Ons Daaglikse Brood: Vind Troos ten Tye van Verlies Voorbeeld

Terreur Of Vertroue?

'n Skielike rukwind, met naastenby die krag van 'n orkaan, het deur die tregter-agtige klowe bokant die meer van Tiberias, sowat 208 meter onder seevlak, gevee. Groot golwe het in die skuit geslaan en gedreig om dit te laat sink.

Vreesbevange het Jesus se dissipels Hom wakker gemaak. Hoe kon Hy slaap deur die skreeuende winde en storm wat skepe kan omgooi? (Jesus het geslaap omdat Hy uitgeput was na 'n dag van strawwe bediening.) "Meneer, gee U dan nie om dat ons vergaan nie?" het hulle geskreeu (Markus 4:38).

Jesus het kalm opgestaan en die woedende storm beveel om op te hou. Toe, te midde van die kalmte en die duisternis, het Hy twee vrae vir sy dissipels, wat met ontsag na Hom gekyk het, gevra: "Waarom is julle bang? Het julle dan nie geloof nie?" (4:40).

Terwyl ons deur die see van die lewe reis, kan skrikwekkende stormwinde dreig om ons te oorweldig. Siekte, verlies en gevaar kan ons sonder ophou teister. In ons angs kan ons uitroep na ons skynbaar onverskillige Here: "Gee U nie om vir ons probleme nie?" En Christus, heeltemal in beheer van elke omstandigheid, bestraf ons saggies en liefdevol omdat ons nie geloof het nie. Hy moedig ons aan om sy almagtige en alwyse soewereiniteit te vertrou. Wanneer God met ons is, is ons veilig vir tyd en alle ewigheid. – Vernon Grounds

Dis beter om deur 'n storm saam met Christus te gaan as om gemaklik, sonder Hom voort te gaan.