Правілы арганізацыі часу паводле Божага СловаУзор

Вызначце істотнае

У казанях, заснаваных на Лукаша 10, Марту часта папракаюць. Але ў рэальнасьці кожны з нас час ад часу паводзіць сябе як Марта, калі мы няздольныя вызначыць, якія справы зьяўляюцца найістотнейшымі ў дадзены момант. Бясспрэчна, нехта мусіў прыгатаваць вячэру, і я закладаюся, што Ісус быў вельмі ўдзячны за гасьціннасьць Марты. Справа ня ў тым, што гатаваньне вячэры не было важным. Але Ісус паказаў, што тое не было найістотнейшай рэччу, якой Марта й яе сястра Марыя маглі б займацца ў той канкрэтны момант. У той момант найістотнейшым было слухаць навучаньні ля ног Ісуса.

Як мы з вамі пабачылі ўчора, зьбіраньне нашых забавязаньняў, заданьняў ды праектаў — гэта істотны крок эфэктыўнае арганізацыі часу. Але як толькі вы занесьлі ўсе вашыя забавязаньні ў сьпіс, трэба вызначыць, якія праекты й заданьні з гэтага сьпісу зьяўляюцца найістотнейшымі. Каб зрабіць тое, вы мусіце высьветліць, да чаго Бог заклікае вас у дадзены пэрыяд вашага жыцьця й працы. Зыходзячы з такой пэрспэктывы і памятаючы пра тыя шырокія мэты, спытайцеся сябе: “Выкананьне якога заданьня зробіць усе астатнія заданьні з гэтага сьпісу лягчэйшымі або больш плённымі?” Адказам на гэтае пытаньне й будзе тая найістотнейшая рэч, на якой вы павінны засяродзіць увагу. Адкладзеце ўсё астатняе, пакуль ня скончыце гэтае заданьне. Потым паўтарэце гэты працэс зноў ды зноў.

Калі я пісаў маю апошнюю кнігу Called to Create, я быў ашаломлены мноствам заданьняў, што я мусіў выканаць, каб кніга выйшла ў продаж. Я мусіў знайсьці прадстаўніка, пераканаць выдаўца, правесьці інтэрвію, напісаць 50,000 слоў, пабудаваць плятформу дзеля маркетынгу кнігі, і г.д. Але ўжо на пачатку гэтага праекту я ведаў, што калі я ня мог знайсьці прадстаўніка, рэшта праекту ня мела аніякага сэнсу. Найістотнейшым заданьнем для мяне было знайсьці прадстаўніка. Таму я адклаў усе астатнія заданьні, пакуль не знайшоў прадстаўніка.

Насамрэч, у любы адрэзак часу толькі невялічкая колькасьць заданьняў ды праектаў зьяўляецца сапраўды істотнай. Прызвычайцеся да вызначэньня дзьвюх ці трох істотных рэчаў з вашага сьпісу справаў, і засяродзьце на іх увагу, пакуль ня выканаеце.