Mat 4

Yesu ŵalinjidwe ni Satana

(Mak 1:12-13; Luk 4:1-13)

1Panyuma pa yeleyi, Msimu wamlongolele Yesu* kwawula ku cipululu kuti akalinjidwe ni Satana.*#Aheb 2:18; 4:15 2Kwa masiku makumi mcece Yesu nganalya kandu kalikose musi ni cilo, mwakuti jamkwete sala. 3Sambano Satana jwayice kwa Yesu ni kumsalila kuti, “Naga mli mwanace jwa Mlungu, mgalamule magangaga kuti gaŵe mkate.”

4Nambo Yesu ŵajanjile kuti, “Malemba galembedwe kuti, ‘Mundu ngaŵa mkuŵa ni umi ligongo lya mkatepe, nambo ni maloŵe gosope gakusaŵeceta Mlungu.’ ”#Det 8:3

5Kaneko Satana ŵamjigele Yesu kwawula najo ku Yelusalemu, Msinda Weswela. Nipo ŵamjimice penani pa Nyumba ja AMBUJE,#Mas 91:11-12 6ni ŵamsalile kuti, “Naga yili yakuwona kuti mli Mwanace jwa Mlungu, mliponye pasi. Pakuti yilembedwe m'Malemba kuti:

‘Mlungu tacilamulila malayika* gakwe kuti gamsunje,

nipo tigacimjangata m'myala mwawo,

kuti mkaligombesya sajo syenu pa liganga.’ ”#Mas 91:11-12

7Nambo Yesu ŵatite, “Malemba gakuti soni, ‘Mkasimumlinga Ambuje, Mlungu jwenu.’ ”#Det 6:16

8Pakumalisya, Satana ŵamjigele Yesu kwawula najo kwitumbi lyelewu mnope, nipo kweleko ŵamlosisye ucimwene wosope wapasi pano ni ukulungwa wakwe. 9Sambano Satanajo ŵamsalile Yesu kuti, “Yosope yeneyi tinjimpa naga mkukunda kundindiŵalila ni kulambila une.”

10Papopo Yesu ŵatite, “Mtyoce apa, Satana! Pakuti yilembedwe m'Malemba kuti, ‘Mumlambileje Ambuje, Mlungu jwenu, ni kwatumicila ŵelewo pewo.’ ”#Det 6:13

11Pelepo Satana jula ŵamlesile Yesu, nipo malayika gayice ni kumkamucisya Yesujo.

Yesu ŵagatandite masengo gakwe ku Galileya

(Mak 1:14-15; Luk 4:14-15)

12Yesu piŵapikene kuti Yohane* ŵamponyisye m'nyumba ja ukayidi, ŵapite ku Galileya.#Mat 14:3; Mak 6:17; Luk 3:19-20 13Ni ŵatyosile ku Nasaleti kuja kutama ku Kapelenaumu, msinda wine wa mungulugulu Nyasa ja Galileya, mu mpika mwa mbali ja Sebuloni ni Nafutali.#Yoh 2:12 14Yeleyi yatendekwe kuti gakwanile maloŵe giŵaŵecete jwakulocesya* Yesaya kuti,

15“M'mwe cilambo ca Sebuloni ni cilambo ca Nafutali,

petala lya ku nyasa, pesi pa Yolodani,

ku Galileya, cilambo ca ŵandu ŵa mitundu jine!*#Yes 9:1-2

16Ŵandu ŵakutama mu cipi,

aliweni lilanguka lyekulungwa.

Ŵandu ŵakutama mcilambo ca cipi camti bii

mpela cilambo ca ciwa,

lilanguka lyasimene.”

17Kutandila jele ndaŵijo Yesu ŵatandite kulalicila kuti, “Mpitikuce mtima, pakuti Ucimwene wa kwinani uŵandicile.”#Mat 3:2

Yesu ŵaŵilasile ŵandu mcece ŵakuwulaga somba

(Mak 1:16-20; Luk 5:1-11)

18Yesu piŵaliji mkwenda mungulugulu mwa Nyasa ja Galileya, ŵaweni ŵandu ŵaŵili ŵanakajumo, Simoni* jwakolanjidwa Petulo* ni Andileya,* mpwakwe ŵiŵaliji kuwulaga somba pakukamulisya masengo makoka. Pakuti ŵaliji ŵakutanjisya somba. 19Yesu ŵasalile kuti, “Jemanja myice, munguye une, nipo tinimjiganye kuŵa ŵakwajigalila ŵandu kwa une mpela yimkuti pakutanjisya somba.” 20Papopo jemanjajo ŵalesile makoka gawo ni ŵamkuyisye.

21Piŵatyosile pa malopo kuja pasogolo, Yesu ŵaweni ŵandu ŵane soni ŵaŵili ŵanakajumo, Yakobo* ni Yohane,* ŵanace ŵa Sebedayo. Jemanjajo ŵaliji mwiboti pampepe ni baba ŵawo, ali mkulinganya makoka gawo, Yesu ni ŵaŵilasile. 22Papopo jemanjajo ŵalesile liboti lyawo ni baba ŵawo ŵala, ni ŵamkuyisye Yesu.

Yesu ŵaliji mkwiganya, kulalicila ni kwaposya ŵakulwala

(Luk 6:17-19)

23Yesu ŵajesile mcilambo cosope ca Galileya acijiganyaga m'nyumba sya mapopelo ni kulalicila Ngani Syambone* syakwamba Ucimwene wa Kwinani. Ŵaliji mkuposya soni yilwele yosope ya ŵandu ni yakupweteka ya myilu yawo.#Mat 9:35; Mak 1:39 24Mbili jakwe jajenele mcilambo cosope ca Siliya, mwakuti ŵandu ŵayikaga nawo kwa jwalakwe, ŵakulwala wosope ŵiŵaliji mkulaga ni yilwele ni yakupweteka yakulekanganalekangana, ŵandu ŵakamulwa ni misimu jakusakala,* ŵamjilinjili ni ŵalemale, jwalakwe ŵaposyaga. 25Ŵandu ŵajinji ŵamkuyaga kutyocela ku Galileya, ku dela jakolanjidwa Misinda Likumi,* ku Yelusalemu, ku Yudeya ni pesi pa Lusulo lwa Yolodani.

Actualmente seleccionado:

Mat 4: YAWO

Destacar

Copiar