Mark 8
8
CHAPTIR AUCHT.
Fowr thoosanʼ fed. What Peter said. Takin up the Cross.
1In thae days, whan again there was a great thrang, and they had naething to eat, Jesus caʼd his disciples, and said to them,
2“I hae pitie on the folk; for they hae been wiʼ me now thrie days, and hae‐na to eat.
3“And gin I send them hungerin awa to their hames, they wull swarf by the way; for a hantle oʼ them come frae far awa.”
4And his disciples answerʼt him, “In whatna gate coud we be able to fill thir men wiʼ bannocks, here in a wilderness?”
5And he speirʼt at them, “Hoo mony bannocks hae ye?” And they said, “Seeven.”
6And he commandit the thrang to lout doon on the grunʼ: and takin the seeven bannocks, and giean thanks, he brak, and gied to his disciples to set afore them; and they set afore the thrang.
7And they had a wheen smaʼ speldrins; and he blessʼt, and had them set them on as weel.
8And they did eat, and war satisfyʼt: and they took up oʼ the broken bits ower, seeven creels‐fuʼ.
9Noo, they that war eatin war aboot fowr thoosanʼ; and he sent them awa.
10And withoot delay, gaun intil a boat wiʼ his disciples, he cam intil the kintra‐side oʼ Dalmanutha.
11And oot cam the Pharisees, and begude to argue wiʼ him; seekin frae him some token frae Heeven — tempin him.
12And deeply maenin in his saul, he says, “Why soud this generation ask a token? Truly say I tʼye, nae token sal be gien till this generation!”
13And he left them, and again launchin oot, cam to the ither side.
14And they forgat to tak laives; nor had they iʼ the boat wiʼ them mair nor ae bannock.
15And he warned them, “Tak tent, beware oʼ the barm oʼ the Pharisees, and the barm oʼ Herod!
16And they war coonsellin amang theirsels, “We hae brocht nae laives!”
17And Jesus, takin tent, says to them, “Why soud ye be quaistenin thegither for that ye hae nae laives! Dae ye no yet see nor understaun? Hae ye yere heart hardened yet?
18“Hae ye een, and see‐na? and lugs, and hear‐na? and dae ye no caʼ to mind?
19“When I brak the fyve bannocks to the fyve‐thoosanʼ, hoo mony baskets‐fuʼ oʼ mools took ye up?” They say to him, “Twal.”
20“And whan the seeven for the fowr‐thoosanʼ, hoo mony creels‐fuʼ oʼ the mools did ye tak up?” And they said, “Seeven.”
21And he says to them, “Dae ye no yet comprehend?”
22And they cam intil Bethsaida; and they bring till him ane blinʼ, and beseech him to touch him.
23And he laid haud oʼ the blinʼ man by the haun, and brocht him forth oot oʼ the toun; and whan he had putten spittle on his een, and putten his hauns on him, he speirʼt at him, “Dae ye see aucht?”
24And he lookit up, and said, “I see men; for they are like trees, walkin aboot!”
25And again #8:25 The man needit faith mair nor he needit sicht; and aiblins it was necessar to wauken his faith. A hantle oʼ folk are that gate!he pat his hauns on his een, and he saw clearly and was restored; seeinʼ aʼ things in splendor.
26And he sent him awa till his hame; sayin, “Naither gang intil the toun, nor tell it to ony in the toun!”
27And Jesus gaed, and his disciples, intil the touns oʼ Philipʼs Cesarea; and iʼ the way he says to his disciples, “Wha dae man say I am?”
28And they answerʼt, “John the Baptist; but ithers Elijah; and a wheen, ane oʼ the Prophets.”
29And he speirʼt at them, “Wha say ye I am?” Peter answers and says to him, “Thou art the Anointit Ane!”
30And he straitly chairged them to tell nae man oʼ him.
31And he begude to schaw them that the Son oʼ Man maun dree mony things, and be rejeckit oʼ the Elders, and the Heid‐priests, and the Scribes, and be slain; and eftir thrie days to rise again.
32And he was speakin this thing freely. Than Peter, takin him in haun, begude to repruve him.
33But he, turnin aboot, and fixin his een on the disciples, rebukit Peter, sayin, “Get you ahint me, Sautan! for ye are na seekin the things oʼ God, but the things oʼ men!”
34And caʼin till him the thrang, wiʼ his disciples, he said to them, “Wha ettles to follow me, lat him deny his ain sel, and tak up his cross, and come eftir me!
35“For whasae fain wad save his life, sal tine it; but whasae sal tine his life for the sake oʼ me and the Gude‐Word, sal save it!
36“For what sal a man be betterʼt, gin he win the hail warld, and tine his ain saul?
37“For what may a man gie, to niffer for his saul?
38“For whasae sal think shame oʼ me and my words, in this fause and sinfuʼ generation, the Son oʼ Man sal eke be ashamed oʼ him, whan he comes iʼ the glorie oʼ the Faither wiʼ the holie angels.
اکنون انتخاب شده:
Mark 8: SCO1904
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Translated by Rev William Wye Smith. Published in Paisley, Scotland in 1904.
