Mar 14
14
1Ku haabaire hatsigaireyo ebiro bibiri ekiro ky'Obugyenyi bw'Okuhingurwaho n'obw'Emigaati Etatumbisiibwe kuhika, abahongyerezi abakuru n'abahangu b'eiteeka baasherura oburyo bu baraakwatiremu Yesu kitamanyirwe, bakamwita. 2Kwonka baagira bati: Ekyo kitabaho omu biro by'amagyenyi, ngu hatakaabaho akajagararo omu bantu.
Yesu okusiigwa amajuta ari Beetaniya
(Mat. 26:6-13; Yoh. 12:1-8)
3Yesu, ku yaabaire ari Beetaniya, omwa Simooni omubembe, ari aha meeza, omukazi yaamwijaho aine akacupa k'eibaare ry'omwengyengye, akarimu amajuta g'obuguzi bwingi, gooteize omugaju gw'obunyanunga; yaayata egyo cupa, yaagamushuka omu mutwe. 4Bamwe aha baabaire bariho baagambirana bagwirwe kubi, bati: Mbwenu aga majuta g'omugaju gaafa ki? 5Nangwa kuri gaatundwa, gakarugamu shilingi magana ashatu n'okukiraho, haza zikagabirwa abooro! Batyo baagirira ogwo mukazi ekiniga. 6Kwonka Yesu yaabagira ati: Mumurekye; nimumugangiza ki? Manya eki yankorera ni kirungi, 7ahabw'okuba imwe obutoosha abooro mutuura nabo, kandi nimubaasa kubakorera eby'embabazi mwaba nimwenda; kwonka nyowe timuriguma naanye obutoosha. 8Yankorera eki arikubaasa; yaasiiga amajuta g'omugaju omubiri gwangye kugutebeekanisiza okuziikwa. 9Buzimazima nimbagambira nti: Ahu amakuru Marungi aga garirangirirwa omu nsi yoona, eki ogu mukazi yaakora kiryagambwaho okumwijuka.
Yuda okureebya Yesu
(Mat. 26:14-16; Luk. 22:3-6)
10Yuda owa Kariota, omwe ahari ikumi na babiri, akaza aha bahongyerezi abakuru kubamanyisa oku araamubahe. 11Ku baakihuriire, baashemererwa munonga, baamuraganisa kumuha empiiha; nawe yaasherura oburyo bw'okumurebya.
Yesu okweteguurira Obugyenyi bw'Okuhingurwaho
(Mat. 26:17-25; Luk. 22:7-14, 21-23; Yoh. 13:4-30)
12Aha kiro ky'okubanza ky'Obugyenyi bw'Okuhingurwaho, eki baabaire batambiraho omwana gw'entaama gw'Okuhingurwaho, abatendekwa ba Yesu bakamubuuza bati: Nooyenda tuze kukuteekateekyera hi, ahu oraariire Obugyenyi bw'Okuhingurwaho? 13Atyo yaatuma babiri aha batendekwa be naabagira ati: Nimwirooko muze omu rurembo; nimwija kubuganayo omushaija oyekoreire enyungu y'amaizi; mumukurate. 14Haza mugambire mukama w'enju ei araataahemu, muti: Omwegyesa yaakutumaho ati: Ekishengye kyangye ky'abagyenyi kiri nkahi, eki ndaariiremu Obugyenyi bw'Okuhingurwaho hamwe n'abatendekwa bangye? 15Ogwo mushaija naija kubooreka ekishengye kihango ky'omuri kaanyinaabiri, ekitegwirwe gye, kandi ekirimu byona ebirikwetengwa; okwo mube niyo mwatuteguurira. 16Abatendekwa baagyenda, baataaha omu rurembo, baashanga byona biri nk'oku yaabagambira; baatebeekanisizayo eby'Obugyenyi bw'Okuhingurwaho.
Yesu okugamba oraamureebye
17Omwabazyo ku gwakiikire, Yesu yaija n'eikumi na babiri. 18Mbwenu ku baabaire bari aha meeza nibarya, Yesu yaagira ati: Buzimazima nimbagambira nti: Omwe omuriimwe orikurya naanye naija kundeebya. 19Mpaho baatandika kushaasha, baamubuuza nibakuratana bati: Mbwenu shi, niinye? 20Yaabagarukamu ati: N'omwe omuriimwe eikumi na babiri orikukoza naanye omu shohaani. 21Manya Omwana w'omuntu naija kuba nk'oku kyamuhandiikirweho, kwonka ogwo muntu orikumureebya aryakareeba! Nangwa ogwo muntu kuri atarazairwe!
