Pran aplikasyon anGerizonEgzanp
Jezi Bay lavi, Li Bay Gerizon
Jezi te vini pou ban nou lavi ak lavi an abondans. Li di ke vòlè a vini pou vòlò, touye, ak detwi, men li menm, li vini pou nou gen lavi nan tout fòm li. Lavi an abondans sa a pa limite sèlman nan domèn fizik, men li anglobe tout aspè nan egzistans nou: espirityèl, emosyonèl, ak sosyal. Se yon lavi plen ak lanmou Bondye, kè kontan, ak lapè, kèlkeswa sikonstans yo.
Lè nou pale de gerizon, nou pa sèlman ap pale de gerizon fizik, men tou de gerizon espirityèl ak emosyonèl. Jezi envite nou vin jwenn li lè nou bouke anba chay lavi a. Li pwomèt pou soulaje nou epi ban nou repo. Jezi se sèl sous reyèl gerizon ak rekonsilyasyon. Lè nou apwoche Li ak tout kè nou, Li retire tout chay nou yo, li bay nanm nou repo, li ranplase doulè ak trankilite.
Jezi montre Li gen pouvwa sou tout maladi epi Li ka transfòme nenpòt sitiyasyon difisil pou demontre grandè pouvwa Bondye. Gerizon Li bay nonm ki te avèg depi nesans li an montre sa. Apre Li te manyen je nonm lan ak labou Li te fè ak saliv, epi voye li lave je l nan pisin Siloye a, nonm lan te retounen e li te wè klè. Jezi gen kapasite pou geri ak pou fè mirak.
Kè poze Jezi ban nou depase tout konesans lèzòm. Se yon kado Bondye ki fè kè nou kalme nou. Nan tout bon moman tankou nan tout move moman, nou ka toujou jwenn sekou nan kè poze Jezi bay la. Li ban nou yon trankilite ki pa soti nan mond lan, men ki soti nan Li menm.
Nan moman kote nou santi nou dekouraje oswa san espwa, nou kapab sonje pwomès Bondye yo. Jezi se bon Gadò ki toujou ak nou, menm nan twou fè nwa lavi a. Li ap pwoteje nou, li ap gide nou, li ap ranfòse nou ak lanmou li ki pap janm fini. Nou ka toujou mete konfyans nou nan li, paske li fidèl e li pap janm kite nou ni abandone nou.
Frè ak sè m yo, ann chache Jezi ak tout kè nou. Ann envite li nan chak zòn nan lavi nou pou li ka pote lavi pou nou, gerizon, ak kè poze. Nan Li, nou jwenn tout sa nou bezwen pou n viv yon lavi an abondans, plen ak benediksyon Bondye. An nou fè Li konfyans, kèlkeswa sikonstans lan, paske li fidèl e li pap janm kite nou ni abandone nou. Amèn.
Konsènan Plan sa a
Men yon gid lekti biblik pou devosyon nou chak jou ki mete aksan sou gerizon espirityèl, emosyonèl, ak gerizon fizik atravè Bib la. Gid lekti sa a ap dewoule sou yon peryòd 5 jou, kote chak jou yo w ap jwenn yon vèsè biblik ki mache ak li. Pran tan pou li dokiman an epi rive jwenn konsolasyon ak gerizon pou nanm ou ladan l.
More
Nou ta renmen remèsye Joseph Vassa paske li bay plan sa a. Pou plis enfòmasyon, tanpri vizite: https://www.instagram.com/josephjeanmarcvassa/
