Sispann KonpareEgzanp

Moman transparan.

Pandan prèske tout vi mwen, mwen te toujou santi moun te meprize m, yo pa t vle m, yo pa t bezwen m. Se te konsekans anpil bagay, tankou manman m ki te di m li pa t vle m, oubyen paske yo pa t chwazi m nan ekip lekòl la akòz gwosè m epi timoun nan klas mwen yo ki te meprize m. Enben, nan prentan 2020, lè tout moun te fèmen lakay yo poutèt kovid, tout konferans m te dwe bay pou ane a te anile paske tout bagay te anile. Men, yon jou, pandan m te sou Instagram, mwen te wè yo te envite yon bann zanmi m al pale nan yon gwo konferans fanm ki te vin fèt sou Entènèt akoz epidemi an. Mwen te konnen konferansye yo, e mwen te konnen mèt konferans la... men yo pa t envite m pou m al pale.

Bagay sa a te fè m kòmanse desann tèt mwen, lespri m te kòmanse anvayi ak kesyon tankou: "poukisa yo pa t envite m?" "Poukisa yo mete m sou kote?" "Poukisa mwen pa janm bon ase?" Men, nan mitan kesyon sa yo, Sentespri te poze m yon lòt kesyon ki chanje direksyon lavi m ak idantite m poutoutan. Li te mande m,"Poukisa sa enpòtan?"Ti kesyon sa a te tèlman pwofon. Li fann kè m de bout. Li te fòse m konfwonte sa m te kwè sou tèt mwen. E sa mwen te kwè a pa t bèl.

Yon lè konsa, san m pa menm wè sa, mwen te kòmanse mare idantite m ak envitasyon pou pale nan konferans mwen t ap resevwa yo. Se envite yo pa t envite m nan ki fè m te dekouvri sa. Mwen te santi m malalèz paske mwen te bati idantite mwen sou move fondasyon envitasyon nan konferans. Men, nan vèsè nou chita sou li jodi a, nou wè kijan Jonatan te bati idantite l sou sèl fondasyon solid ki pèmèt nou mache avèk bonjan konviksyon sou wout nou san nou pa konpare tèt nou ak pèsonn.

Kontrèman ak papa l, wa Sayil, Jonatan pa t wè David kòm yon menas paske pèp la te renmen David. Okontrè, Jonatan te renmen David e li te selebre l. Men kouman? Enben, anvan menm David te parèt nan istwa a, nou jwenn yon apèsi sou kwayans ki te fòme idantite Jonatan nan 1 Samyèl 14:6:

"Jonatan di jenn gason an: -Ann janbe lòt bò nan kan moun Filisti yo, bann moun sa yo ki pa sèvi Seyè a. Ou pa janm konnen, Seyè a ka ede nou. Paske pa gen anyen ki ka anpeche l' fè nou genyen, nou te mèt anpil, nou te mèt pa anpil.'”

Jonatan te goumen kont Filisten yo nan non Bondye, pa paske li t ap eseye enpresyone moun (pa t gen moun ki t ap gade) e pa paske li t ap eseye fè non l (pa t gen moun ki t ap gade). Li te ale poukont li paske li te gen konfyans total nan Bondye e li te kwè pa gen anyen ki ka bloke destine l nan Bondye. Se pa pou moun li te fè l. Se pa t pou fè non l kòm pwochen wa a. Anyen. Epi se poutèt sa,lè w santi w konplekse paske yo mete w sou kote, yo neglije w, olye pou mande "poukisa yo pa t chwazi m" oswa "poukisa se limenm yo toujou pran," mande pito, "poukisa sa enpòtan."

Avan pwochen sesyon nou an, vin devan Bondye epi priye pou li montre w rasin konplèks ou yo pou ka bati idantite w sou fondasyon solid ki se moun Bondye di w ye a.