Ціхая ноч: Атрымайце супакой ад Ісуса гэтым РаствомУзор

Дзень пяты: Спадзявайся на Ягоную вернасьць.

«Ці ты давяраеш Мне?»

Гэтае пытаньне стаіць перад намі штодня, ад моманту, калі мы прачынаемся, да моманту, калі мы засынаем. Бо давяраць – гэта значыць адпачываць, а адпачываць – гэта значыць давяраць.

Паразважайце над наступным: вы не паставілі б вашую калядную ялінку ў падстаўку, якой не стае адной ножкі, і вы не папрасілі б чалавека, які заўсёды спазьняецца, прынесьці закуску на калядную вечарыну.

Нават калі мы таго не заўважаем, мы ўвесь час ацэньваем надзейнасьць рэчаў ды людзей навокал. Мы робім тое ж самае і ў нашых узаемаадносінах з Богам, ледзь заўважна намагаючыся вырашыць, наколькі мы можам даверыцца Яму.

Ці то зь фінансамі, ці то з падарванымі адносінамі, ці то са схаваным болем альбо з марамі аб будучыні, мы ацэньваем мінулую вернасьць Бога, каб вызначыць, ці мы можам давяраць Яму цяпер.

Але менавіта сярод усёй гэтай сьвяточнай мітусьні становіцца бачным наш давер альбо недавер.

Мы будзем напіхвацца печывам, пірагамі ды каўбасамі, калі мы ня верым, што Ісус ёсьць Хлебам Жыцьця, Які задавальняе нашыя найглыбейшыя жаданьні.

Мы будзем турбавацца пра нашае марнатраўнае дзіцё, калі мы ня верым, што Ісус ёсьць Добрым Пастарам, Які вядзе дадому авечак, што заблукалі.

Мы будзем патанаць у адзіноце, адчуваючы, што ўсе забыліся на нас, калі мы ня верым, што Ісус ёсьць Эмануэлем – Богам, Які знаходзіцца з намі нават калі мы адны.

Мы будзем з усяе сілы намагацца стварыць беззаганнае Раство, калі мы ня верым, што Ісус ёсьць Сьвяты Бог, Які робіць нас беззаганнымі.

Кожная хвіліна дорыць нам новую магчымасьць даверыцца Божае вернасьці мільёнамі маленькіх спосабаў, і тое пачынаецца з вучэньня як адпачываць.

Што б здарылася, калі б заміж таго, каб акунацца з галавой у нашыя занятыя дні, мы пачыналі б кожную раніцу з простага практыкаваньня адпачынку. Навучайма, як тое робіць псальміст, нашыя душы адпачываць выключна ў Ім: памятаць Ягоныя дзеі ды Ягоную дабрыню, выказваць нашую патрэбу ў Ім, супакойваць наш розум ды сэрца ў Ягонай прысутнасьці ды абвяшчаць нашую ўпэўненасьць у Ягонай вернасьці.

Бо Той, Хто стварыў сьвет словам, аднак у тую сьвятую, радасную, ціхую ноч прыйшоў у яго бездапаможным дзіцёнкам, здолее словам прынесьці мір ды супакой у нашае жыцьцё сёньня.

Пытаньні на разважаньне: Якія імёны Ісуса прамаўляюць да вас і да канкрэтных цяжкіх абставінаў, у якіх вы цяпер знаходзіцеся? Як выглядае для вас давяраць Ісусу ды адпачываць у Ім гэтым Раством? Што б вы зрабілі інакш?

Хаціце яшчэ? Спампуйце Unwrapping the Names of Jesus (Адкрываючы імёны Ісуса) ды атрымайце малітвенны дзёньнік, закладку ды малітву аб калядным адпачынку, якую можна раздрукаваць.