Wanneer Die Duiwel KlopVoorbeeld

Die Vernietiger

Wanneer die duiwel klop, hoor jy dit nie altyd nie. Reg? Hy sluip eerder by 'n oop deur in. Hy is die bedrieër wat jou denke met leuens teiken, en probeer om God se liefde en waarheid te bedek. Ander kere sal hy weer omstandighede heeltemal uit verband ruk omdat hy die aanklaer is wat jou hart met beskuldigings teiken. Kom ons praat vandag oor 'n woord wat Jesus gebruik het toe Hy oor die duiwel gepraat het: vernietig. Die duiwel is die vernietiger wat jou met hoogmoed teiken. 

In Johannes 10:10 gebruik Jesus een van die eenvoudigste vorme van menslike denke om die verskil tussen werklik goed en werklik kwaad aan te dui. Hy sit hulle langs mekaar. Wat gebeur as jy in 'n donker kamer inkyk? Jy sien die donkerte. Wat gebeur as jy na lig kyk? Jy sien die lig. Wat gebeur as jy die lig in 'n donker kamer aanskakel? Jy sien net lig. Lig wen. In hierdie enkele sin het Jesus lig aan die hele wêreld gewys. 

"'n Dief kom net steel en slag en uitroei; Ek het gekom sodat hulle die lewe kan hê, en dit in oorvloed" Johannes 10:10.

Met ander woorde, die duiwel neem weg. Jesus gee. Maar wat doen ons hiermee? Hoe vernietig die Satan? Hy teiken jou wil met hoogmoed. Hoogmoed neem oor wanneer jy verby God kyk om jou begeertes te vervul. Begeertes soos om goed te doen, saak te maak, jou behoeftes te bevredig en om geliefd te wees. Dit is hoogmoed wat jou oortuig om sonder God op te tree, of nog erger, om Hom te gebruik om jou doel te bereik. Hoogmoed kom voor die val, want hoogmoed probeer om sonder God in die donker te wandel. Jou vernietiger wil jou hoogmoedig en in die donker hê.

Hoe vernietig ons dan hoogmoed? Met die teenoorgestelde. Gee jou nederig oor aan die tweede gedeelte van Johannes 10:10: "Ek het gekom sodat hulle die lewe kan hê, en dit in oorvloed." Nederigheid neem oor wanneer jy besef dat die volle lewe eers kom as jy van Jesus ontvang (daar is die woord weer), wat jy nie verdien nie. Lig, redding, vryheid, genade, krag om jou daaglikse stryd te stry. Dis alles geskenke. Dit kan nie verdien word nie. Nederige onderwerping aan Jesus verslaan hoogmoed.

Het jy enigiets wat jy dink jy verdien het? Jy verdien niks nie. Dank God in nederigheid dat Hy dit aan jou gegee het. Sê vir Hom dat Hy daarmee kan doen wat Hy wil. Wees dan gehoorsaam.

En weet jy wat nog? Ons ontvang vrylik, so ons gee vrylik. Hoogmoed sê: "Ek het dit verdien, dus gaan ek aan God en ander net 'n bietjie gee." Nederigheid sê: "Dit was 'n geskenk, hou dus alles." Wanneer ons op God en ander reageer met hierdie nederige, vrygewige leefwyse, kan die dief probeer steel, maar daar is altyd genoeg. Hy kan probeer om die lewe te neem, maar dit is 'n oneindige geskenk. Hy kan probeer vernietig, maar ons raak van hoogmoed ontslae om die lewe ten volle in nederigheid te ontvang. Onthou, as jy duisternis langs die lig plaas, sien jy die lig. 

Bid: Vader, dankie vir alles wat ek het. Ek verdien niks nie. Ek het berou oor my pogings om U te vermy sodat ek my sin kan kry. Here, ek gee alles aan U. Amen.