Volkslied: Genade in jou verhaalVoorbeeld

Genade in ons chaos

Genade is vir almal. Of jy al die reëls volg, of jou foute jou in die tronk laat beland het. Of jy verslaaf is aan inkopies, of verslaaf is aan dwelms. Of jou familie jou liefhet, of almal in jou lewe jou verlaat het.

Of jy dink jy verdien dit, of jy dink jy het al te veel keer verbrou — genade is vir JOU.

Genade is nie vir die perfekte, ordelike, opgemaakte jy nie. Genade is vir die “Ek het alweer ‘n fout gemaak”, “Niemand kan my ooit liefhê nie”, “Ek is te ver weg”, vir jou.

Johannes 8 vertel die verhaal van ’n vrou wat op heterdaad in ontrouheid betrap is. Die godsdienstige leiers van daardie tyd het haar gevang terwyl sy by ’n man geslaap het wat nie haar eie man was nie. Die wet het bepaal dat die straf vir owerspel die dood is.

Jesus was besig om in die tempelhof te leer toe die leiers hierdie vrou voor Hom gebring het. Ons kan ons die skaamte, verleentheid en vrees voorstel wat sy gevoel het toe sy voor Jesus se voete neergegooi is. Beskuldigings het in haar ore weerklink. Veroordeling het haar omring. Sy het geweet wat sy gedoen het. Sy het geweet sy het verbrou.

Terwyl die skare klippe in hul hande vashou om haar te stenig, het Jesus woorde gesê wat hulle geskok het:
““... Laat die een wat sonder sonde is, eerste 'n klip na haar gooi” (Johannes 8:7, AFR20).

Een vir een het hulle hul klippe laat val en weggeloop totdat net Jesus en die vrou oor was.

Jesus het nie op haar geskree, haar gespot, of haar geoordeel nie. In plaas daarvan het Hy in haar chaos en haar gebrokenheid ingestap en vir haar gesê dat Hy haar nie veroordeel nie. Hy het haar genooi om anders te gaan leef:
“Ek veroordeel jou ook nie. Gaan, en moet van nou af nie meer sondig nie” (Johannes 8:11, AFR20).

Jesus het aan hierdie vrou die presiese ding gegee wat sy die nodigste gehad het, maar die minste verwag het — genade. Hy was nie bang om in haar chaos in te stap nie. Hy het nie gesê sy moet eers haarself gaan skoonmaak voordat Hy met haar sal praat nie. Hy het na haar gekom net soos sy was en aan haar genade gebied wat nie net haar lewe gered het nie, maar dit vir ewig verander het.

Genade is nie bang vir die chaos nie. Jesus nooi ons om na Hom toe te kom, ongeag ons sondes, want sy genade maak ons skoon en lei ons terug huis toe.