У пагоні за морквайУзор

У пагоні за дасягненьнямі

Калі гаворка ідзе пра біблійных валадароў, дык ніхто не дасягнуў столькі, колькі дасягнуў Саламон. У час ягонага валадараньня Ізраіль квітнеў. Саламон кіраваў будаўніцтвам Божага храму. Ён пабудаваў сабе каралеўскі палац. Валадары з далёкіх краінаў прыходзілі, каб паглядзець на ягоныя багацьці, прыносячы яму ў падарунак золата ды каштоўныя камяні. Ён мог адказаць на ўсякае пытаньне, якое яму задавалі. Ён меў безьліч жонак. Ён быў дабраславёны ўсякаю добраю рэччу, якую толькі можна пажадаць у жыцьці.

Калі нехта й павінен быць задаволеным усім тым, што ён дасягнуў у жыцьці, дык гэта Саламон. Але ў кнізе Эклезіяста Саламон намаляваў іншую карціну. Ён літаральна сказаў: “Я зьненавідзеў усю маю працу, якую рабіў пад сонцам…” і патлумачыў: “бо мушу пакінуць яе чалавеку, які прыйдзе пасьля мяне.”

Саламон зразумеў нешта. Мы ня зможам узяць усё гэта з намі, калі памрэм. Нашыя павышэньні на працы, хаты, узнагароды, машыны ды вакацыі застаюцца тут.

Дык што ў жыцьці сапраўды мае значэньне?

Саламон знайшоў адказ на тое пытаньне. Напрыканцы Эклезіяста ён падсумаваў: “Бойся Бога і запаведзяў Ягоных трымайся, бо чалавеку ў гэтым - усё”.

На першы погляд, тая парада можа падацца ня вельмі натхняльнаю, але прачытай яе яшчэ раз. Саламон кажа, што мы павінны імкнуцца дасягнуць у жыцьці наступнага: баяцца Бога - што азначае любіць Яго, паважаць Яго ды рабіць тое, чаго Ён просіць.

Мы прызвычаіліся чуць, як сьвет кажа: “Бяжы! Не спыняйся. Бачыш гэтыя дарагія рэчы? Бачыш гэтыя ўхваленьні? Тысячы людзей прагнуць іх, але хай тое цябе не спыняе. Змагайся за іх! Што яшчэ рабіць з жыцьцём? Жыцьцё - гэта спаборніцтва, і толькі найлепшыя перамогуць.”

Але Божае Слова кажа: “Любі Бога. Рабі дабро.”

Толькі падумай: гэта даступнае для кожнага. Незалежна ад таго, ці ты жанаты або не. Ці ты багаты або бедны. Малады або стары. Здаровы або хворы. Любі Бога ды рабі дабро.

Паразважай: Што б зьмянілася ў сёньняшнім дні, калі б тваёю адзінаю мэтаю ў кожнай сытуацыі было б любіць Бога й рабіць дабро? Як ты будзеш дасягаць гэтае мэты?