Mar 12
12
1Kandi Yesu akagumizamu yaabagambira naabacwera enfumu egi, ati: Omuntu akahinga omusiri gw'emizaabibu, yaaguzitirira orugo, yaagurimamu einyuukiro rya viino, yaagwombekamu omunaara, yaagutsigira abashengi; atyo yaataaha eihanga. 2Obunaku ku bwahikire, yaatuma omuheereza we ahari abo bashengi, ngu bamutwekyere ebijuma by'emizaabibu. 3Kwonka bo baamukwata, baamuteera, baamubinga engaro nsha. 4Yaagaruka yaabatumaho ondi muheereza; ogwo nawe baamuhutaaza omutwe, baamuhemagura. 5Kandi yaabatumaho ondiijo, ogwo baamwita; n'abandi baingi, abamwe baabaasha, abandi baabaita. 6Akaba akitsigaizeho omwe, niwe mutabani omukundwa; aha muheru gwa boona, yaamubatumaho, naagira ati: Shana mutabani wangye bakaamugirira enshoni. 7Kwonka abo bashengi baagambirana bati: Manya ogu niwe muhunguzi; nimwije tumwite, obuhunguzi bube obwaitu. 8Batyo baamukwata, baamwita, baamunaga aheeru y'ogwo musiri.
9Mbwenu mukama w'ogwo musiri gw'emizaabibu aryakora ki? Aryaija, acwekyereze abo bashengi, reero omusiri gw'emizaabibu agutemu abandi. 10Hari timukashomaga ekyahandiikirwe? Ku nikigira kiti:
Eibaare eri abombeki baayangire,
niryo ryahindukire obuhamizo.
11Ekyo kikakorwa Nyakubaho,
kandi nikitutangaaza okukireeba.
12Ku baakyengire egyo nfumu ku nibo erikurengyeza, baayenda kumukwata, kwonka baatiina enyanja y'abantu; batyo baamutsigaho baayegyendera.
Eby'okuha Kaisaari omushoro
(Mat. 22:15-22; Luk. 20:20-26)
13Kandi Yesu bakamutumaho Abafarisaayo bamwe n'ab'ekigombe ky'aba Herode kumutega omu bi arikugamba. 14Baija baamugira bati: Mwegyesa, nitumanya ku oba ow'amazima, ku oteeta ha muntu weena, ahabw'okuba toreebera ha bukuru bw'omuntu, kureka oyegyesa omu mazima eby'omuhanda gwa Ruhanga. Mbwenu itwe okuha Kaisaari omushoro, kihikire nari tikihikire? 15Mwbenu shi, tuguhe nari turereere? Yesu ahabw'okumanya oburyarya bwabo, abagira ati: Ahabw'enki nimuntega? Nimumpe empiiha, ngireebe. 16Batyo baagireeta; nawe yaabagira ati: Ekishushani eki n'ebihandiikirweho n'eby'oha? Baamugarukamu bati: N'ebya Kaisaari. 17Nawe nikwo kubagira ati: Ebya Kaisaari mubihe Kaisaari, n'ebya Ruhanga mubihe Ruhanga. Batyo baamutangaarira munonga.
Eby'okuzooka kw'abafiire
(Mat. 22:23-33; Luk. 20:27-40)
18Bwanyima Abasadukaayo, abagira ngu abafa tibazooka, bakaija ahari Yesu, baamubuuza bati: 19Mwegyesa, Musa akatuteeraho ekihandiiko ekirikugira ngu, mukuru w'omuntu ku yaakufa ari encwekye, omurumuna ahungure ogwo mufaakazi, azaarire mukuru we abaana. 20Mbwenu hakaba hariho enyina-emwe mushanju; ow'omujigaijo yaashwera omukazi, kwonka yaafa bucwekye. 21Ow'omushubiro yaahungura ogwo mufaakazi, nawe yaafa atatsigire baana; n'owa kashatu atyo; 22boona omushanju baafa bucwekye. Aha muheru gwa boona, omukazi nawe yaafa. 23Mbwenu aha kuzooka kw'abafiire, ku barizooka, ahari abo aryaba muka oha? Ahabw'okuba boona omushanju bakamushwera.
