Ինչպես Բժշկել Քո Սրտի ՎերքերըՕրինակ

Ինչպիսի՞ վիճակում է սիրտդ

Սիրելի՛ բարեկամ, այսօր մի պարզ հարց եմ ուզում քեզ ուղղել։ Սակայն այդ հարցին պատասխանելն այդքան էլ հեշտ չէ․ «Ի՞նչ վիճակում է սիրտդ»։

Արդյոք սիրտդ ճնշվա՞ծ է բացասական զգացողություններով ու մտքերով։ Օրինակ, գուցե մտածում ես, թե անարժեք մեկն ես կամ անկարող ես որևէ լուրջ հաջողության հասնել։ Իսկ գուցե խորը վիրավորվել ես ինչ-որ մեկի խոսքերից կամ վերաբերմունքից։ Գուցե շատ անորոշ վիճակի մեջ ես։ Կամ գուցե նորից ու նորից կյանքի նույն ծանր շրջապտույտի մեջ ես հայտնվե՞լ և մտածում ես, թե ե՞րբ է այդ ամենն ավարտվելու։

Այս ամենը ներքին ճնշում ու ծանրություն է բերելու քո սրտի վրա։ Կյանքում, թերևս, ամենադժվար բանը ծանրացած ու ճնշված սրտով ապրելն է։ Եվ ես ուզում եմ հորդորել քեզ, որ Տեր Աստծուն խնդրես, որպեսզի Նա հայտնի քեզ քո այդ ներքին տառապանքի պատճառները։ Մենք պետք է սովորենք մեր երկնային Հոր հետ կիսվել մեր կյանքի դժվարություններով ու սրտի վիճակով և լիովին վստահենք Նրան մեր խնդիրների լուծումը։

Երբեմն մեր սրտի տառապանքն ու ծանրությունը նման են մի խանգարող աղմուկի, որը մեզ թույլ չի տալիս լսել Տեր Աստծո ձայնը և ստանալ այն օգնությունը, որն Աստված է ուզում մեզ փոխանցել։

Ահա իմ այսօրվա քաջալերանքը քեզ․ նախ քննի՛ր, թե ի՞նչն է քո սրտի ճնշվածության պատճառը։ Հետո Աստծո Խոսքի հորդորին հնազանդվելով՝ քո հոգսը բե՛ր Տեր Աստծու մոտ և թո՛ղ այն Նրա շնորհքի գահի առջև։

Իսկ Տեր Հիսուսը հետևյալ խոսքերն է մեզ ուղղում․ «Ինձ մո՛տ եկեք, բոլո՛ր հոգնածներ ու բեռնավորվածներ, և Ես հանգիստ կտամ ձեզ» (Մատթեոս 11։28)։

Իհարկե, բոլորս էլ համաձայն ենք մեր հոգսերը Տեր Հիսուսին հանձնելու հարցում։ Սակայն գործնականում այնքան էլ հեշտ չէ դա իրագործելը։ Այնուամենայնիվ, դա միակ ճանապարհն է մեր հոգսերից ազատվելու համար։ Միայն այդ կերպ են քանդվում մեր և մեր Աստծուց եկող օգնության միջև առկա պատնեշները։ Եվ միայն այդ ճանապարհով ենք մենք միանում կյանքի միակ աղբյուրին՝ Տեր Հիսուս Քրիստոսին, այն լավագույն Բարեկամին, որ երբևէ կարող ենք ունենալ մեր կյանքերում։

Աստծո համար թանկ ու սիրելի զավակ, թո՛ղ ամեն բան ու մոտեցիր Աստծուն։ Մոտեցի՛ր՝ Նրա կամքը ճանաչելով և Նրա կամքին հնազանդվելու որոշումներ կայացնելով։ Փոխի՛ր քո վերաբերմունքը Աստծո Խոսքի հանդեպ և ձգտի՛ր ապրել Աստծո ասած կերպով։ Երբ փոխես քո վերաբերմունքն Աստծո, Նրա Խոսքի և հավատքի կյանքի հանդեպ․ ապա քեզ համար դժվար չի լինի Տեր Աստծո դեպի քեզ մեկնած ձեռքերի մեջ հանձնել այն ամենն, ինչը տառապանք ու ծանրություն է ծնում քո սրտում, և գտնել այն աննկարագրելի ու մնայուն խաղաղությունը, որը միայն Տեր Հիսուսը կարող է քեզ փոխանցել։

Հիշի՛ր, որ դու Աստծո հրաշքն ես, և Աստված սիրում է քեզ։

Շնորհակալ եմ, որ դու կա՛ս։

Հ.Գ. Ընթերցանության այս ծրագրի տեքստը վերցված է «Քո հրաշքն՝ ամեն օր» ուղերձներից, որոնց շնորհիվ ամեն օր Արման Մանուկյանը կիսվում է Աստծո Խոսքի շուրջ խրախուսական մտորումներով՝ ի քաջալերանք յուրաքանչյուրի, ով սիրում և անկեղծորեն հետևում է Տեր Հիսուսին։ Ամենօրյա քաջալերական ուղերձները ստանալու համար կարող եք բաժանորդագրվել.Hisus.amկայքում։

Եվ թող ամեն օրվա Ձեր հրաշքն ու քաջալերանքն անպայմա՛ն հասնեն Ձեզ ու լուսավորեն Ձեր կյանքը։