Ворагі сэрцаУзор

Эндзі Стэнлі: Ворагі сэрца

Дзень 3

"Пазбаўся крыўды і гневу"

Урывак зь Бібліі: Эфэсцаў 4:25-32

Другі вораг сэрца - гнеў. Мы злуемся, калі не атрымліваем таго, чаго нам хочацца.

Пакажы мне злоснага чалавека, і я пакажу табе пакрыўджанага чалавека. Я ўпэўнены, што той чалавек крыўдзіцца, бо ад яго нешта забралі. Нехта вінаваты яму нешта.

Бадай кожны з нас ведае людзей, чый гнеў можна выказаць гэтакімі словамі: "Ты пазбавіў мяне рэпутацыі." "Ты скраў у мяне сям'ю." "Ты скраў найлепшыя гады майго жыцьця." "Ты скраў мой першы шлюб." "Ты ня даў мне пабыць падлеткам." "Ты адабраў маю нявіннасьць." "Ты абавязаны даць мне падвышэньне." "Ты павінен дазволіць мне паспрабаваць." "Ты абавязаны даць мне яшчэ адзін шанец." "Ты абавязаны кахаць мяне."

Корань гневу - гэта адчуваньне, што ў цябе нешта адабралі. Нехта табе вінаваты. І вось гэтак усталёўваюцца адносіны "доўг-даўжнік".

А як наконт цябе? Празь які доўг ты злуесься?

Як доўга будзеш дазваляць людзям, якія пакрыўдзілі цябе, кантраляваць тваё жыцьцё? Яшчэ адзін месяц? Яшчэ адзін год? Яшчэ адзін пэрыяд твайго жыцьця? Як доўга?

Прапаную табе зрабіць сёньняшні дзень днём, калі ты вырашыў пазбавіцца крыўды!

Хоць ты і ня можаш зьмяніць тое, што было зроблена, ты не павінен дазваляць мінуўшчыне кантраляваць тваю будучыню. У Эфэсцаў 4 нам загадана пазбавіцца "ўсякага раздражненьня і лютасьці, і гнева, і крыку, і ліхаслоўя з усякаю злосьцю." Мы можам зрабіць тое "прабачаючы адзін аднаму, як і Бог у Хрысьце прабачыў нам."

Лек ад гневу - прабачэньне. Калі мы чакаем, каб нам заплацілі за крыўду, нам самім прыйдзецца плаціць за яе. Зь іншага боку, калі мы абіраем ануляваць доўг, які нехта вінаваты нам, мы будзем свабодныя.

Думаю, што з чатырох пачварных сілаў, якія мы абмяркоўваем у гэтым пляне чытаньня, гэтая - нявырашаны гнеў ад наўмыснае або ненаўмыснае крыўды - ёсьць найгоршаю. Але перамагчы яе часта даецца лягчэй за іншыя. Трэба проста вырашыць ануляваць доўг. Ты прымаеш рашэньне і заяўляеш: "Ты мне больш нічога не вінаваты."

Зрабі гэтыя чатыры крокі сёньня: (1) Вызначы, на каго ты злуесься. (2) Вызначы, што тая асоба табе вінаватая. (3) Анулюй доўг, прабачыўшы тую асобу. (4) Не дазваляй гневу апанаваць цябе зноў.