Ціхая ноч: Атрымайце супакой ад Ісуса гэтым РаствомУзор

Дзень чацьверты: Шукай Ягонага супакою.

Ці вы адчувалі калі-небудзь, як Сьвяты Дух падахвочвае вас узяць перапынак ад сьвяточнай падрыхтоўкі ды пасядзець трохі ў Ісусавай прысутнасьці, толькі каб адкінуць тое як няважнае ды засяродзіцца на наступным заданьні з вашага сьпісу?

Са мной такое здаралася ня раз.

Мы часта ляцім стрымгалоў насустрач сьвятам, прачынаючыся рана ды кладучыся спаць позна, намагаючыся выкарыстаць кожную гадзіну дня як найлепш. А потым мы настолькі зьнясіленыя ўсёй нашай энэргічнай дзейнасьцю, што мы насілу атрымліваем асалоду ад прыгажосьці сьвяточнае пары.

І часам гэткая занятасьць насамрэч зьяўляецца маскай, каб схаваць глыбейшы боль. Абы толькі быць занятымі, тады нам ня прыйдзецца думаць аб ранах, якія нявечаць нас. Мы баімся супакою, таму мы выконваем усе заданьні, нягледзячы на тое, што падпарадкаваньне тыраніі пільнасьці пагражае зруйнаваць нас.

Адрачыся ад традыцыяў і стаць Грынчам – не рашэньне. Заміж таго, мы павінны ўлучаць моманты супакою ў нашую занятасьць, каб мы маглі працаваць, зыходзячы з цэласьці ды адпачынку. Праўда ў тым, што Божае збаўленьне прыходзіць да нас тады, калі мы каемся ды адпачываем, Ягоная сіла – тады, калі мы спакойныя ды даверлівыя.

Адважцеся супакоіцца гэтым Раством, нават калі ўсяго толькі на дзьве хвіліны штодня. Прынясеце ваш сьпіс заданьняў да Госпада ды пакладзеце яго каля Ягоных ног. Атрымайце асалоду ад Ягонай прысутнасьці, разважаючы над Ягонымі імёнамі, ды дазвольце Яму загаіць глыбокія раны.

Абвяшчайце, што Ён – Бог над вашым жыцьцём; выказвайце, як адчайна Ён патрэбны вам; дазвольце сабе перапыніцца. Атуліцеся Ягонай прысутнасьцю.

Ён Эмануэль – з намі Бог. Ён бачыць. Ён ведае. Ён чуе. Дазвольце Яму супакоіць вас Сваёй любоўю.

Малітва: Супакой маё сэрца Тваёй любоўю, Госпадзе. Прамоў слова супакою ў маё жыцьцё, так як Ты словам суняў бурлівае мора. Прынясі аздараўленьне ды аднаўленьне майму сэрцу, поўнаму болю ад страты блізкага чалавека, ад перажываньня трагедыі або траўмы, ад страчаных спадзяваньняў ды зьнішчаных мараў. Ты, Уваскрасеньне ды жыцьцё, падзьмі новае жыцьцё ў гэтыя памерлыя часткі маёй душы. Узбудзі ўва мне новую надзею на будучыню. Навучы мяне адпачываць у Тваёй прысутнасьці, якая дае жыцьцё. Амін.