Ворагі сэрцаУзор

Эндзі Стэнлі: Ворагі сэрца

Дзень 5

"Аднясі твае жаданьні Богу"

Урывак зь Бібліі: Якава 4:1-3

Кожны вораг сэрца жывіцца ідэяй, што нехта вінаваты нешта. Пачуцьцё віны кажа: "Я вінаваты табе." Гнеў жывіцца ўяўленьнем, што ты мне вінаваты. Хцівасьць корміцца меркаваньнем, што я вінаваты сабе. Чацьвёртая сардэчная хвароба падобная да гэтых: зайздрасьць. Зайздрасьць кажа: "Бог вінаваты мне."

Калі мы думаем пра зайздрасьць або завідкі, дык мы адразу ўяўляем сабе рэчы, якія маюць іншыя, а мы - не: прыгажосьць, здольнасьці, магчымасьці, здароўе, рост, спадчыннасьць, і гэтак далей. Мы мяркуем, што праблема ў той асобе, якая мае тое, чаго нам бракуе. Але ж паглядзем праўдзе ў вочы; Бог мог бы даць усё тое нам. Усё тое, што ён даў твайму суседу, Ён мог бы даць табе. З гэтае прычыны ты адчуваеш, што Ён вінаваты табе.

Зайздрасьць можа шкодзіць твайму жыцьцю і руйнаваць твае адносіны зь людзьмі. Але добрая навіна заключаецца ў тым, што гэты зьвер, як і астатнія тры, даступны для раненьня. Магчыма, гэта прагучыць дзіўна, але ты мусіш кінуць прагнуць таго, што маюць іншыя, і прасіць Бога даць табе тое, што Ён лічыць найлепшым для цябе.

Як кажа Якаў, нашыя вонкавыя канфлікты зьяўляюцца простым вынікам унутранага канфлікту, які неяк выйшаў на паверхню. Мы хочам нечага, але ў нас яго няма, і мы пачынаем сварыцца зь іншымі. Жаданьні, аб якіх кажа Якаў у гэтым урыўку - гэта прагненьні, якія немагчыма наталіць: прагненьні рэчаў, грошай, посьпеху, ухваленьня, прагрэсу, блізкасьці, сэксу, пацехі, шлюбу, сяброўства.

Дык што рабіць з гэтымі прагненьнямі, якія немагчыма цалкам задаволіць? Якаў вучыць нас адносіць іх да Таго, Хто стварыў іх. Інакш кажучы, Якаў дае нам дазвол раскрываць нашыя сэрцы нашаму Творцу ў размове бязь фільтраў.

Кожная турбота, вялікая і малая, мае значэньне для нашага Таты, бо ты маеш значэньне для Яго. Чаго б тваё прагненьне не датычылася - твайго каханьня, тваёй кар'еры, твайго шлюбу, тваіх бацькоў, тваіх дзяцей, тваіх фінансаў, тваёй адукацыі, твайго вонкавага выгляду - пагутары аб гэтым зь Ім. І працягвай гутарыць, пакуль ня знойдзеш супакой, з дапамогаю якога зможаш падняцца з каленяў і пражыць гэты дзень, упэўнены, што Ён дбае пра цябе.

Дазволь мне запэўніць цябе: тваё сэрца заўжды будзе дарагім Ягонаму сэрцу.

Чаго табе карціць? Адвядзі час на тое, каб пагутарыць з Богам адвольна і нявымушана пра тое, чаго табе не стае. Папрасі Яго дабраславіць цябе так, як Ён лічыць найлепшым - і паказаць табе Сваю любоў.

Спадзяемся, табе спадабаўся гэты плян. Даведайся больш у кнізе ад Эндзі Стэнлі "Enemies of the Heart" (Ворагі сэрца).