Я не баюся: Як хрысьціяне могуць рэагаваць на крызісУзор

Будучы хрысьціянамі, як мы паводзім сябе, калі перад намі стаіць крызіс?

Калі наш сьвет ахапляе крызіс, то становіцца лёгка сумнявацца ў нашых перакананьнях і цяжка замяняць паніку, што мы адчуваем, супакоем, які Ісус паабяцаў нам як Сваім пасьлядоўнікам.

Дык што мы, як хрысьціяне, робім у адказ на прыродныя катаклізмы, пандэміі, або іншыя няпэўнасьці, якія стаяць перад намі?

Па-першае, мы памятаем, што гэты сьвет ня ёсьць нашым домам. Сьвятое Пісьмо нагадвае нам пра тое, што гэты сьвет нясталы - як пара. Ці тое азначае, што мы папросту жывем сабе, цалкам незацікаўленыя тым, што адбываецца навокал? Вядома, што не! Мы не павінны прыпадабняцца гэтаму сьвету. Мы павінны любіць гэты сьвет.

Падчас небясьпекі альбо няпэўнасьці, замест таго, каб ігнараваць боль, мы мусім запрашаць людзей да Божага супакою.

Сьвятое Пісьмо таксама нагадвае нам, што мы не жывем так, як тыя, якія ня маюць надзеі. Мы ведаем, што Ісус зрабіў дзеля нас, і з гэтае прычыны мы ўпэўненыя, што Ён заўсёды побач. Таму калі прыходзіць бяда, нам ня страшна, бо мы ведаем, што Ён не забыўся на нас.

Магчыма, у цябе ёсьць пытаньні пра тое, як добры Бог можа дазваляць, каб у сьвеце адбываліся гэтакія дрэнныя рэчы. Гэтыя пытаньні нармальныя. Бог не ўнікае нашых пытаньняў; Ён хоча, каб мы іх задавалі Яму.

Праўда ў тым, што Ісус ніколі не абяцаў нам жыцьцё бяз болю. Заміж таго, Ісус паабяцаў нам, што ў гэтым сьвеце будзе скруха. Будзе няпэўнасьць. Але мы ўсё адно можам мець надзею, бо гэты сьвет не зьяўляецца нашым канчатковым месцам прызначэньня. Вось што Ісус сказаў наконт гэтага:

“Гэта сказаў Я вам, каб вы мелі ад Мяне супакой. У сьвеце зазнаеце скруху; але суцешцеся: Я перамог сьвет.” Яна 16:33

Ці ты зразумеў, адкуль зьявіўся супакой? Толькі ў Ісусе мы можам знайсьці супакой, які не зьмяняецца, нягледзячы на тое, якія праблемы стаяць перад намі. І праз тое, што Ісус зрабіў дзеля нас, мы можам суцешыцца, бо ведаем канец гісторыі. Аднаго дня ў будучыні, Бог выправіць усё няправільнае.

Дык калі сёньняшні дзень выглядае няпэўным, памятайма, што мы маем непахісную надзею ў Хрысьце, якая не зьмяняецца ад нашых цяперашніх абставінаў. У наступныя некалькі дзён мы паразмаўляем пра яшчэ колькі гледжаньняў, што мы можам прыняць, і пра практычныя рэчы, што можам рабіць, каб дзяліцца Ісусавай любоўю, калі здараецца няшчасьце.