Я не магу зрабіць гэта сам

Незалежна ад таго, дзе мы знаходзімся на нашым шляху назад да Бога, ува ўсіх нас ёсьць рэчы, якіх мы ўсё яшчэ трымаемся. Для кагосьці гэта можа быць нейкая таямнічая дзейнасьць ці прывычка, аб якой ніхто ня ведае. У іншых выпадках тое, за чым мы гонімся, ёсьць відавочным.

А што яно для вас? Ад чаго вы мусіце адмовіцца? Бог рэдка прыносіць нешта новае ў нашае жыцьцё, пакуль мы не адпусьцім нешта старое ды зламанае.

Менавіта таму наступны крок пасьля адчуваньня прагі да любові і абуджэньня да расчараваньня — гэта абуджэньне да дапамогі. Гэтае трэцяе абуджэньне набліжае нас да Бога яшчэ болей, бо мы разумеем, што ня можам зрабіць гэта самі па сабе. Што адбываецца далей?

Бярэм тэлефон. Маем тую размову. Прыходзім у групу падтрымкі. Ціхенька прабіраемся да задняга шэрагу ў царкве. Падаем на калені ды ўсклікаем: “Бог, калі Ты існуеш…!”

Адмаўленьне ад шкодных выбараў і пошук дапамогі зьяўляюцца часткай пакаяньня. Пакаяцца — гэта значыць пайсьці дадому, такім чынам вяртаючыся ў родныя мясьціны. Вярнуцца дадому — гэта значыць атрымаць прабачэньне і ўпэўненасьць у існаваньні жыцьця пасьля гэтага жыцьця. Але гэта таксама значыць знайсьці новы сэнс і накірунак для вашага жыцьця, якія вы больш нідзе ня можаце знайсьці. Гэта значыць мець адносіны з Богам. Гэта значыць перакіраваць вашае жыцьцё і вярнуцца туды, дзе вашыя карані і дзе вашае месца. Калі вы каецеся, Бог мяняе вас. Вы становіцеся іншым. Біблія кажа, што Божы Дух прыходзіць, каб жыць у вас, і ў выніку адбываецца бачнае і актыўнае пераўтварэньне.

Памятайце аднак, што каяцца ня значыць адчуваць сябе дрэнна. Насамрэч, Біблія вучыць, што сапраўднае пакаяньне вядзе да “асьвяжальных часоў” ад Госпада. Пакаяцца азначае пачаць нанова і прызнаць, што вам патрэбна дапамога. Гэты заклік пакаяцца, адмовіцца ад граха, ды вярнуцца дамоў да Бога — ён для ўсіх.

Магчыма, сёньняшні дзень будзе днём, калі вы пойдзеце дадому. Падыміцеся адтуль, дзе вы цяпер, ды вярніцеся дадому, якому вы належыце. Вашыя ранейшыя памылковыя рашэньні ня маюць значэньня. Бог кажа вам: “Што бы ты ні зрабіў, кім бы ты ні стаў, ня мае значэньня. Толькі хадзі дадому.”

У чым вам неабходна пакаяцца сёньня? Як пакаяньне можа прывесьці вас да аднаўленьня з Богам?