Mar 13
13
1Yesu ku yaabaire naaruga omuri Nyaruju, omwe aha batendekwa be yaamugira ati: Mwegyesa, reeba. Ebishi, aga mabaare n'ebi byombeko nibitangaaza! 2Yesu yaamugira ati: Ebi byombeko bihango nimubireeba? Tiharitsigara ibaare na rimwe eritungamiire erindi eritarisheenyagurwa.
Okutandika kw'eby'obusaasi
(Mat. 24:3-14; Luk. 21:7-19)
3Kandi Yesu ku yaabaire ashutami aha Rushozi rw'Emioliva ahashungaine na Nyaruju, Petero na Yakobo na Yohaana na Andereya baamubuuza omu mubonano bati: 4Tugambire ahu ebyo biribeeraho, kandi n'akamanyiso akarituhamiza ku ebyo biri haihi kuhikiirira?
5Yesu nikwo kutandika kubagambira ati: Mwerinde hatarigira omuntu weena owaabahabisa. 6Manya baingi baryaija nibaanyeyeterera nibagira ngu, Niinye; haza bahabise baingi. 7Ku murihurira engamba n'emibuuro yaazo, mutaryekanga, ahabw'okuba ebyo n'eby'okubaho; kwonka emperu eryaba etakahikire. 8Manya obwo eihanga riryateera erindi, n'obugabe buteere obundi. Haryabaho emitsitsa oku n'oku, hataahe enjara nyingi; haza ebyo biryaba biri entandikiro y'eby'obusaasi.
9Kwonka imwe, mwerinde; baryabahayo omu mashengyero, babateerere omu mateeraniro; babeemereze omu maisho g'abategyeki abakuru n'ag'abagabe nibabantura, mube baakareebi bangye aharibo. 10Kwonka Amakuru Marungi garyabanza garangirirwe omu mahanga goona. 11Kandi ku baribatwara kubahayo, mutaryemereza omutima ahabw'eki murigamba, kwonka eki muriheebwa omuri ago magingo mube nikyo mwagamba; manya tiimwe murigamba, kureka Mutima Orikwera. 12Mukuru w'omuntu aryahayo omurumuna kwitwa, na ishe w'omwana aheyo omwana we, n'abaana baimukiirire abazaire baabo, babaitise. 13Muryayangwa abantu boona ahabwangye; kwonka origumisiriza akahika aha muheru, niwe arijunwa.
Akagwe akarigwera Yerusalemu
(Mat. 24:15-28; Luk. 21:20-24)
14Ku murireeba ekirikuzira ekirikuhwerekyereza kyemereziibwe ahi kitakugiire--orikushoma ebi ayetegyereze--obwo abariba bari omuri Buyudaaya bahungire aha nshozi; 15oriba ori aha mutwe gw'enju, ataritemburuka kuza omu nju kwihamu ebye; 16n'oriba ori omu musiri, atarigaruka omuka kwihayo omunagiro gwe. 17Ebishi bambe, abariba baine enda n'abarikwontsya omu biro ebyo baryagwerwa akagwe! 18Mushabe ebyo bitakaabaho mu biro by'embeho. 19Manya omu biro ebyo haryabaho eby'obusaasi ebitakabahoga, okwiha aha kutandika kw'ensi ei Ruhanga yaahangire n'okuhitsya hati, kandi ebitaribaho bundi. 20Kuri Nyakubaho ataracwire ha biro ebyo, tihaakubaireho n'omwe owaakurokokire; kwonka ahabw'entoore ze, ebyo biro akabicwaho.
21Omu bunaku obwo ku harigira owaabagambira ati: Reeba, Kristo ari aha, nari, ari hariya, mutariikiriza; 22ahabw'okuba haryaimuka Ba-Kristo b'ebishuba n'abarangi b'ebishuba, bakore obumanyiso n'eby'okutangaaza, kuhabisa nangwa n'abatoorainwe, kyaba nikibaasika. 23N'ahabw'ekyo naimwe mwerinde; ebyo byona naabibagambira bitakabaireho.
Oku Omwana w'omuntu arigaruka
(Mat. 24:29-31; Luk. 21:25-28)
24Kwonka omu biro ebyo, eby'obusaasi ku biriheza kuhwaho, eizooba riryazima, n'okwezi tikuryaka, 25enyonyoozi ziryahanantuka omu iguru zigwe, n'eby'amaani eby'omu iguru bitengyeetsibwe. 26Obwo baryareeba Omwana w'omuntu naizira omu bicu, aine obushoboorozi n'ekitiinisa kingi. 27Haza aryatuma baamaraika be kutaaruura entoore ze nibaziiha omu mbaju ina ezi emiyaga ereetwamu, okwiha aha muheru gw'ensi okuta ahu eiguru rigarukira.
Obunaku bw'okwija kwe
(Mat. 24:32-35; Luk. 21:29-33)
28Mureebere aha mutiini; eitaagi ryagwo ku ryoroba ryatooka amababi, mumanya ku ekyanda kiri haihi. 29Naimwe nu nikwo kiri, ku murireeba ebyo nibibaho, mumanye ku ari haihi, ku yaahikire aha marembo. 30Buzimazima nimbagambira nti: Ab'obusingye obu tibarihwaho ebyo byona bitakabaireho. 31Eiguru n'ensi biryahwaho, kwonka ebigambo byangye tibirihwaho.
Mugume mweteekateekire
(Mat. 24:36-44)
32Mbwenu eby'ekiro ekyo n'obunaku bwakyo tihariho orikubimanya, nobu baakuba baamaraika b'omu iguru, nobu yaakuba Mwana, kureka Ishe wenka.
33Mwerinde, mugume nimureeba, kandi mushabe, ahabw'okuba timurikumanya ahu obunaku obwo burihikira. 34Buri nk'omuntu orikuza eihanga; akiba naaruga omu ka, akagitsigira abaheereza be, buri omwe akamuha omurimo, kandi akaragiira omukumiirizi kuguma naareeba. 35N'ahabw'ekyo mugume nimureeba, ahabw'okuba timurikumanya bunaku bu nyineeka ariiziramu, yaaba mu mwabazyo, nari mu itumbi, nari enkoko nizigamba, nainga omushekye nigujuguta; 36atakaija kitaraariire, akabashanga mugwejegyeire. 37Kandi eki ndikubagambira, ninkigambira n'abandi boona, nti: Mugume nimureeba!
Abayudaaya okucumira Yesu enaama y'okumwita
(Mat. 26:1-5; Luk. 22:1-2; Yoh. 11:45-53)
હાલમાં પસંદ કરેલ:
Mar 13: RKK2008
Highlight
શેર કરો
નકલ કરો
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
