Я не баюся: Як хрысьціяне могуць рэагаваць на крызісУзор

Бясстрашныя ў крызісныя часіны

Мы ўжо казалі пра тое, як мы можам рэагаваць на крызісныя сытуацыі, будучы пасьлядоўнікамі Хрыста. Мы не жывем у страху; мы жывем вераю. Мы жывем самааддана, а не эгаістычна. І мы выпраменьваем сьвятло; мы не хаваем яго.

Але вось яшчэ адна гісторыя з Ісусава жыцьця, што дапаможа нам у няшчасьці.

Аднойчы, Ісус ды Ягоныя вучні апынуліся ў чоўне падчас даволі страшнае навальніцы. Ісус спаў на карме. Вучні вельмі зьлякаліся й думалі, што яны патонуць. Вось што адбылося:

“А Ён спаў на карме на падушцы. І будзяць Яго, і кажуць Яму: “Настаўнік! Ці ж Цябе ня рупіць, што мы гінем?” І Ён, падняўшыся, забараніў ветру і сказаў мору: “Замаўчы, суцішся!” І сьціх вецер, і сталася вялікая ціша. І кажа ім: “Чаго вы так палахлівыя? Ці ж ня маеце веры?” І яны спалохаліся страхам вялікім і гаварылі адзін аднаму: “Хто ж Ён, што вецер і мора слухаюцца Яго?” Марка 4:38-41

Вучні зьлякаліся сярод невядомага, забыўшыся, што Ісус быў літаральна побач зь імі. Як часта мы паводзім сябе гэтак сама?

Мы палохаемся, бо надта баімся, што адбудзецца найгоршае, і цалкам забываемся, што Ісус побач з намі цяпер, так як Ён тады быў з вучнямі.

Дык вернемся да той гісторыі. Ісус супакоіў буру, але галоўнае заключалася ня ў буры. Вучні зразумелі, што Ісус быў магутнейшым за ўсе буры жыцьця, і тое веданьне само па сабе можа даць нам веру перамагчы страх сёньня.

Бо вось у чым рэч: магчыма, што Ісус не заўсёды суцішыць буру навокал цябе, але Ён абяцае заўжды быць побач.

З гэтае прычыны ў адказ на крызісныя сытуацыі, прыродныя бедзтвы, пандэміі ды ўсякія іншыя сытуацыі, якія пасылае нам лёс, мы можам славіць Таго, Каго тое, што з намі адбываецца, не засьпявае зьнянацку, і Хто заўсёды знаходзіцца побач з намі.

Памаліся: Божа, я прыходжу да Цябе, трохі неспакойны, бо ______. Але я ведаю, што Ты побач са мною, гэтак жа як Ты быў побач з вучнямі сярод іхняе буры. Прашу Твае прысутнасьці ў маёй буры сёньня, Госпадзе. Пакажы мне, як перамагчы страх вераю. Дапамажы мне быць сьвятлом у цемры. Дапамажы мне перамагчы маю няверу. Дзякую за тое, Кім Ты ёсьць, і за тое, што Ты паабяцаў заўсёды быць са мною. У імя Ісуса, амэн.