Mat 2

Acalendo ŵakutyocela kungopoko lyuŵa

1Yesu* ŵapagwile msinda wa Betelehemu, mcilambo ca Yudeya, pa ndaŵi jelejo Helodi* ŵaliji mwenye jwa cele cilamboco. Pa jele ndaŵijo, ŵandu ŵane ŵalunda, ŵakumanyilila mnope ya ndondwa, ŵayice ku Yelusalemu kutyocela kungopoko lyuŵa. 2Jemanjajo ŵaliji mkuwusya kuti, “Ana ali kwapi mwanace jwapagwilejo kuti aŵe mwenye jwa Ayuda? Uwe twajiweni ndondwa jakwe pijakopokaga kungopoko lyuŵaku nipo tuyice kukumlambila jwalakwejo.”

3Mwenye Helodi piŵapikene yeleyi, yampwetece mnope mu mtima mwakwe, nombe nawo ŵandu wosope ŵa mu Yelusalemu yapwetece. 4Sambano Helodijo ŵaŵilasile pampepe acakulungwa wosope ŵa ŵakutaga mbopesi ni aciŵalimu ŵa Malamusi* nipo ŵawusisye kuti, “Ana pepala ateje Mkulupusyo jwakulocesyedwa ni Mlungu jula tacipagwila kwapi?”

5Jemanjajo ŵatite, “Mu msinda wa Betelehemu, mcilambo ca Yudeya. Pakuti ayi ni yiŵalembile jwakulocesya* kuti:

6‘M'mwe Betelehemu ŵa mcilambo ca Yuda,#Mik 5:2

nganimŵa kose ŵanandi pasikati pa acakulungwa ŵakulamulila Yudeya.

Pakuŵa kwenumwe tikucityocela jwakulamulila

jutaciŵa jwakwacinga ŵandu ŵangu Aisalaeli.’ ”

7Papopo Helodi ŵaŵilanjile pacisyepela acalendo ŵa kungopoko lyuŵa ŵala, ni ŵawusisye ya ndaŵi jisyesyene jiŵajiwonele ndondwajo. 8Kaneko ŵatumisye ku Betelehemu acasalilaga kuti, “Jawulagani, mkawusye ya mwanacejo, naga mkasimane mkayice soni kukumanyisya kuti none jwakwe njawule kukumlambila.”

9Ŵandu ŵala piŵapikene maloŵe ga mwenye gala, ŵanyakwice. Ali agambile kutyoka, ŵajiweni soni ndondwa jiŵajiweni kungopoko lyuŵa jila. 10Piŵajiweni ndondwajo, ŵasangalele ni lukondwa lwakupundanganya mnope. Ndondwajo jaliji pasogolo pawo kwalongolela mpaka jajile kwika ni kuja kwima penani pa malo pijwaliji mwanacejo. 11Jemanjajo ŵajinjile m'nyumbamo, piŵam'weni mwanacejo ali ni Maliya mamagwe, papopo ŵatindiŵele ni ŵamlambile mwanacejo. Kaneko ŵagopwele yipanje yawo, ni ŵampele mituka ja golidi,* ubani* ni mawuta gakununjila mnope ga mule.*

12Mlungu ŵakalamwisye jemanjajo mu sagamisi kuti akasapitila soni kwa Helodi kula, myoyo ŵapitile litala line pakuwujila kumangwawo.

Acinangolo ŵa Yesu ŵatilile najo ku Iguputo

13Piŵatyosile ŵandu ŵalunda ŵakumanyilila mnope ya ndondwa ŵala, lilayika lya Ambuje lyamwonecele Yosefe musagamisi ni lyatite kuti, “Mnyakuce mumjigale mwanaceju ni mamagwe, mtilile ku Iguputo. Mkatame kweleko mpaka patinjimsalila, pakuŵa Helodi tacimsosasosa mwanaceju kuti amwulaje.”

14Papopo Yosefe ŵanyakwice cilo cicoco, ni ŵamjigele mwanacejo ni mamagwe kwawula ku Iguputo. 15Kuŵajile kutama mpaka piŵawile Helodi. Ayi yatendekwe pakwanilisya kuŵa yakuwona yiŵaŵecete Ambuje mwa jwakulocesya* jwawo kuti, “Namŵilasile mwanangu kuti akopoce mu Iguputo.”#Hos 11:1

Helodi ŵawuleje ŵanace ŵamakandi

16Helodi piŵayiweni kuti ŵandu ŵalunda ŵakumanyilila mnope ya ndondwa ŵa kungopoko lyuŵa ŵala ŵamloŵesye, nipo ŵapile mtima. Ŵatumisye ŵandu ku Betelehemu ni ku misi josope jakusyungulila, kuti akawulaje ŵanace ŵa acalume wosope ŵa yaka yiŵili ni makandi gakwe. Yaka yeleyi ŵaŵalanjile pakuya yiŵatite pakwapikana ŵandu ŵalunda ŵakumanyilila mnope ya ndondwa ŵa kungopoko lyuŵa ŵala ya ndaŵi jele jemanjajo jiŵajiwonele ndondwa jila.

17Pelepo yatendece yiŵaŵecete jwakulocesya Yelemiya kuti,

18“Maloŵe gakupikanika ku Lama,#Yel 31:15

kulila ni kugumila kwakukulungwa.

Lakelo akulilila ŵanace ŵakwe

jwalakwejo akukana kuti ŵandu ampembece,

pakuti ŵanace ŵakwe wosope awile.”

Acinangolo ŵa Yesu ŵawusile kutyocela Iguputo

19Helodi piŵawile, lilayika lya Ambuje lyamwonecele Yosefe mu sagamisi ku Iguputo. 20Ni lyamsalile kuti, “Mnyakuce, mumjigale mwanaceju ni mamagwe, mwujile ku cilambo ca Isalaeli, pakuti ŵele ŵiŵasakaga kumwulaga mwanaceju ŵawile.” 21Myoyo Yosefe ŵanyakwice, ni ŵamjigele mwanace ni mamagwe nipo ŵawujile ku cilambo ca Isalaeli.

22Nambo Yosefe piŵapikene kuti Alikilawosi ni juŵaliji mwenye jwa ku Yudeya juŵajinjile m'malo mwa Helodi, babagwe, ŵajogwepe kwawula kweleko. Nipo ligongo lyakuti Mlungu ŵamsalile yejinji ni kumkalamusya musagamisi, jwalakwe ŵajawile ku mbali ja ku Galileya. 23Kweleko ŵajile kutama msinda wine lina lyakwe Nasaleti, pakwanilisya maloŵe giŵaŵecete ŵakulocesya kuti, “Tacikolanjidwa Mnasaleti.”#Mak 1:24; Luk 2:39; Yoh 1:45#2:23 Mnasaleti: Pa ciŵeceto ca Ciyuda liloŵe lyakuti Nasaleti ligopolela kuti cakusipucila. Maloŵe gelega gakusala ya pa Yes 11:1. Alole soni pa Yes 53:2; Luk 2:4.

Actualmente seleccionado:

Mat 2: YAWO

Destacar

Copiar