Yesu okugaburira abatendekwa ekyokurya ky'akaragwa
(Mat. 26:26-30; Luk. 22:15-20; 1 Kor. 11:23-25)
22Mbwenu ku baabaire nibarya, Yesu yaakwata omugaati, yaasiima, yaagucwamu, yaagubaha naagamba ati: Nimutoore; ogu n'omubiri gwangye. 23Bwanyima yaakwata ekikopo; ku yaaherize kusiima, yaakibaha; boona baanywaho. 24Yaabagira ati: Egi n'eshagama yangye ey'endagaano ensya, eraasheeshwe ahabwa baingi. 25Buzimazima nimbagambira nti: Tindinywa bundi ha kirugire omu mizaabibu, okuhitsya obu ndikinywa kiri kisya omu bukama bwa Ruhanga.
Yesu okugambira Petero oku araamwogye
(Mat. 26:31-35; Luk. 22:31-34; Yoh. 13:36-38)
26Ku baaherize kweshongora ekyeshongoro, baaza omu Rushozi rw'Emioliva. 27Mpaho Yesu yaabagira ati: Mwena nimwija kumpemukaho, ahabw'okuba kikahandiikwa ngu: Ndyateera omuriisa, entaama zitaataane. 28Kwonka ku ndaaheze kuzooka omu bafiire, niinyija kubeebembera ninza Galilaaya. 29Petero nikwo kuhiga ati: Boona nobu baraakuhemukyeho, kwonka nyowe tindikwija kukuhemukaho! 30Yesu nawe nikwo kumugira ati: Buzimazima ninkugambira nti: Iwe, eri izooba, eki kiro, enkoko ku eraabe etakagambire kabiri, nooba waanyogire kashatu. 31Kwonka we yaagumizamu naahiga ati: Nobu kuraabe okufa naiwe, nikikabure, tindikwija kukwoga. N'abandi boona baahiga batyo.
Yesu okugirira obujune omuri Getesemaane
(Mat. 26:36-46; Luk. 22:39-46)
32Bakahika omu musiri ogurikwetwa Getesemaane. Yesu yaagambira abatendekwa be ati: Mube mushutami aha, mbe ninshaba. 33Atyo yaatwara Petero na Yakobo na Yohaana; yaatandika kugira obwoba bwingi n'okushoberwa. 34Yaabagira ati: Omutima gwangye gwine enaku z'okuunyita; mugume aha nimureeba. 35Atyo airirayo omu maisho kakye, ajuumara ahansi, ashaba ngu ku kyakuba nikibaasika, egyo shaaha emuhingura. 36Kandi agira ati: Abba, Taata, byona nibikubaasikira. Mbwenu nyihaho eki kikopo; kwonka kitaba nkaanye oku ndikwenda, kureka nkaiwe oku orikwenda.
37Ku yaizire, yaashanga bagwejegyeire; yaagira Petero ati: Simooni, ogwejegyeire? Tiwaabaasa kureeba naanye eshaaha emwe? 38Mureebe kandi mushabe, mutakaagwa omu kwohibwa; manya omutima nigwenda, kwonka omubiri n'omweremwa.
39Atyo agarukayo, ashaba naagamba ebigambo bimwe nka biri. 40Kwonka ku agaruka, ashanga bagwejegyeire, ahabw'okuba amaisho gaabo gakaba garembire; babura eki baamugarukamu.
41Ku agaruka omurundi gwa kashatu, abagira ati: Mbwenu mugumizemu mugwejegyere, muhuumure. Ekyo nikimara; obunaku bwahika Omwana w'omuntu kurekurirwa abasiisi. 42Nimwimukye, tugyende. Reeba, orikundeebya ari haihi!
Yuda okureebya Yesu
(Mat. 26:47-56; Luk. 22:47-53; Yoh. 18:3-12)
43Yesu ku yaabaire naakigamba, haija Yuda, omwe ahari ikumi na babiri, hamwe n'ekimbuuro ky'abantu, bakwaitse zaarurara n'ebikoni, boohereziibwe abahongyerezi abakuru n'abahangu b'eiteeka n'abakuru omu ihanga. 44Obwo egyo ndeebya ekaba yaabahaire akamanyiso neegira eti: Ou ndaanywegyere, biri niwe ogwo, mumukwate, mumutware mumurinzire.
45Mbwenu ogwo mureebya ku aija, ahonaaho ahika Yesu, amugira ati: Mwegyesa! Atyo amunywegyera. 46Reero abo bamutaho engaro, bamukwata. 47Mpaho omwe aha baabaire beemereire aho, asyorayo rurara ye, atema omuheereza w'omuhongyerezi omukuru, amucwaho okutu. 48Bwanyima Yesu abagira ati: Beitu shi, obu murikuunyizira na zaarurara n'ebikoni kunkwata, ndi omwambuzi? 49Buri izooba ka naabaire mba haihi naimwe niinyegyesa omuri Nyaruju, haza mutankwate. Manya eki kyabaho ngu Ebyahandiikirwe bibone kuhikiirizibwa. 50Ago magingo abatendekwa be bamutsigaho, boona bahunga.