24Yesu yaabagarukamu ati: Ekibahabisa ti ahabw'okuba mutarikumanya Ebyahandiikirwe, nobu gaakuba amaani ga Ruhanga? 25Manya abafiire ku barizooka, abantu tibarishwera kandi tibarishwerwa, kureka baryaba bari nka baamaraika omu iguru. 26Kandi ebirikukwata aha by'okuzooka kw'abafiire, timukashomaga mu kitabo kya Musa, ekicweka ekirikugamba aha by'orushaka ruri, oku Ruhanga yaamugizire ati: Ndi Ruhanga wa Aburahamu, Ruhanga wa Isaaka, kandi Ruhanga wa Yakobo? 27Biri ti Ruhanga w'abafiire, kureka n'ow'abahuriire. Muhabiire kimwe!
Ekiragiro ekikuru
(Mat. 22:34-40; Luk. 10:25-28)
28Omwe aha bahangu b'eiteeka, owaabahuriire nibahakana, akeetegyereza oku Yesu yaabagarukiremu gye, akaija yaamubuuza ati: Omu biragiro byona, ekikuru ni kiiha? 29Yesu yaamugarukamu ati: Ekikuru n'eki: Iwe Isiraeli, hurira! Mukama Ruhanga waitu niwe Mukama wenka. 30Guma okunde Mukama Ruhanga waawe n'omutima gwawe gwona, n'amagara gaawe goona, n'obwengye bwawe bwona, n'amaani gaawe goona. 31Ekya kabiri n'eki: Kunda mutaahi waawe nk'oku oyekunda. Tihariho kiragiro ekirikukira ebyo. 32Omuhangu w'eiteeka yaamugira ati: Mwegyesa, waagamba gye, eki waagamba n'eky'amazima okugira ngu, Mukama Ruhanga n'omwe kandi tihariho ondi; 33kandi ngu, okumukunda n'omutima gwona, n'obwengye bwona, n'amaani goona, kandi n'okukunda mutaahi we nk'oku ayekunda. Ekyo nikikirira hare ekihongwa ekicwekize kyona, nari ekindi kitambo. 34Yesu, ku yaamureebire yaagarukamu n'okwetegyereza, yaamugira ati: Obukama bwa Ruhanga toburi hare. Okwiha obwo tihaagira muntu n'omwe owaayehanga kumubuuza obundi.
Kristo mwene Daudi kandi Mukama we
(Mat. 22:41-46; Luk. 20:41-44)
35Bwanyima Yesu, ku yaabaire naayegyesa omuri Nyaruju, yaagira ati: Abahangu b'eiteeka baiha hi okugira ngu, Kristo ni mwene Daudi? 36Haza kunu Daudi, obu yaagambisibwa Mutima Orikwera, yaagizire ati:
Nyakubaho akagambira Mukama wangye ati:
Shutama aha rubaju rwangye rwa buryo,
okuhitsya obu ndigira abazigu baawe
endibatiro y'ebigyere byawe.
37Daudi nyakabara ku araabe naamweta Mukama, kandi shi naabaasa ata kuba omwana we? Ekimbuuro ky'abantu abaabaire bamuhurikiize kyashemerererwa ebi yaagambire.
Okwerinda oburyarya bw'abahangu b'eiteeka
(Mat. 23:1-36; Luk. 20:45-47)
38Yesu ku yaabaire naayegyesa, yaagira ati: Mwerinde abahangu b'eiteeka, abakunda kugyenda bajwaire amakanzu maraingwa, n'okutangirirwa omu butare, 39n'okushutama omu bitebe by'abakuru omu mateeraniro, n'omu myanya y'ebitiinwa aha magyenyi. 40Nibo abo abanyaga eby'abafaakazi, kandi bakashaba nibarandagatana, ngu abantu babareebe. Baryacwerwa orubanja orurikukira orw'abandi!
Omutoijo gw'omufaakazi omworo
(Luk. 21:1-4)
41Yesu ku yaashutamire ahashungaine n'eibiikiro rya Nyaruju, yaareeba abantu nibaritamu empiiha zaabo z'emitoijo; kandi abatungi baingi nibatamu nyingi munonga. 42Bwanyima haija omufaakazi omworo, yaatamu obusente bubiri, oburikwingana shilingi emwe. 43Mpaho Yesu yaayeeta abatendekwa be, yaabagira ati: Buzimazima nimbagambira ku omufaakazi ogu omworo yaatamu bingi okukira abandi boona abaata omu ibiikiro. 44Manya bo baatamu ebibashaagire; kwonka we akakye aku yaaba aine niko yaanagamu, haza kari eitungo rye heza.
Yesu okuranga eby'okucwekyerezibwa kwa Nyaruju
(Mat. 24:1-2; Luk. 21:5-6)
હાલમાં પસંદ કરેલ:
Mar 12: RKK2008
Highlight
શેર કરો
નકલ કરો
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
