մեջ հոգևորապես աճելու և որպես Քրիստոսի աշակերտ հասունանալու համար:

«Որովհետև դու նրան հավիտենական օրհնություն տվեցիր. նրան ուրախացրիր Քո ուրախությամբ» (Սաղմոս 21.6)։

Տեր Աստծո ներկայությունն է մեզ ապրելու զորություն տալիս, ուժ փոխանցում առաջ ընթանալու համար և պահում ու պահպանում է մեզ ամեն օր: Այն լուսավորում է մեր կյանքի ուղին: Այն լցնում ու զարդարում է մեր հոգին երկնային ուրախությամբ և աստվածային խաղաղությամբ:

Ոչ մի բան չի կարող համեմատվել Աստծո հետ մտերմության և շփման այն պահերի հետ, երբ դու Նրա կողքին ես, երբ փնտրում ես Նրա երեսը և լսում Նրա ձայնը:

Աստծո համար թանկ ու սիրելի՛ զավակ, ես հրավիրում եմ քեզ այսօր փնտրել Նրա ներկայությունը: Երբ արթանանում ես, թող քո առաջին մտքերը ուղղվեն դեպի Տերը։ Խորհի՛ր Նրա մասին։ Խորհի՛ր Նրա Խոսքի շուրջ։ Թող քո առաջին խոսքերը լինեն Նրան ուղղված գովաբանություններ: Խոսի՛ր Տեր Աստծո հետ։ Գոհացի՛ր Նրանից նոր օրվա համար և խնդրի՛ր Նրա օրհնությունն ու առաջնորդությունը այդ օրվա քո բոլոր ծրագրերի համար։ Չկա ավելի գեղեցիկ բան, քան օրը Տեր Հիսուսի հետ սկսելը:

«Տե՛ր, առավոտից լսում ես իմ ձայնը, առավոտից առջևդ պիտի դնեմ իմ խնդրանքը և սպասեմ» (Սաղմոս 5.3)։

Տերը քո կողքին է։ Նա փափագում է, որ քո ամեն օրը Իր ներկայության մեջ սկսվի։ Այսօր վայելի՛ր Տեր Աստծու ներկայությունը և ուրախացի՛ր Նրա ներկայությամբ:

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։ Ամենօրյա քաջալերական ուղերձները ստանալու համար կարող եք բաժանորդագրվել.Hisus.amկայքում։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։