Աստծուն Լսելու ՕրհնություններըՕրինակ

Լսի՛ր ճշմարտությունը

Սիրելի՛ բարեկամ, կարո՞ղ ես այսօր համոզված ասել, որ Աստված սիրում է քեզ։

Մենք, որպես Տեր Հիսուս Քրիստոսին հավատացող մարդիկ, պետք է մեկընդմիշտ լուծենք այս հարցում բոլոր կասկածների հարցը։ Եթե դու քո կյանքում որոշում ես կայացրել ապրելու որպես Քրիստոսի աշակերտ՝ Նրա սկզբունքները կիրառելով, Նրա արժեհամակարգը քոնը դարձնելով և Նրա ուսուցանած ճշմարտությունները քո որոշումների ուղենիշ ընդունելով, ապա երբեք պետք է չունենաս կասկածի որևէ զգացում, երբ խոսքը վերաբերվում է Աստծո կողմից սիրված լինելուն։ Ժամանա՛կն է, որ վերջ դնես բոլոր ընկճող ու կասկածներ հարուցող մտքերին և հայացքդ ուղղես Տեր Հիսուսին։

Փորձի՛ր ամեն առավոտ լարել քո հոգևոր լսողությունը և լսել, թե ինչ է ասում քեզ Տերը։ Համոզված եմ, որ Նա հերթական անգամ քեզ ապացուցելու է, թե որքան խանդավառ ու անհուն է Իր սերը քո հանդեպ։

Եթե քո կյանքի իրավիճակների ճնշման ներքո երբեմն արթնանում ես տագնապով և հարցնում ինքդ քեզ. «Տե՜ր, արդյո՞ք շարունակում ես սիրել ինձ», ապա համոզված եղիր, որ կասկածի այդ մտքերը թշնամու ձեռագիրն են։ Տիեզերքի Արարիչը՝ տերերի Տերը և թագավորների Թագավորը շարունակո՛ւմ է քեզ սիրել և երբե՛ք չի դադարելու քեզ սիրելուց։

Նա քեզ սիրում է մի գերբնական ու անըմբռնելի սիրով, որը դրդեց Նրան հանուն քեզ Գողգոթայի խաչի վրա զոհաբերելու Իր Որդուն։ Եթե կարիք լիներ անգամ այսօր, ապա Աստված կրկին կզոհաբերեր Իր Որդու կյանքը հանուն իմ և քո փրկության, քանի որ Նրա սերը խիստ նախանձավոր է քո հանդեպ։

Աստծո համար թանկ ու սիրելի զավա՛կ, Տեր Հիսուսը խաչի մահով մահացավ բոլոր մարդկանց համար, սակայն կարելի է ասել, որ Նա մահացավ յուրաքանչյուր մարդու համար՝ մեկ առ մեկ… Եվ այս ցուցակի մեջ եմ ես, և այս ցուցակի մեջ ես նաև դու։ Այսօր Տեր Հիսուսը ինձ և քեզ է ուղղում այս խոսքերը. «Ես մահացա քե՛զ համար»։

Նրա սերը քո հանդեպ ավելի զորեղ է, քան ցանկացած այլ բան։ Այն անհամեմատ ավելի զորավոր է, քան․․․

• ցանկացած բան, որ դու կարող ես զգալ,
• այն բոլոր ձայները, որոնք կշշնջան, թե Տերն այլևս չի սիրում քեզ,
• ցանկացած բան, որը ինքնադատապարտության է մղում քեզ։

Նրա սերը զորավո՛ր է։ Այսօր, ընտրիր քո հանդեպ Նրա սիրուն հավատալը։ Ընտրի՛ր Նրա ձայնը լսելը։

Ինչպես Պողոս առաքյալն է պնդում Հռոմեացիներին ուղղված իր ուղերձի մեջ. «Որովհետև հաստատ գիտեմ, որ ո՛չ մահը, ո՛չ կյանքը, ո՛չ հրեշտակները, ո՛չ իշխանությունները, ո՛չ զորությունները, ո՛չ ներկայիս և ո՛չ գալիք բաները, ո՛չ բարձրությունը, ո՛չ խորությունը, ո՛չ էլ ստեղծված մի ուրիշ բան չեն կարող մեզ բաժանել Աստծու սիրուց, որ մեր Տեր Հիսուս Քրիստոսի մեջ է» (‭‭Հռոմեացիներին‬ ‭8.38-39):

Եվս մեկ անգամ ուզում եմ ասել աստվածաշնչյան անխախտ ու անսասան այս ճշմարտությունը՝ ոչինչը չի կարող բաժանել քեզ Ամենակարող Աստծո անսահման սիրուց։ Պարզապես վարժեցրու քեզ Նրա ձայնը լսելու օրնյալ փորձառության մեջ և ոչ միայն դու դրանում կհամոզվես, այլև մյուսներին կօգնես հասկանալու այս կենարար ճշմարտությունը։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։ Ամենօրյա քաջալերական ուղերձները ստանալու համար կարող եք բաժանորդագրվել.Hisus.amկայքում։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։