Ціхая ноч: Атрымайце супакой ад Ісуса гэтым РаствомУзор

Дзень другі: Памятай Ягоную дабрыню.

Кожны з нас хварэе на душэўную амнэзію, бо мы хутка забываемся, хто такі Бог ды што Ён зрабіў дзеля нас. Я, гэтаксама як вы, мушу нагадваць сабе штогод, хто такі Ісус і чаму Ягонае нараджэньне такое цудоўнае – не таму, што мой розум гэтага ня ведае, а таму, што маё сэрца перастае дзівавацца. Кажуць, што блізкае знаёмства вядзе да пагарджаньня, і на жаль нашыя сэрцы маюць схільнасьць страчваць пачуцьцё дзіва.

Часткова з гэтае прычыны Ізраільцянам было загадана рэгулярна ўзгадваць Божыя цуды: каб яны ды іхнія дзеці не забыліся, а таксама каб Божая блізкасьць ды сіла заставаліся сьвежымі ў іхняй памяці.

Чакаючы сьвяточную пару ды ўсялякія падрыхтаваньні, што яе суправаджаюць, лёгка згубіцца ў стварэньні нашых уласных маленькіх зімовых краёў дзівосаў. Таму мы павінны сумысьля ўзгадваць Божую дабрыню: Хто ён ёсьць ды што Ён зрабіў.

Адзін са спосабаў тое зрабіць – гэта разважаць над імёнамі Ісуса, смакуючы сьвяточную пару праз усьведамленьне таго, што Ён заўсёды знаходзіцца побач з намі нават цяпер.

Таксама, як пакручваньне бліскучага дыяманту на сонечным сьвятле, разважаньне над імёнамі Ісуса прымушае нас захапляцца шматлікімі гранямі Ягонага характару, кожная зь якіх прыгожая ўжо сама па сабе, але разам усе яны займаюць нам дух, бо складаюць цудоўны вобраз Божага Сына, Які стаў чалавекам дзеля таго, каб збавіць нас.

Таму я запрашаю вас зараз спыніцца на хвіліну ды ўзгадаць Божую дабрыню, засяродзіўшы вашую ўвагу на Ісусавых імёнах, запісаных у адным з найбольш вядомых прароцтваў аб нашым Збаўцы:

Ісус ёсьць Эмануэлем, што значыць «з намі Бог». Стваральнік, Якому належыць уся слава, сіла ды ўлада, выбраў прыйсьці ў наш сьвет маленькім дзіцём, каб жыць са сваім любым народам ды аднавіць адносіны з чалавецтвам.

Ісус ёсьць Божым словам. Божае Слова – гэта поўнае адкрыцьцё ды зразумелае перадаваньне інфармацыі ад Бога, найпрасьцейшае ды асабістае паведамленьне, якое Бог змог нам даць, даступнае ўсім тым, хто Яго шукае.

Ісус ёсьць Божым Сьвятым. Ён бліскучы ў велічнасьці, моцны ва ўладзе, дасканала бязгрэшны. Ягоная сьвятасьць не зьяўляецца нам пагрозай, а дае нам падставу на надзею, бо толькі Ён апранае нас у боскую праведнасьць.

Запрашэньне: Якое зь імёнаў Ісуса найбольш кідаецца вам у вочы? Спынецеся на хвілінку ды паразважайце над багацьцем Ягонае натуры, а потым падрабязна пералічэце або занатуйце як канкрэтна Ягонае Імя пасуе вашым цяперашнім абставінам.