Mat 3

Kulalicila kwa Yohane M'batisi

(Mak 1:1-8; Luk 3:1-18; Yoh 1:19-28)

1Pagele masikugo Yohane M'batisi ŵayice ni ŵatandite kulalicila mcipululu ca ku Yudeya. 2Ŵatiji, “Mpitikuce mitima jenu ni kuleka kutenda ulemwa, pakuti Ucimwene wa kwinani uŵandicile.”#Mat 4:17; Mak 1:15 3Jwakulocesya* Yesaya ŵaŵecetaga ya Yohaneju piŵatiji kuti,#Yes 40:3

“Jwine jwakwe akugumila mcipululu, akusala kuti,

‘Kolosyani litala lyakupita Ambuje;

jongolani matala gakuti apitemo!’ ”

4Yohaneju ŵaliji mkuwala yakuwala yamanyunya ga ngamila,* nipo ŵataŵilaga lamba jwa lipende mciwunu mwakwe. Yakulya yakwe yaliji sombe ni uci wa mwitinji.#2 Ayi 1:8 5Ŵandu ŵakutyocela ku Yelusalemu ni ku upande wosope wa Yudeya, nipo soni ŵa mbali syosope syakusyungulila Lusulo lwa Yolodani ŵayikaga kwa jwalakwejo. 6Jemanjajo ŵapesyaga ulemwa wawo, nipo jwalakwejo ŵabatisyaga jemanjajo mu Lusulo lwa Yolodani.

7Ayuda ŵajinji ŵa m'makuga ga Afalisi* ni Asaduki* nombe nawo ŵayice kwa jwalakwe kukubatisidwa, nambo Yohane piŵaweni jemanjajo ŵatite, “Jemanja ŵanace ŵa majoka, ana ŵani ŵamkalamwisye kuti mtile cilango ca Mlungu cacikwisaci?#Mat 12:34; 23:33 8Tendanitu masengo gatigamlosye kuti kweli jemanja mpitikwice mitima. 9Nipo m'mitima mwenu kasim'wanicisyaga kuganisya kuti mpaka mkulupuce ku cilango ca Mlungu pakulikwesya mcisalaga kuti, ‘Nangolo jwetu ni Abulahamu.’* Pakuŵa ngumsalila kuti Mlungu mpaka apakombole kugatenda maganga gali apaga kuti gaŵe ŵanace ŵa Abulahamu.#Yoh 8:33 10Sambano jino liŵago liŵicidwe cile pepata. Myoyo citela cilicose cangasogola yisogosi yambone, tacicikata ni kuciponya pa moto.#Mat 7:19 11Une ngusinam'batisya jemanja ni mesi, kulosya kuti mpitikwice mitima. Nambo jwele jwakwisa panyuma pangujo tacimbatisya jemanja ni Msimu Ŵaswela ni moto. Jwalakwejo ali jwamkulungwa kumbunda une, mwakuti nganguŵajilwa kunyakula sapato syakwe. 12Akamulile kala m'myala mwakwe lupeta lwakuti apetele tiligu jwakwe. Myoyo jwalakwejo tacitaga tiligujo mu ngokwe, nambo masapi tacigajoca m'moto wangasima.”

Ubatiso wa Yesu

(Mak 1:9-11; Luk 3:21-22; Yoh 1:32-34)

13Pandaŵi jelejo, Yesu* ŵayice kutyocela ku Galileya kuja kwa Yohane ku Lusulo lwa Yolodani, kuti akabatisidwe ni Yohanejo. 14Nambo Yohane ŵalinjile kana acitiji, “Une ni junguŵajilwa kubatisidwa ni ŵalakwe, nambi yikuti uli soni kuti wawo akwisa kwa une?”

15Nambo Yesu ŵajanjile kuti, “Kundani sambano jino, ligongo naga tukutenda myoyo, tukwanilisye yosope yiŵasacile Mlungu.” Myoyo Yohane ŵakundile.

16Nipo Yesu piŵagambile kubatisidwa, ŵacuwice m'mesimo. Papopo kwiwunde kwawugwice, nipo ŵawuweni Msimu wa Mlungu ucitulukaga wele uwonece wakwe waliji mpela ngunda nipo watusile pa jwalakwejo. 17Sambano maloŵe gakuwuma kwiwundeko gapikanice gacitiji, “Aju ni Mwanangu jwa pamtima. Ngusasengwa najo mnope.”#Gen 22:2; Mas 2:7; Yes 42:1; Mat 12:18; 17:5; Mak 1:11; Luk 9:35

Actualmente seleccionado:

Mat 3: YAWO

Destacar

Copiar