Зьнішчэньне крыптаніту з Джонам Біўірам.Узор

Памятаеш Анжэлу з учарашняга чытаньня? Як мы ўжо даведаліся, ейная жанімская здрада зьяўляецца вобразам ідалапаклонства. Ці гэтая праблема сапраўды зьяўляецца актуальнаю для сучаснае царквы? На жаль, гэта так.

Корань жанімскае здрады Анжэлы - ейнае жаданьне, або хцівасьць.

У сучасным грамадзтве ня часта кажуць пра хцівасьць, таму дазволь мне патлумачыць гэтае слова. Слоўнік дае наступнае азначэньне: “Празьмернае імкненьне задаволіць якое-небудзь жаданьне.” А зараз дазволь мне падзяліцца яшчэ адным поглядам на хцівасьць паводле Каласянаў 3:5, дзе Павал кажа: “Дык умярцьвеце члены вашыя, што на зямлі: распусту, нячыстасьць, жарсьць, благое пажаданьне і хцівасьць, якая ёсьць ідалапаклонствам.”

Бачыш? Павал кажа, што хцівасьць - гэта ідалапаклонства! Мы можам асацыяваць ідалапаклонства са статуямі ды падобнымі да іх рэчамі, але корань ідалапаклонства - гэта няправеднае жаданьне.

Бог даў нам ключ да пераадольваньня хцівасьці - задаволенасьць. Задаволенасьць аддаляе нас ад ідалапаклонства і вядзе нас да Божага сэрца, а хцівасьць аддаляе нас ад Бога й вядзе нас да алтароў ідалапаклонства.

З гэтае прычыны аўтар ліста да Габрэяў піша: “Ня будзьце срэбралюбныя, задавальняючыся тым, што маеце. Бо Ён сказаў: “Не адпушчу цябе і не пакіну цябе”, дык маючы пэўнасьць, мы кажам: “Госпад мне ўспамога, і не спалохаюся. Што зробіць мне чалавек?” (Габрэяў 13:5-6).

З таго ўрыўку зразумела, што хцівасьць - гэта тое самае, што ідалапаклонства. Анжэла прагнула быць зь іншымі мужчынамі, не дазваляючы Юстыну задаволіць ейныя патрэбы. Мы мусім быць задаволенымі Богам, ведаючы, што Ён абавязкова падбае пра ўсе нашыя патрэбы. Калі мы зьвяртаемся да нейкае іншае крыніцы, акрамя Яго, і не жывем так, як загадвае Ён, дык тое зьяўляецца ідалапаклонствам!

Вось што гэта азначае: калі вернік ведае Божую волю, але наўмысна абірае ўласныя жаданьні замест яе, дык тое ёсьць ідалапаклонствам. Той вернік абірае пакланяцца сваім жаданьням, а ня Богу.

Гледзячы на твае мэты, прыярытэты ды звычкі, паразважай, што пераважае ў тваім жыцьці - хцівасьць або задаволенасьць? Як ты можаш жыць з большым задавальненьнем?