Ստացեք հավելվածըԱստծուն Լսելու ՕրհնություններըՕրինակ
Ուզո՞ւմ ես, որ կյանքդ լինի բավարարված։
Սիրելի՛ բարեկամ, հավանաբար, գիտես, որ որոշ կերակուրներ ավելի սննդարար են, քան մյուսները։
Եթե կանաչեղենից պատրաստված աղցան ես ուտում (ինչը բավականին օգտակար սնունդ է), ապա պետք է բավականաչափ շատ ուտես, որպեսզի կշտանաս։ Իսկ եթե ուտում ես մսային որևէ ուտեստ կամ որևէ շիլա, ապա ավելի հավանական է, որ քո ստամոքսը բավականին երկար ժամանակ իրեն բավարարված կզգա։
Ինչպես, որ մեր մարմինն ունի սննդի կարիք, այնպես էլ հոգին է սնվելու կարիք զգում։ Առանց համապատասխան սննդի մեր հոգին սովից տանջվում է և սպասում, թե երբ ենք մենք այն ճիշտ հոգևոր կերակուրներով լցնելու։ Մատթեոս 4․4 խոսքում կարդում ենք․ «Ոչ միայն հացով է մարդն ապրում, այլև այն ամեն խոսքով, որ Աստծու բերանից է դուրս գալիս»։
Այո՛, ես և դու կարիք ունենք լսելու, երբ Աստված խոսում է։ Տեր Աստծուն լսելը անհրաժեշտ պայման է ապրելու համար։ Աստծո խոսքերը մեր կյանքի աղբյուրն են։ Դրանք մեր հոգիները լցնում են կյանքով, զորացնում են մեզ, երբ մենք ուժասպառ ենք, և քաջալերում են, երբ թևաթափ ենք լինում, հիասթափված ենք ու գտնվում ենք անկում ապրած վիճակում։ Փա՜ռք Աստծուն Նրա կենդանի ու կենդանացնող Խոսքի համար։
Աստծո համար թանկ ու սիրելի՛ զավակ, վերջին անգամ ե՞րբ է Աստված խոսել քեզ հետ։ Ե՞րբ ես Նրանից քո սրտի մեջ կյանք տվող խոսքեր ընդունել։
Թույլ մի՛ տուր, որ հոգիդ սովատանջ լինի։ Սնվի՛ր Աստծո Խոսքով և սնվի՛ր ամեն օր։ Թող քո հոգին սնվի, զորանա և վերականգնվի Աստծո Սուրբ Խոսքի շնորհիվ։
Հրավիրում եմ քեզ հենց հիմա աղոթելու ինձ հետ միասին այս աղոթքով․ «Տե՛ր, ես չեմ ուզում միայն մարմնավոր հացով ապրել։ Նաև չեմ ուզում Քո ներկայության ու Քո Խոսքի վայելքն ունենալ անկանոն կերպով կամ շատ հազվադեպ։ Ես ավելին եմ փափագում։ Ավելին եմ ուզում Քո ներկայության ու Քո Խոսքերը լսելու առումով։ Խոսի՛ր ինձ հետ, երբ Աստվածաշունչ եմ կարդում, երբ խորասուզվում եմ Քո Սուրբ Խոսքի մեջ։ Շնորհակալ եմ, որ խոստացել ես, որ Քո շուրթերից դուրս եկած խոսքերը հագեցնելու են իմ հոգու սովը։ Աղոթում եմ Տեր Հիսուսի անունով։ Ամե՛ն»։
Առաջարկում եմ այս ուղերձը ընթերցելուց և առաջարկված աղոթքով աղոթելուց հետո լսել նաև այս ընդամենը երկու րոպեանոց կարճ ուսուցումը, որի վերնագիրն է՝ «Ինչպե՞ս ճիշտ ընթերցել Աստվածաշունչը»։
Հիշի՛ր, որ դու Աստծո հրաշքն ես, և Աստված սիրում է քեզ։
Շնորհակալ եմ, որ դու կա՛ս։
Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։
Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։
Այս Ծրագրի Մասին
Այսօր և առաջիկա օրերին ուզում եմ քեզ հետ կիսվել, թե որքան կարևոր է Աստծո ձայնի հանդեպ ուշադիր լինելը։ Ադամն ու Եվան լսում էին Աստծո ձայնը, նրանք նաև լսեցին նաև օձի ձայնը։ Նրանք ազատ էին իրենց կամքի մեջ և հենց ազատ կամքի արդյունքում ընտրեցին, թե ում ձայնին հնազանդվել։ Մե՛նք ենք ընտրում, թե ո՞ւմ ձայնին ուշադրություն դարձնենք։ Առաջարկում եմ կարդալ այս 7-օրյա ծրագիրը և սովորել, թե ինչպես տարբերել Աստծո ձայնը մյուս ձայներից։
More
Մենք ցանկանում ենք շնորհակալություն հայտնել hisus.am-ին այս պլանը տրամադրելու համար: Լրացուցիչ տեղեկությունների համար այցելեք՝ https://hisus.am/
