7 рэчаў, якія Біблія кажа пра гадаваньне дзяцейУзор

Я малодшая зь дзьвюх дачок у маёй сям’і, таму маё маленства было поўнае лялек зь іхнымі бясконцымі падвячоркамі з гарбатай, гатаваньнем у нашай цацачнай кухні й прыбіранкамі - усё тое было дастаткова спакойнымі ды бясьпечнымі заняткамі добра выхаванае дзяўчынкі. Цяпер я зьяўляюся маці двух хлопцаў, якім менш за пяць гадоў, і мая хата зусім не выглядае так, як яна выглядала, калі я была малая. Малітвы за маіх дзяцей сталі абавязковаю часткаю майго мацярынскага падарожжа, галоўным чынам празь бязьмежную энэргію маіх хлопцаў. Як мяне й папярэдзіла была мая сьвякруха пра жыцьцё з аднымі хлопцамі, я ў хуткім часе ведала ўсіх мэдсясьцёр з аддзелу першае дапамогі па імёнах!

Мне здаецца, што я ніколі сабе не ўяўляла, што ўсяго толькі празь некалькі гадоў гэтага падарожжа, я мелася ўбачыць, як мой старэйшы сын упаў тварам долу (яму потым трэба было лячыць каранёвы канал зуба), а потым, усяго толькі праз год, ён упаў галавой (рэзультат: тры сашчэпкі). Я таксама ніколі сабе не ўяўляла, што маё дзесяцімесячнае немаўля будуць апэраваць праз хваробу, зь якой яно нарадзілася. Усё тое было цалкам па-за маім кантролем. Не было нічога такога, што я магла б зрабіць, каб прадухіліць гэныя здарэньні - усьведамленьне гэтага прымусіла мяне пачаць кленчыць у малітве за маіх дзяцей.

Нашыя дзеці зьяўляюцца падарункамі ад Бога, і як іхныя бацькі мы мусім забясьпечваць іх, абараняць іх, паказваць ім Ісусаву любоў ды ласку, а таксама рыхтаваць іх да іхняга ўласнага будучага падарожжа па жыцьці. Мы не абіраем і ня маем кантролю ані над штодзённымі абставінамі, ані над агульным шляхам іхняга жыцьця. Дык што тады нам, бацькам, застаецца рабіць, калі мы прыклалі ўсе намаганьні, каб выгадаваць добрых, ветлівых, дзяцей, якія любяць Бога, і каб яны былі здаровыя й жылі ў бясьпецы? Мы можам аднесьці ўсе свае турботы, сумневы ды няспраўджаныя спадзяваньні да Бога - удзячныя Яму за тое, што мы ня мусім мець кантроль над усім.

Дык хай мы ніколі ня стомімся маліцца за нашых дзяцей ды трымаць іх на адкрытых далонях праз давер і веру ў нашага Творцу, Які любіць нашых дзяцей больш, чым мы здолеем любіць іх, і трымае іх у Сваіх моцных руках.

Ліса Грэй,

загадчыца перакладніцкага аддзелу YouVersion