Ворагі сэрцаУзор

Эндзі Стэнлі: Ворагі сэрца

Дзень 1

"Кіпячы вулькан"

Урывак зь Бібліі: Мацьвея 15:1-20

Людзі маюць схільнасьць сачыць за сваімі паводзінамі, пры гэтым цалкам ігнаруючы свае сэрцы. Урэшце, як за тым сэрцам сачыць? Калі я дрэнна паводжу сябе, дык тое не надоўга, бо нехта абавязкова паведаміць мне аб гэтым. Але сэрца? З гэтым складаней.

Ісус аднойчы сказаў нешта такое, што дагэтуль мае вялікае значэньне: "Тое, што выходзіць з вуснаў, — з сэрца выходзіць", і яшчэ: "З сэрца выходзяць злыя думкі".

Сэрца - гэта таямніца. Яно гэтакае таямнічае, што адзін прарок спытаўся: "Хто спазнае яго?" (Ераміі 17:9). Слушнае пытаньне. З намёкам, што ніхто ня можа зрабіць тое. І я цалкам згодны. Нават калі мы і пачнем спазнаваць яго, мы ня зможам кантраляваць яго - і гэта дае нават большую падставу сачыць за ім. Яно нібыта сэйсьмічная актыўнасьць сьпячага вулькана - невядомае можа нашкодзіць табе.

Раптам нехта падае на развод.

Раптам адзнакі дзіцяці панізіліся і ягонае стаўленьне зьмяняецца.

Раптам бясшкодная забава становіцца шкоднаю звычкаю.

Не адкуль спусташальныя словы раняць сэрца каханага, які ні аб чым не падазраваў.

Мы ўсе некалі бачылі, адчувалі і нават самі рабілі тое. Як прадказаў Ісус, тое, што пачынаецца ў нашым сэрцы пад сакрэтам, не застанецца сакрэтам назаўжды. У рэшце рэшт, яно прыйдзе ў нашыя хаты, раёны і месцы працы.

Сэрца прасочваецца ў кожную размову. Яно дыктуе ўзаемаадносіны. Само жыцьцё выходзіць з сэрца. Мы жывем, гадуем дзяцей, кіруем, сыходзімся, кахаем, супраціўляемся, адказваем, адукоўваем, загадваем, вырашаем праблемы і любім усім сэрцам. Нашыя сэрцы ўплываюць на інтэнсіўнасьць нашых зносінаў. Нашыя сэрцы могуць залішне падкрэсьліваць нашую чуласьць і нячуласьць. Кожная жыцьцёвая сфэра залежыць ад таго, што адбываецца ў нашых сэрцах. Усё праходзіць праз сэрца, куды б яно ні накіроўвалася. Усё.

Нам трэба наважыцца прасіць нябеснага Тату дапамагчы нам сачыць за нашымі сэрцамі, разумець і ачышчаць іх. Ён абавязкова адкажа нам і пакажа, як замяніць старыя дрэнныя звычкі сэрца на новыя, лепшыя, якія зробяць нас больш падобнымі да Ягонага Сына.

У наступныя чатыры дні гэтага пляну ты даведаесься пра чатырох ворагаў сэрца, зь якімі змагаецца кожны чалавек.

Што твае нядаўныя думкі, словы і ўчынкі кажуць пра тое, што адбываецца ў тваім сэрцы? Спытай блізкага чалавека пра тое, што ён думае наконт гэтага.