Маецца быць болей

Вы калісь адчувалі, што вы гоніцеся за нечым, але яно не задавальняе вас цалкам? Зьвярніце ўвагу на тое адчуваньне. Яно ад Бога.

Гаворка тут не ідзе пра злоўжываньне нечым, хоць, вядома, алькагольная ды іншыя залежнасці ёсьць прыкладам пагоні за нечым марным. Але ж мы бачым шмат людзей, што кожны тыдзень наведваюць царкву ці прапаведуюць з кафедры такім людзям, але самі яны адчуваюць сябе далёка ад Бога. Яны падаюцца пасьпяховымі, удалымі ці праведнымі звонку, але ўнутры ім бракуе Бога. Яны вельмі занятыя рэлігійнымі справамі ды працай, вучобай ці сям’ёй, але ім чагось не стае. Яны прагнуць адчуць Бога па-сапраўднаму.

Тая прага — гэта першае абуджэньне для кожнага, хто спрабуе вярнуцца да Бога: Маецца быць болей.

Кожны раз, калі вы прагнеце глыбокай любові, якая сапраўды задавальняе, калі вы жадаеце зрабіць нейкую справу, якая сапраўды магла б нешта зьмяніць, альбо калі вы шукаеце адказы на найбольш складаныя жыцьцёвыя пытаньні, гэта значыць, што вы шукаеце Бога. Тут у вас ёсьць два варыянты: шукаць далей і задаволіць тую прагу самастойна, альбо зьвярнуцца да Таго, хто першапачаткова і даў вам гэтую прагу.

Нашая прага сапраўднай любові вяртае нас да таго, для чаго чалавецтва было створана першапачаткова. Бог жадаў, каб мы атрымлівалі Ягоную любоў непасрэдна ад Яго ды ад людзей, зь якімі маем правільныя адносіны. Бог ня толькі мае тое, чаго мы прагнем, Ён гэтым і ёсьць. Бог ёсьць любоў, і Ён імкнецца да нас зь любоўю.

Кажуць, што той, хто стукае ў дзьверы бардэлю, насамрэч шукае Бога. Калі вы стукаеце ў дзьверы нейкім паводзінам ці адносінам, якія могуць вас зруйнаваць, гэта можа значыць, што вы дайшлі да значнага моманту ў вашым падарожжы да Бога. Чаму? Бо расчараваньне, якое вы адчуваеце ад танных заменаў, прывядзе вас да пытаньня: Дзе знайсьці сапраўдную любоў? Ці адкрыеце вы сябе для Бога, і ці дазволіце Яму задаволіць вашую прагу да любові?

Аб якіх вашых пошуках сьведчыць тое, чым вы будзеце займацца на гэтым тыдні?