Sispann KonpareEgzanp

Anpil moun sou latè konplekse chak jou pi plis paske yo wè siksè lòt moun kòm echèk pa yo. Men poukisa? E kijan nou ka delivre anba vye konplèks sa a? Enben ann kòmanse la a.

Èske w janm konsidere pouvwa mo yo genyen? Èske w te janm konsidere kòman pawòl yo te di sou ou te fè w wè tèt ou? Nan Pwovèb 18:21 (Hcv), vèsè n ap chita sou li jodi a, Bib la di nou:

" Sa ou di ka lavi pou ou, li ka lanmò pou ou. Sa ou chwazi, se sa w'ap jwenn."

Gen lòt vèsyon biblik ki di "Nan lang ou gen pouvwa lavi ak lanmò". Nan vèsyon orijinal Ebre vèsè sa a, mo yo tradui kòm "pouvwa" a se Yad, ki vle di "men." Donk Bib la di nou lang nan gen kapasite pou kreye, fòme, deklannche lavi oswa lanmò kay moun li pale sou yo yo; tankou yon men. Sa ki mennen m sou ou.

Vye konplèks yo pran rasin nan pawòl lanmò, dekourajman ak denigreman moun te di sou ou. Mo ki te kraze idantite w. Petèt sa te ka rive lè w te timoun, oswa lè w vin granmoun, men kèlkeswa lè sa te rive a, rezilta a se ke ou pa fin wè tèt ou byen paske twou mo sa yo te fouye nan idantite w defòme fason w wè tèt ou.

Mwen konprann sa byen paske lè m t ap grandi m te gwo anpil anpil. Tout epòk m te timoun ak lè m te vin jèn, yo te rele m bout patat, patat si, bouboul ak lòt vye non ankò, sa ki te fè m wè tèt mwen gwo epi lèd. Nan klas 9yèm ane yon ti gason te di m, "gwosè w ye la a, ou pa itil anyen esepte fè bagay nan fènwa." Tout moun te tonbe ri... pandan kè m te dechire. Vye pawòl pike, pawòl pimanbouk li yo te vin ajoute sou lòt pawòl pike, pawòl petefyèl lòt moun te di m, vye mo ki te fè m wè tèt mwen yon jan pandan plizyè ane. Pawol ti gason sa a se te kou ki te touye koukou a, yo te fini avè m nèt.

Pawòl moun di sou ou enpòtan. Pou sispann konpare tèt ou ak lòt moun, sa mande pou analize mo yo te di sou ou, mo ki te tounen men pou fasonnen, fòme epi fabrike idantite w. Anvan pwochen sesyon nou an, priye pou gras Bondye ede w repare teren idantite w —yon teren move pawòl te fouye yon bann twou ladan l.

Mo yo enpòtan.