Pran aplikasyon anGerizonEgzanp
Gerizon Pou Pèp Bondye a
Frè m ak sè m nan Kris, nou tout konnen jan sa difisil lè yon pèp ap soufri. Men, nou dwe sonje ke Bondye toujou gen yon plan pou tout nasyon ki chwazi retounen vin jwenn Li. Jodi a, nou pral gade ansanm kijan yon pèp ka jwenn gerizon lè li chwazi repanti ak retounen nan chemen Bondye.
Bondye pwomèt ke lè pèp Li a lapriyè ak soumèt devan Li, chache prezans Li, epi vire do bay peche yo, Li ap tande yo, padonnen yo, epi geri peyi a. Nou sonje istwa Jonas ak pèp Niniv la. Bondye te voye Jonas nan vil Niniv pou avèti yo sou jijman Li akoz mechanste yo. Apre yon seri evennman, Jonas finalman obeyi Bondye epi te kòmanse preche. Pèp Niniv la te kwè nan mesaj Bondye a, epi yo te imilye tèt yo devan Li. Wa Niniv la menm te bay yon lòd pou tout moun, depi pi piti rive pi gran, pou rete san manje epi mete rad sak sou yo pou moutre jan yo te nan lapenn pou tout mal yo te fè. Bondye te wè chanjman yo te fè a epi Li pa t pini yo ankò jan Li te di Li tapral fè a.
Menm jan pèp Niniv la te retounen vin jwenn Bondye, nou menm tou nou ka fè menm bagay la. Jodi a, nou wè jan peyi nou an ap pase tray anba anpil soufrans: grangou, vyolans, divizyon, ak lòt pwoblèm. Men, Bondye ap rele nou pou nou retounen vin jwenn Li. Bondye pwomèt pou l koute nou, pou l padonnen nou, epi pou l geri peyi nou si nou imilye tèt nou devan Li, lapriyè, chache prezans Li, epi vire do bay peche nou yo. Nou dwe fè sa ansanm, kòm yon nasyon, kòm yon pèp ki pote non pèp Bondye a.
Annou kòmanse jodi a. Annou imilye tèt nou devan Bondye, konfese peche nou yo, epi mande l gerizon pou peyi nou. Se pa yon travay fasil, men avèk lafwa, lapriyè, ak detèminasyon, nou ka wè mirak Bondye nan lavi nou ak nan nasyon nou. Mwen mande pou chak moun ki tande mesaj sa a pran yon moman pou reflechi, priye, epi chache fas Bondye.
Gerizon kolektif pèp Bondye a kòmanse ak repantans kolektif. Annou swiv egzanp Ninivit yo, annou vire do bay peche nou yo, epi annou retounen nan chemen Bondye. Ke Bondye beni nou tout, ke Li geri peyi nou, epi ke Li retabli nasyon nou nan non Jezikri. Amèn.
Konsènan Plan sa a
Men yon gid lekti biblik pou devosyon nou chak jou ki mete aksan sou gerizon espirityèl, emosyonèl, ak gerizon fizik atravè Bib la. Gid lekti sa a ap dewoule sou yon peryòd 5 jou, kote chak jou yo w ap jwenn yon vèsè biblik ki mache ak li. Pran tan pou li dokiman an epi rive jwenn konsolasyon ak gerizon pou nanm ou ladan l.
More
Nou ta renmen remèsye Joseph Vassa paske li bay plan sa a. Pou plis enfòmasyon, tanpri vizite: https://www.instagram.com/josephjeanmarcvassa/