51Omutsigazi omwe amukuratira ajwaire omwenda gwa kitaani gwonka bamukwata; 52kwonka we abeesikura, abatsigira ogwo mwenda, ahunga ajwaire busha.
Yesu omu maisho g'omuhongyerezi omukuru
(Mat. 26:57-68; Luk. 22:54-55, 63-71; Yoh. 18:13-14, 19-24)
53Mpaho baatwara Yesu aha muhongyerezi omukuru; abahongyerezi abakuru boona hamwe n'abakuru omu ihanga n'abahangu b'eiteeka baateeranirayo. 54Obwo Petero akaba amukuratiire, amuri hareho, okuhitsya obu baahikire omu kibuga ky'omuhongyerezi omukuru, akashutama n'abarinzi, akoota omuriro. 55Obwo abahongyerezi abakuru n'eishengyero ryona bakaba nibasherura obwamushinja bw'okwomesereza Yesu, ngu babone kumwitisa, kwonka tibaabubona. 56Manya baingi bakaba nibamwomesereza n'obwamushinja bw'ebishuba, kwonka butarikukwatirana.
57Bwanyima abamwe baayemerera, baamwomesereza nibamubeiherera bati: 58Tukamuhurira naagira ati: Ndyasheenya Nyaruju egi eyaayombekirwe emikono y'abantu, haza nyombekye endi omu biro bishatu, etombekirwe mikono y'abantu. 59Hoona obwo nabwo obwamushinja bwabo tiburakwatiraine.
60Omuhongyerezi omukuru nikwo kwemerera ahagati, akabuuza Yesu ati: Toine ki orikugarukamu omuri ebi aba bantu barikukwomesereza? 61Kwonka we yaahunama, tiyaamugarukamu n'akakye. Ogwo muhongyerezi nikwo kugaruka kumubuuza ati: Niiwe Kristo, Omwana w'Ogwo ohimbisibwa? 62Yesu amugarukamu ati: Eego, niinye; kandi nimbagambira nti: Muryareeba Omwana w'omuntu ashutami aha rubaju rwa buryo rw'Ow'obushoboorozi, naizira omu bicu by'omu iguru. 63Omuhongyerezi omukuru nikwo kutaagura ebijwaro bye, akagira ati: Mbwenu shi, nitukyendera ki baamushinja abandi? 64Manya mwayehuririra oku yaarogota! Mbwenu nimuteekateeka muta? Boona baamucwera orubanja bati: Ashemereire kufa.
65Abamwe baatandika kumucwera amacwante n'okumukoma aha maisho, n'okumuteera entomi, nibamugira bati Ragura! Abarinzi nabo baamuteera empi.
Petero okwoga Yesu
(Mat. 26:69-75; Luk. 22:56-62; Yoh. 18:15-18, 25-27)
66Petero ku yaabaire ari eifo omu kibuga, omwe aha bazaana b'omuhongyerezi omukuru yaija, 67yaareeba Petero ari aho naayota; yaamutsimba eriisho, yaamugira ati: Naiwe waaba ori hamwe na Yesu Omunyanazareeti. 68Kwonka we ayehakana ati: Eki orikugamba tindikukimanya, nobu kwakuba okukyetegyereza. Atyo ashohora naatoora ogw'eirembo; haza enkoko egamba. 69Ogwo muzaana amureeba, agaruka agambira abari aho ati: Ogu muntu ni mugyenzi waabo. 70Kwonka nabwo ayehakana. Ku haahingwireho akaanya kakye, abeemereire aho nabo baagambira Petero bati: Buzimazima ori ow'omuri bari, ahabw'okuba ori Omunyagalilaaya. 71Kwonka atandika kwekyeena n'okurahira ati: Ogwo muntu ou murikugamba, nyowe tindikumumanya. 72Ahonaaho enkoko ashubiirira. Petero nikwo kwijuka eki Yesu yaamugambira ati: Enkoko ku eraabe etakagambire kabiri, nooba waanyogire kashatu. Atyo ahimintika emiziga, arira munonga.
Yesu omu maisho ga Pilaato
(Mat. 27:1-2, 11-14; Luk. 23:1-5; Yoh. 18:28-38)
હાલમાં પસંદ કરેલ:
Mar 14: RKK2008
Highlight
શેર કરો
નકલ કરો
Want to have your highlights saved across all your devices? Sign up or sign in
The Bible with Apocrypha in Runyankore-Rukiga, new revised joint translation © The Bible Society of Uganda, 2008.
