Iesu ein Canolwr

Drwy’r wythnos hon dŷn ni wedi gweld Iesu’n estyn allan at y tlawd, y gorthrymedig, yr ofnus, y pechadurus, pawb sydd ar y cyrion gan gymdeithas. Yn y weithred eithaf o eiriolaeth, ei farwolaeth, a'i atgyfodiad, cymerodd y gosb am ein holl bechodau er mwyn i ni gael ein cymodi â Duw unwaith ac am byth.

Yn yr Africa Study Bible cymer olwg ar “Jesus, Humanity’s Mediator”:

Mae bod yn ganolwr yn rhan annatod mewn diwylliannau Affrica, ac yn arf pwerus, ar gyfer datrys gwrthdaro. Yn draddodiadol, trefnwyd y rhan fwyaf o briodasau Affricanaidd ym mhresenoldeb rhieni bedydd. Roedd y rhain yn bobl y byddai'r cwpl yn mynd atyn nhw pe bai problem ble roedd angen canolwr. Pan fydd cymunedau mewn gwrthdaro heddiw, mae henuriaid y ddwy ochr yn cyfarfod ym mhresenoldeb trydydd parti i drafod heddwch. Pan fydd cenhedloedd yn rhyfela, mae'r Cenhedloedd Unedig yn anfon cenhadon heddwch i geisio dod â'r elyniaeth i ben. Mae rhieni bedydd, trydydd parti, a chenhadon heddwch i gyd yn cyflawni rôl canolwyr. Maen nhw’n gweithredu fel canolwyr rhwng partïon sy'n gwrthdaro i helpu i adfer cytgord a heddwch.

Daeth Crist yn ganolwr - canolwr perffaith. Roedd yn ddibechod ac yn ddieuog o'r troseddau a gyflawnwyd gennym ni. Ac eto fel canolwr rhwng y pwerus a'r di-rym, fe gymerodd ein lle ni.

Talodd Crist y pris eithaf ac yna addawodd na fyddai pwy bynnag sy’n credu ynddo yn cael y gosb honno. Yn hytrach, mae person sy'n credu ynddo yn derbyn bywyd tragwyddol. Trwy Grist, a thrwyddo ef yn unig, y gall pobl fod mewn heddwch â Duw. “Mae am iddyn nhw ddeall mai un Duw sydd, ac mai dim ond un person sy'n gallu pontio'r gagendor rhwng Duw a phobl. Iesu'r Meseia ydy hwnnw, ac roedd e'n ddyn. Rhoddodd ei fywyd yn aberth i dalu'r pris am ollwng pobl yn rhydd. Daeth i roi tystiolaeth am fwriad Duw ar yr amser iawn” (1 Timotheus 2:5-6).

Myfyria neu Drafod

Pam fod angen cael Iesu’n ganolwr

Gwasanaethodd Iesu fel y canolwr perffaith, gan gymryd y gosb yr oeddem yn ei haeddu am ein pechodau. Pam wyt ti'n meddwl bod Iesu'n fodlon gwneud hyn droson ni?

Wyt ti mewn heddwch â Duw? Os na, beth yw'r unig ffordd rwyt ti’n gallu cymodi ag e?

Os nad wyt wedi ymddiried yn Iesu, canolwr mawr y ddynoliaeth, paid gadael i ddiwrnod arall fynd heibio heb ddod o hyd i rywun a all weddïo gyda thi am hyn.